Roma 5:14 - Porjanjian Boharu Torjomahan Baso Dilakng Soari-ari

¹⁴ Apo, sia' totap mati obai dosa nantai. Doi' joman Adapm sampai joman Musa, somuo urakng mati obai dosa biar pan sia' kinyo bodosa molanggar porintah Allah, sama'an inyo dipulah Adapm. Ado kosama'an di antaro Adapm huatan Yesus inyo paca'an bobali' datakng nononyo.

Roma 5:14 ပူးပေါင်းရင်းမြစ်များ

Roma 5:12

Dosa mula'i ado di dunia ni'in obai siku' urakng, ia'an Adapm. Obai io bodosa, jadi io mati. Samo sama'an nantai, somuo urakng paca'an mati obai somuo urakng bodosa.

Roma 5:17

Obai dosa siku' urakng, jadi somuo urakng gola' mati. Apo, kotakng lobih bosar agi' akibat doi' apo inyo dilabuhan ulih siku' urakng inyo bukai, ia'an Yesus Kristus. Nantai am koboi'an inyo Allah onju' ko monsio, ia'an Sio mombulah caronyo oca' urakng ulih monjadi bondar di hadapan-Nyo. Ongko sia' nantai paca'an bokuaso di dunia ni'in molalu'i Kristus.

Roma 5:21

Komai, dosa inyo bokuaso. Jadi, somuo urakng gola' mati. Apo watu ni'in, pakai' kito inyo pocayo, koboi'an Allah inyo bokuaso. Yesus Kristus, Tuhatn inyo bokuaso dipucu' kito, mombulah kito monjadi bondar di hadapan Allah huatan moonji'i kito hidup inyo kokal.

Roma 8:20

Obai, komai somuo pulahan-Nyo udah dibiaran monjadi rusa', bukainyo obai kohonda'nyo siku' apo obai Allah mombiarannyo sama'an nian am.

Roma 8:22

Kito tohu obai sampai watu ni'in somuo pulahan-Nyo ija' monangis mondorita' kapikng morinduan harapan nantai samo sama'an siku' botina' inyo mohidap-porut monangis kompodihan kapikng morinduan kolahiran ana'nyo.

1 Korintus 15:22

Obai somuo urakng inyo ado hubukan agatn Adapm gola' mati. Sama'an nantai jam, somuo urakng inyo ado hubukan agatn Kristus paca'an dihidupan agi' doi' komatian.

1 Korintus 15:45

Sama'an inyo totulis di dalapm Buku Suci, “Allah bulah monsio potamo, ia'an Adapm. Adapm monjadi hidup.” Adapm nantai disobut Adapm potamo. Apo Kristus disobut Adapm toahir. Sio nantai Roh inyo bokuaso moonji'i hidup inyo somombondarannyo.

Ibrani 9:27

Allah udah monontuan monsio mati sokali mo. Lopas nantai, sia' dihakipi.