Roma 2:10 - Porjanjian Boharu Torjomahan Baso Dilakng Soari-ari

¹⁰ Apo somuo urakng inyo bulah koboi'an paca'an bodapat komulia'an, hormat huatan sonang-asau, potamo-tamo urakng Yahudi, huatan pan urakng bukai Yahudi.

Roma 2:10 ပူးပေါင်းရင်းမြစ်များ

Matius 10:13

Aman sia' honda' monorima' salapm sonang-asau nantai, Allah bondar-bondar paca'an bulah koluarga nantai sonang-asau. Apo, aman sia' kinyo honda' monorima'nyo, sonang-asau nantai paca'an bobali' ko kaitn.

Lukas 12:37

Boko hulutn inyo siap paca'an sonang-nyaman, biar pan habakngnyo datakng tinggi malapm damo holapm sunsukng. Habakngnyo tajahan sonang agatn sia' obai sia' hala siap monanti kodatakannyo. Dinga'anbo ni'in: Habakng nantai paca'an monggonti pakai'annyo pakai' molayati sia'. Io tajahan monyiuh sia' pakai' dudu' makatn. Lalu io tajahan molayati sia'.

Lukas 19:42

Kato-Nyo, “Aku kotakng boharap kaitn mongotohu'i caro inyo bulah kaitn sonang-asau. Apo watu ni'in kaitn culih mongotohu'i caro nantai.

Lukas 22:14

Timpu udah watunyo acara makatn malapm morayaan Paskah nantai, Yesus dudu' bosamo boko rasul-Nyo di meja makatn.

Lukas 9:48

Lalu Yesus bopandir ko sia', “Urakng inyo monorima' bobia' kocit ni'in obai Aku, boroti io monorima' Aku jam. Huatan urakng inyo monorima' Aku, monorima' Allah inyo moutus Aku. Obai urakng inyo palikng kocit monurut monsio, sobondarnyo io inyo palikng pontikng monurut Allah.”

Yohanes 12:26

Aman ado urakng inyo honda' molayati-Ku, io gola' tuyut-Ku. Io paca'an ado di tompat inyo samo agatn Aku. Allah Bopai paca'an mohormati sotiap urakng inyo molayati-Ku.

Yohanes 14:27

Timpu watu Aku botula', Aku moonji'i sonang-asau-Ku ko kaitn. Sonang-asau-Ku inyo Aku onju' ko kaitn, bukainyo sama'an ponyaman inyo dunia onju'. Jadi jangan golisah. Jangan gola'.

Yohanes 16:33

Aku momadahan somuonyo nantai ko kaitn oca' hati kaitn ado sonang-asau obai kaitn bosatu agatn Aku. Kaitn paca'an mondorita' di dunia ni'in. Apo, pontokuhancam hati kaitn! Aku udah mongalahan kuaso di dunia ni'in!”

Kisah Boko Rasul 10:35

Apo Allah monorima' boko urakng doi' banso mono ja'. Allah paca'an monorima' boko urakng aman sia' mohormati Sio huatan molabuhan inyo bondar.

Roma 14:17

Obai, Koraja'an Allah bukainyo soal poraturan pomakatn ongko minuman, apo soal hidup inyo bondar, hidup agatn damai, ongko hidup agatn sonang-nyamanam. Somuo nantai doi' Roh Allah.

Roma 15:13

Boko somadikan! Allah inyo moonji'i harapan ko kito. Aku bodoa obai kaitn pocayo ko Kristus, jadi Allah tajahan bulah kaitn kotakan sonang-nyamanam ongko hidup agatn sonang-asau. Aku bodoa pakai' nantai oca' kuaso Roh Allah bulah kaitn mongkitn boharap ko Sio.

Roma 2:7

Allah paca'an moonju' kohidupan kokal ko urakng inyo kinyo monyorah pakai' bulah koboi'an, ia'an urakng inyo bulah koboi'an obai moncari' komulia'an huatan hormat doi' Allah, huatan honda' dionji'i hidup kokal doi' Sio.

Roma 2:9

Somuo urakng inyo bulah kojahatan paca'an sonsaro huatan mondorita', potamo-tamo urakng Yahudi, huatan jam urakng bukai Yahudi.

Roma 5:1

Watu ni'in, kito udah monjadi bondar obai kito pocayo ko Yesus. Jadi, kito ado damai agatn Allah. Nantai tojadi obai apo inyo Tuhatn Yesus Kristus labuhan pakai' kito.

Roma 8:6

Boko urakng inyo monuruti kohonda' Roh Allah hidup agatn sonang-nyamanam doi' Allah ongko mondapat'an kohidupan inyo bondar. Apo boko urakng inyo monuruti kohonda' monsio, hidup jouh doi' Allah. Sia' mondapat'an hukupan mati somanah-manahnyo

Roma 9:21

Pasti tukakng nantai bohak mombulah ubo lapo ja' kohonda'nyo. Doi' gumpalan tanah liat inyo samo, tukakng nantai bohak mombulahnyo sobuah roga' inyo boi' huatan sobuah roga' inyo bukainyo inyo biaso.

Roma 9:23

pakai' monunju'an obai Sio kotakan mulia. Sio monunju'an nantai ko boko urakng inyo monorima' bolas-kasihan-Nyo. Allah udah siap moonji'i hidup inyo mulia ko boko urakng nantai,

Galatia 5:22

Apo aman kaitn hidup sosuai agatn kohonda' Roh Allah, ia'an: hala mongasihi, rindakng-rigah, hidup sonang dalapm hati, sabar, gala' monulukng, gala' bulah koboi'an, sotia,

Galatia 5:6

Obai, hal bosunant kata'an kinyo bosunant co nyiant bedanyo di kito inyo ado di dalapm Kristus Yesus. Inyo pontikng ia'an aman kito pocayo ko Yesus huatan kopocaya'an nantai monyurukan kito pakai' mongasihi urakng bukai.

Filipi 4:7

Jadi, Allah tajahan moonji'i kaitn sonang-asau inyo monsio kinyo mongoroti. Damai nantai tajahan monjago hati ongko pikiran kaitn di dalapm Kristus Yesus.

1 Timotius 1:17

Marabo kito mohormati ongko momuji kobosaran Allah sampai somanah-manahnyo! Sio nanam Rajo inyo momorintah somanah-manahnyo, Allah inyo kinyo ulih ditiat huatan kinyo paca'an kalo mati. Ongkah Sio nanam Allah! Amin.

Ibrani 2:7

Kinyo manah Duatn mombulah kodudu'an sia' lobih babah doi' boko molekat. Duatn udah mombulah sia' monjadi mulia ongko tohormat.

Yakobus 2:22

Jadi, udah jolas Abrahapm bukatn bayo pocayo ko Allah, apo molabuhan porbuatan inyo monyonangan Allah jam. Porbuatan Abrahapm monunju'an obai io bondar-bondar pocayo.

Yakobus 3:13

Aman kaitn bopikir kaitn ado hikmat huatan pongotohuan, kaitn gola' monunju'annyo agatn caro hidup kaitn. Kaitn gola' molabuhan porbuatan inyo boi' agatn boi' hati. Obai, boi' hati datakngnyo doi' hikmat inyo bondar.

1 Petrus 1:7

Tujuan doi' somuo kosusahan nantai ia'an pakai' mombutian aman kaitn bondar-bondar pocayo ko Tuhatn kata'an cadoai. Kopocaya'an kaitn nantai lobih borogo daripado omas. Biar pan kinyo tahatn somanahnyo, omas pan diuji agatn api pakai' mombutian aman omas nian murni kata'an cado. Jadi, kopocaya'an kaitn pan diuji jam. Agatn ubo nantai, aman kaitn bobondar pocayo, nononyo kaitn tajahannyo dipuji, dimuliaan, ongko dihormati, nantai tajahannyo tojadi watu Yesus Kristus datakng agi' monyatoan diri-Nyo.

1 Petrus 5:4

Lalu, watu Kristus datakng, ia'an Gombala inyo moirikan somuo gombala, jadi kaitn paca'an mondapat'an mahkota inyo mulia. Mahkota nantai kinyo hilakng komulia'annyo.