Roma 5:21 - Porjanjian Boharu Torjomahan Baso Dilakng Soari-ari

²¹ Komai, dosa inyo bokuaso. Jadi, somuo urakng gola' mati. Apo watu ni'in, pakai' kito inyo pocayo, koboi'an Allah inyo bokuaso. Yesus Kristus, Tuhatn inyo bokuaso dipucu' kito, mombulah kito monjadi bondar di hadapan Allah huatan moonji'i kito hidup inyo kokal.

Roma 5:21 ပူးပေါင်းရင်းမြစ်များ

Matius 25:46

Lalu boko urakng nantai paca'an dihukupm agatn hukupan somanah-manahnyo di noraka. Apo boko urakng inyo hidup bondar di hadapan Allah paca'an hidup somanah-mamahnyo di sorugo.”

Yohanes 1:14

Pandir Allah nantai udah monjadi siku' monsio. Sio diapm di antaro kito. Huatan kito udah moniant komulia'an-Nyo. Ia'an, komulia'an-Nyo sobagai Ana' tunggal doi' Allah Bopai. Sio monunju'an ko kito somuo koboi'an Allah huatan somuo inyo bondar mongona'i Allah.

Yohanes 10:28

Aku moonji'i sia' hidup inyo somanah-manahnyo. Sia' cokalo bonaso sampai somanah-manahnyo. Conyiant ado siku' urakng pan inyo ulih morobut sia' doi' jari-Ku.

Roma 4:13

Allah bojanji pakai' moonju' dunia ko Abrahapm huatan koturutannyo. Allah mombulah janji nantai bukai obai Abrahapm monaati Hukupm Torat, apo obai Abrahapm pocayo huatan monjadi bondar di hadapan-Nyo.

Roma 5:12

Dosa mula'i ado di dunia ni'in obai siku' urakng, ia'an Adapm. Obai io bodosa, jadi io mati. Samo sama'an nantai, somuo urakng paca'an mati obai somuo urakng bodosa.

Roma 5:14

Apo, sia' totap mati obai dosa nantai. Doi' joman Adapm sampai joman Musa, somuo urakng mati obai dosa biar pan sia' kinyo bodosa molanggar porintah Allah, sama'an inyo dipulah Adapm. Ado kosama'an di antaro Adapm huatan Yesus inyo paca'an bobali' datakng nononyo.

Roma 5:17

Obai dosa siku' urakng, jadi somuo urakng gola' mati. Apo, kotakng lobih bosar agi' akibat doi' apo inyo dilabuhan ulih siku' urakng inyo bukai, ia'an Yesus Kristus. Nantai am koboi'an inyo Allah onju' ko monsio, ia'an Sio mombulah caronyo oca' urakng ulih monjadi bondar di hadapan-Nyo. Ongko sia' nantai paca'an bokuaso di dunia ni'in molalu'i Kristus.

Roma 6:12

Obai nantai, jangan agi' mombiaran dosa monguaso'i hidup kaitn di dunia ni'in inyo ongkah sobontar aja'. Jangan agi' monuruti kohonda' pakai' bodosa.

Roma 6:14

Dosa kinyo monguaso'i kaitn agi'. Sobab, kaitn kinyo hidup dibabah kuaso Hukupm Torat, apo kaitn hidup dibabahkuaso Allah inyo hala monunju'an koboi'an-Nyo ko kaitn.

Roma 6:16

Kaitn tontu tohu ni'in: aman kaitn monyorahan diri kaitn ko siku' urakng huatan monaati io, boroti kaitn ia'an hulutn urakng nantai. Kaitn ulih monjadi hulutn dosa ongko akibatnyo kaitn paca'an mati socaro rohani. Damo kaitn ulih monaati Allah agatn akibatnyo kaitn paca'an bulah inyo bondar.

Roma 6:23

Upah doi' dosa ia'an kito gola' mati topisah doi' Allah. Apo Allah monunju'an koboi'an-Nyo ko kito. Sio moonji'i hidup kokal ko kito obai kito bosatu agatn Kristus Yesus, Tuhatn inyo bokuaso dipucu' kito.

Roma 8:10

Memang tubuh kito tajahannyo mati obai dosa. Apo, aman Kristus diapm di dalapm diri kaitn, Roh-Nyo tajahan moonji'i kaitn kohidupan kokal obai kaitn monjadi bondar di hadapan Allah.

Titus 2:11

Allah udah monunju'an koboi'an-Nyo inyo monyolamant'an somuo urakng. Biar pan kito kinyo cucu', Sio udah moonji'i jalatn oca' somuo urakng ulih disolamant'an.

Ibrani 4:16

Obai sama'an nian am Imam Agukng kito, mara cam kito borani bodoa ko Allah inyo monunju'an kasih karunia-Nyo. Agatn sama'an nantai, Allah paca'an monunju'an bolas kasih ongko kasih karunia-Nyo ko kito. Sio paca'an monulukng kito topat watunyo.

1 Petrus 5:10

Apo, pondorita'an nantai sotogalmo. Allah siku' paca'an bulah hidup kaitn monjadi sompurna. Sio pasti mohibur kaitn huatan bulah kaitn botahatn. Sio pasti monulukng kaitn oca' kaitn ulih pocayo agatn kuat. Sio inyo hala monunju'an koboi'an-Nyo. Sio bokuaso pakai' somanah-manahnyo, huatan Sio udah moningkau kaitn oca' mondapat bagian doi' kuaso-Nyo nantai obai kaitn pocayo ko Kristus.

2 Petrus 1:1

Surat ni'in doi' ku, Simon Petrus, urakng inyo molayati Yesus Kristus. Aku pan diutus sobagai rasul-Nyo. Surat ni'in ko boko urakng inyo pocayo ko Yesus Kristus samo sama'an koi. Sio udah moonji'i kito kosompatan nantai obai Sio hala molabuhan inyo bondar. Sio nam Allah ongko Ponyolamant kito.

1 Yohanes 2:25

Ongko ninam inyo udah Sio janjian ko kito, ia'an hidup inyo somanah-manahnyo.