Roma 15:14 - Porjanjian Boharu Torjomahan Baso Dilakng Soari-ari

¹⁴ Boko somadikanku, aku kotakng yakitn obai kaitn kotakan boi' ongko mongotohu'i somuo inyo dipontikan. Jadi, kaitn ulih momadahi siku'-monyiku'.

Roma 15:14 ပူးပေါင်းရင်းမြစ်များ

1 Korintus 1:5

Masudku, obai kaitn di dalapm Sio, jadi Sio momborokati kaitn dalapm somuo hal. Ia'an, kaitn monjadi mongkitn mampu mongoroti somuo macapm pongotohuan. Kaitn jam monjadi mongkitn mampu momandiran somuo hal nantai ko urakng bukai.

1 Korintus 12:8

Umpamonyo, ko urakng ni'in Roh Allah moonji'i komampuan bopandir agatn kopintar-corodi'an. Ko urakng nian Roh Allah moonji'i komampuan pakai' mongotohu'i sosuatu ongko monyampaian boko hal nantai agatn jolasko urakng bukai.

1 Korintus 13:2

Soandainyo aku dionji'i komampuan husus pakai' monyampaian posatn-pontal doi' Allah, soandainyo aku mongoroti somuo hajat Allah inyo bolupm dipadahan ko urakng bukai, soandainyo aku mongotohu'i somuo hal, soandainyo aku pocayo agatn kotakng kuat singgatn aku ulih momindahan bukit ko tompat bukai, apo aman aku kinyo mongasihi urakng bukai, aku kinyo boguno.

1 Korintus 8:1

Ni'in mongona'i dagikng bonatakng inyo diposombahan ko boko duato. Ado boko urakng bopandir, “Somuo kito ado pongotohuan.” Apo aman siku' urakng ado ‘pongotohuan husus’, ongko urakng nantai jadi buhau. Sobondarnyo kito gola' mongasihi urakng bukai. Nantaiam caronyo kito bulah urakng bukai monjadi lobih kuat socaro rohani.

1 Korintus 8:10

Misalnyo, aman ado urakng inyo hatinyo kurakng yakitn lopas nantai moniant kolai tongahan dudu' makatn di dalapm rumah adat, kolai paca'an bohiri'i io oca' jumpat makatn jam, io mooso hal nantai salah.

1 Korintus 8:7

Apo ado boko urakng inyo bolupm mongotohu'i somuo nantai. Komainyo nantai sia' udah biaso momposombahan dagikng bonatakng ko boko duato. Biar pan watu ni'in udah pocayo ko Yesus, sia' ija' bopikir aman bopua' dagikng nantai boroti monyombah duato. Sampai ni'in hati sia' kurakng yakitn jadi sia' mooso bosalah aman sia' bopua' dagikng nantai.

2 Korintus 8:7

Nah, kaitn molabuhan boko la'apo pan agatn boi' bondar. Ia'an nantai, kaitn kotakan kuat pocayo ko Yesus. Kaitn mongajar agatn caro inyo boi'. Kaitn mongotohu'i banya' boko hal. Kaitn kotakan bosomangant. Kaitn kotakan mongasihi koi. Samo sama'an kaitn molabuhan boko la'apo pan agatn boi' bondar, soharusnyo kaitn moonji'i sumbakan ni'in agatn boi' jam.

Efesus 5:9

Obai ni'inan, hasil doi' caro hidup dalapm torakng nantai: urakng nantai bulah koboi'an, bondar di hadapan Allah, huatan moikuti ajaran inyo bondar.

Filipi 1:11

Hidup kaitn tajahan molimpah agatn porbuatan inyo bondar-bondar boi' inyo ongkah ulih dihasilan Yesus Kristus. Jadi Allah tajahan dipuji ongko dimuliaan.

Filipi 1:7

Memang pantas aku bopikir ubo nian mongona'i somuo kaitn obai aku kotakan mongasihi kaitn. Obai, kaitn hala monulukng ku dalapm polayatan ku, ia'an nantai polayatan inyo Tuhatn onju' ko aku obai Sio honda' monunju'an kasih karunia-Nyo ko aku. Timpu aku ado di dalapm ponjara, timpu ku mombela Kabar Boi' tohadap urakng inyo molawatnnyo, timpu ku mombutian Kabar Boi' nantai bondar, kaitn hala monulukng ku dalapm polayatan nantai.

Kolose 3:16

Kohonda'nyo ajaran Kristus somombondarannyo mansu' ko dalapm hati kaitn huatan monguaso'i caro hidup kaitn siku'-monyiku'. Kaitn gola' samo mongajar, samo moingant'an agatn somuo kopintar-corodi'an. Nyanyiancam mazmur, puji-pujian, nyanyian mongona'i Allah. Bonyanyicam agatn bosukur ko Allah dalapm hati kaitn.

1 Tesalonika 5:11

Obai nantai, gola' hala salikng moingant'an mongona'i ajaran nantai oca' hati kaitn masikng-masikng dikuatan. Gola' sosamo bontulukan oca' kopocaya'an kaitn ko Yesus monjadi lobih kuat. Memang kaitn tongahan molabuhan nantai jam.

1 Tesalonika 5:14

Boko somadikan, koi pan momadahi kaitn oca' moolikan boko urakng inyo lola' bokorojo. Kuatan hati sia' inyo mooso gola'. Tulukngcam urakng inyo uyuh. Sabarcam tohadap somuo urakng.

2 Tesalonika 1:11

Obai Allah mombalas somuo urakng agatn adil, koi hala mondoa'an kaitn. Koi bodoa oca' Allah moanggap kaitn cucu' pakai' ditingkau-Nyo. Koi pan bodoa oca' kuaso Allah monulukng kaitn pakai' molabuhan somuo inyo kaitn labuhan. Koi pan bodoa oca' Allah moonji'i kokuatan pakai' molabuhan somuo inyo kaitn labuhan obai pocayo ko Yesus.

2 Timotius 1:5

Aku pan togonangan obai kolai somombondarannyo pocayo ko Yesus samo sama'an nini' Lois doi' sobolah indai kolai ongko indai kolai Eunike. Sia' duo pocayo sobolupm kolai. Aku pan yakitn obai kolai somombondarannyo jam pocayo.

Filemon 1:21

Aku monulis surat ni'in obai aku yakitn kolai tajahan taat. Aku tohu kolai tajahan molabuhan lobih doi' nantai agi'.

Ibrani 5:12

Sobondarnyo, udah watunyo pakai' kaitn pakai' monjadi guru inyo mongajar urakng bukai mongona'i pomandiran Allah. Apo kaitn ija' pontikng urakng bukai mongajar kaitn mongona'i boko ajaran dasar doi' nantai. Umpamonyo kaitn monjadi bobia' agi' inyo ija' monyusu, bolupm ulih bopua' pomakatn inyo korikng.

Ibrani 6:9

Apo, boko somadikan inyo tokasih, biar pan koi bopandir mongona'i hukupan sama'an nantai, koi yakitn obai kaitn udah monorima' boko hal inyo lobih boi' sampai kaitn paca'an disolamant'an.

2 Petrus 1:12

Memang kaitn udah mongotohu'i somuo ni'inan. Kaitn udah kuat pocayo agatn ajaran bondar inyo udah disampaian ko kaitn. Apo, kohonda' ku pakai' hala moingant'an kaitn mongona'i somuonyo nantai.

1 Yohanes 2:21

Aku monulis ni'in ko kaitn, bukainyo obai kaitn co mongotohu'i kobondaran, apo obai kaitn mongotohu'inyo. Obai kaitn pan mongotohu'i obai conyiant kotumbukan di dalapm ajaran inyo bondar nantai.