Roma 15:18 - Porjanjian Boharu Torjomahan Baso Dilakng Soari-ari

¹⁸ Aku co borani bopandir momuji diriku mongona'i lapo ja' inyo bukai, bayo mongona'i lapo inyo Kristus kona'an ko aku pakai' molabuhannyo. Ia'an nantai, Sio momakai aku pakai' mombimbikng boko urakng inyo bukainyo urakng Yahudi oca' sia' monjadi taat ko Allah. Sio momakai pomandiranku ongko porbuatanku pakai' molabuhan nantai.

Roma 15:18 ပူးပေါင်းရင်းမြစ်များ

Kisah Boko Rasul 15:12

Somuo urakng di santai pan kotakan langunt ongko mondinga'an Paulus ongko Barnabas bopandir. Paulus ongko Barnabas mongisahan somuo mujisat inyo udah Allah labuhan dalapm polayatan sia' ko boko urakng inyo bukainyo urakng Yahudi.

Roma 1:5

Allah jam monunju'an koboi'an-Nyo ko aku. Ia'an Yesus momilih aku pakai' monjadi rasul inyo mowakili Sio. Sio moonji'i tugas ko aku pakai' mombimbikng boko urakng doi' somuo banso oca' sia' pocayo huatan taat ko Sio.

Kisah Boko Rasul 21:19

Paulus bosonsalapan agatn sia'. Ongko io mongisahan agatn jolas mongona'i boko hal inyo dilabuhan Allah dalapm polayatannyo ko boko banso inyo bukainyo banso Yahudi nantai.

Galatia 2:8

Sia' monjadi sadar agatn nantai obai Allah udah moonji'i kuaso ko aku pakai' monjadi rasul ko urakng bukainyo Yahudi, samo sama'an Allah moonji'i kuaso ko Petrus pakai' monjadi rasul ko urakng Yahudi.

2 Tesalonika 2:17

monguat'an hati kaitn oca' kaitn hala molabuhan huatan momandiran boko hal inyo boi'.

Roma 16:26

Apo watu ni'in Allah inyo hidup kokal udah monyiuh oca' roncana-Nyo dipadahan, ia'an roncana-Nyo inyo udah ditulis dalapm boko buku nabi. Agatn ubo nantai, hajat Allah diboritoan ko somuo banso oca' sia' pocayo ongko monaati-Nyo.

Yudas 1:9

Mikhael ia'an pomimpitn molekat, apo io siku' kinyo mohayam sama'an sia'. Timpu, sio botikakng mulut agatn Rajo Sitatn mongona'i bangkai Musa, Mikhael kinyo bopikir io ado kuaso pakai' mohukupm Rajo Sitatn agatn mohayamnyo. Sobali'nyo, io bopandir, “Kironyo Tuhatn siku' paca'an mohukupm kolai!”

1 Yohanes 3:18

Poana'anKu! Jangannam kito bayo bopandir obai kito mongasihi urakng bukai damo bopandir mongona'i kasih ja'am. Apo kohonda'nyo kito bondar-bondar mongasihi agatn porbuatan ongko dalapm kobondaran.

Yakobus 1:22

Jadi, kaitn gola' monaati Pomandiran-Nyo. Jangan ongkah mondinga'annam, obai aman ubo nian kaitn monipu diri kaitn siku'.

Ibrani 11:8

Obai Abrahapm pocayo, jadi io monaati Allah. Timpu nantai, Allah moningkau io botula' ko nogori inyo nononyo tajahan dionju' Allah ko io ongko koturutannyo. Abrahapm kinyo tohu tompat tujuannyo, apo io totap botula'.

Ibrani 5:9

Agatn caro nantai, Sio monjadi Ponyolamant inyo sompurna. Jadi, Sio ulih moonji'i kohidupan kokal ko somuo urakng inyo taat ko Sio.

Kolose 3:17

Nanam, somuo inyo kaitn labuhan, somuo inyo kaitn pandiran, kaitn gola' molabuhan somuonyo nantai agatn kuaso Yesus, Tuhatn kito. Labuhancam somuonyo kapikng bosukur ko Allah Bopai kito molalu'i Yesus sobagai porontaro.

2 Korintus 12:6

Umpamonyo aku totap honda' momuji diri, nantai kinyo boroti aku urakng inyo budu. Obai, aku ulih momuji diri mongona'i hal inyo bondar. Apo cuku molabuhan nantai oca' jangan ado urakng inyo bopikir aku kotakan hebat obai poniant'an nantai. Aku honda' oca' sia' bayo monilaiku bodasaran lapo inyo sia' tiat ku labuhan ongko lapo inyo sia' dinga' inyo ku pandiran. Kinyo lobih doi' nantai.

2 Korintus 11:31

Allah ia'an Bopai doi' Tuhatn kito, Yesus, topuji sampai somanah-manahnyo. Sio tohu obai aku co bulah kotumbukan.

Roma 6:17

Memang komai kaitn ia'an hulutn dosa. Apo, bosukurcam ko Allah, obai watu ni'in kaitn bondar-bondar udah monaati ajaran bondar inyo udah disampaian ko kaitn.

Kisah Boko Rasul 26:20

Mulonyo, aku momboritoan mongona'i Yesus ko boko urakng di Damsyik, ongko di Yerusalem, ongko di soluruh doerah propinsi Yudea. Lopas nantai, aku momboritoan mongona'i Yesus ko boko banso inyo bukainyo banso Yahudi. Aku momboritoan obai sia' gola' botongga' bulah dosa huatan hidup monyonangan hati Allah. Aku momboritoan, sia' gola' molabuhan porbuatan inyo monunju'an obai sia' memang bondar-bondar botongga' bulah dosa.

Kisah Boko Rasul 15:4

Lopas nantai, Paulus ongko Barnabas huatan kolompok urakng doi' Antiokhia tuntukng ko Yerusalem. Sia' duo ditorima' agatn boi' ulih somuo jomaat tomansu' boko ponotua' jomaat huatan boko rasul. Paulus ongko Barnabas mongisahan somuo inyo udah Allah labuhan dalapm polayatan sia' ko boko urakng bukainyo Yahudi.

Kisah Boko Rasul 14:27

Jadi, watu sia' tuntukng di Antiokhia, sia' mongumpulan boko urakng pocayo ko Yesus. Sia' duo mongisahan somuo inyo udah Allah labuhan dalapm polayatan sia'. Hususnyo, sia' mongisahan mongona'i Allah inyo moonji'i caro oca' banya' urakng inyo bukainyo urakng Yahudi monjadi pocayo ko Yesus.

Markus 16:20

Boko murid-Nyo botula' momboritoan Kabar Boi' ko soluruh dunia. Tuhatn Yesus bokorojo dalapm diri sia' oca' sia' ulih mombulah mujisat. Agatn sama'an nantai, Sio mombutian obai inyo diboritoan sia' bondar.

2 Korintus 6:1

Sobagai urakng inyo bokorojo samo agatn Allah, jadi koi muhun ko kaitn: Jangannam bulah koboi'an Allah nantai monjadi sia-sia.

2 Korintus 3:5

Aku co bomasud obai koi ado komampuan siku' inyo bulah koi sanggup molabuhan polayatan ni'in. Apo, koi sanggup obai kuaso Allah.

Matius 25:16

Hulutn inyo monorima' lima' ribu pingkai' duit nantai, lansukng botula' huatan monjadiannyo modal usaha. Io bodapat kountukan lima' ribu pingkai' duit agi'.