Roma 5:6 - Porjanjian Boharu Torjomahan Baso Dilakng Soari-ari

⁶ Kito kinyo ulih monjadi bondar agatn kokuatan kito siku'. Apo pas timpu inyo ditontuan Allah, Kristus mati pakai' kito. Sio molabuhan nantai biar pan timpu kito kinyo pocayo ko Allah.

Roma 5:6 ပူးပေါင်းရင်းမြစ်များ

Roma 11:26

Agatn ubo nantai, soluruh banso Israel tajahan disolamant'an. Samo sama'an pomandiran Allah ni'in inyo totulis dalapm Buku Suci: “Ado Ponyolamant inyo tajahan datakng doi' bukit Sion. Sio tajahan mohapus somuo kojahatan doi' koturutan Yakub.

Roma 4:25

Allah monyorahan Yesus oca' Sio mati di kayu salib pakai' monanggukng hukupan dosa kito. Allah mombulah Yesus bobali' hidup oca' kito ulih monjadi bondar di hadapan-Nyo.

Roma 4:5

Apo nantai bukai caronyo Allah mombulah urakng inyo bodosa monjadi bondar di hadapan-Nyo. Monjadi bondar bukainyo sama'an upah apo sama'an hadiah. Sobab, Allah mombulah urakng monjadi bondar bukai obai porbuatannyo apo obai io pocayo.

Roma 5:10

Komai, kito molawatn Allah. Apo kito bobali' bohubukan boi' agatn Sio obai Ana'-Nyo mati pakai' kito. Obai Yesus udah molabuhan nantai, pasti Sio jam paca'an monyolamant'an kito inyo udah bobali' bohubukan boi' agatn Allah. Obai Yesus hidup, jadi kito paca'an mondapat'an hidup kokal jam.

Roma 5:7

Biasonyo kinyo ado urakng inyo honda' mati pakai' urakng bukai. Soandainyo ado urakng inyo mombulah inyo bondar, kotakng uyuh bondar jam urakng honda' mati pakai' io. Mungkitn ado urakng inyo borani mati pakai' urakng inyo boi'.

Roma 5:8

Apo, Allah monunju'an kasih-Nyo ko kito agatn caro ni'in: Timpu kito ija' urakng bodosa, Kristus mati pakai' kito.

Roma 8:32

Allah mombiaran oca' Ana'-Nyo siku' sonsaro. Allah monyorahan Ana'-Nyo oca' Sio mati pakai' monanggukng hukupan dosa kito. Aman Allah udah molabuhan nantai pakai' kito, pasti Sio pan tajahan moonji'i kito somuo hal inyo bukai inyo Sio janjian.

Roma 8:34

Conyiant ado urakng inyo ulih mohukupm kito. Obai, Kristus Yesus udah dihukupm mati pakai' kito. Malahan lobih doi' nantai agi'! Kristus udah hidup agi' huatan dudu' di tompat inyo tohormat di sopia' kanan Allah. Sio nam inyo mombela kito!

Galatia 2:20

Obai aku kinyo hidup agi' agatn caro sama'an komai. Ni'in, Kristus monontuan caro hidupku. Aku hidup di dunia ni'in agatn caro boharu obai aku pocayo ko Sio. Sio nantai Ana' Allah inyo kotakan mongasihi aku. Sio monyorahan diri-Nyo sampai mati sobagai kurbatn inyo monggonti'i aku.

Galatia 4:4

Apo topat watu inyo ditontuan Allah, Sio moutus Ana'-Nyo, ko dunia ni'in inyo lahir doi' siku' urakng botina'. Yesus monaati somuo porintah ongko poraturan Allah inyo ditulis Musa dalapm buku Hukupm Torat.

Efesus 5:2

Kaitn gola' mongasihi urakng bukai samo sama'an Kristus udah mongasihi kaitn ia'an Sio monyorahan diri-Nyo monjadi kurbatn posombahan pakai' monanggukng hukupan dosa kito. Sio monjadi posombahan harupm inyo monyonangan Allah.

Kolose 2:13

Komai kaitn udah mati socaro rohani obai kaitn bodosa huatan kinyo di sunant socaro jasmani. Apo Allah udah moonji'i kaitn kohidupan boharu bosamo-samo agatn Kristus. Allah udah moamputi somuo dosa kito.

1 Tesalonika 5:9

Kito gola' molabuhan nantai, obai Allah momilih kito oca' kito co kona' hukupan-Nyo. Sio momilih kito oca' kito disolamant'an molalu'i la'apo inyo dikorojoan Yesus Kristus, Tuhatn kito.

1 Timotius 1:9

Kito tohu obai Allah moonji'i Hukupm Torat bukainyo pakai' mongomboi'i caro hidup boko urakng inyo bondar. Apo Sio moonji'i Hukupm Torat pakai' mongomboi'i caro hidup boko urakng inyo hidup sokohonda'nyo siku' huatan tikakng-bongkakan, boko urakng inyo kinyo boagama huatan boko urakng hala gala' bulah dosa, boko urakng inyo kinyo honda' hidup suci huatan boko urakng inyo kinyo mongonal Sio, boko urakng inyo mombunuh urakng bukai, tomansu' boko urakng inyo mombunuh indai Bopai sia'.

Titus 2:12

Agatn caro nantai, Allah mongajar kito oca' kito botongga' molabuhan boko hal inyo kinyo monyonangan Sio, ongko oca' kito botongga' jumpat kohonda' jahat dunia ni'in. Sio mongajar kito oca' kito mampu monahan diri kito, oca' kito hidup agatn caro inyo bondar di hadapan Sio, ongko oca' kito hidup sosuai agatn kohonda' Sio. Kito bolajar caro hidup sama'an nantai watu joman ni'in,

Ibrani 8:3

Somuo imam agukng diangkat pakai' momposombahan kurbatn bonatakng huatan posombahan inyo bukai ko Allah. Sama'an nian jam Imam Agukng kito. Sio gola' ado posombahan inyo Sio onju'.

Ibrani 9:26

Soandainyo sama'an nian, boroti Sio gola' opat ajab sonsaro doi' mulo dunia ni'in dipulah. Apo inyo nyata, watu ni'in diari-ari toahir ni'in, Sio datakng sokali mo pakai' mohapus dosa agatn caro momposombahan diri-Nyo.

1 Petrus 1:20

Allah udah momilih Sio sobolupm dunia dipulah. Apo, hoyu' ari toahir ni'in, Kristus udah datakng monyatoan diri-Nyo. Sio molabuhan nantai pakai' kaitn.

2 Petrus 3:7

Apo, Allah mongombolo langit ongko bumi inyo ado watu ni'in agatn Pomandiran-Nyo jam. Sio mongombolo somuonyo nantai sampai watu Sio mohukupmnyo agatn api, ongko mombonasoan boko urakng inyo kinyo taat ko Sio.

Yudas 1:15

Sio paca'an mohakipi somuo urakng. Sio paca'an mohukupm somuo urakng obai porbuatannyo inyo jahat. Sio paca'an mohukupm somuo urakng bodosa obai boko pomandiran jahat inyo dipandiran ko Tuhatn.”

Yudas 1:18

Kato boko rasul nantai, “Timpu ahir joman, paca'an ado boko urakng inyo hala mohayam kaitn. Boko urakng nantai dikuaso'i kohonda' bukakng inyo jahat.”

Yudas 1:4

Obai, ado boko urakng totontu inyo molawatn Allah. Nyatonyo, sia' udah mansu' dalapm kolompok kaitn inyo co urakng bukai sadar obai sia' kinyo bondar-bondar pocayo ko Yesus. Sia' mongatoan Allah kito kinyo paca'an mohukupm urakng obai Sio boi' hati. Sia' gunoan pomikiran inyo salah nantai oca' sia' ulih mongosihan boko kohonda' bukakng-tubuh sia' inyo jahat. Sia' jam monula' obai Yesus Kristus ia'an satu-satunyo Tuhatn inyo bokuaso dipucu' kito. Doi' komai, udah ditulis obai sia' paca'an dihukupm.