Roma 15:13 - Porjanjian Boharu Torjomahan Baso Dilakng Soari-ari

¹³ Boko somadikan! Allah inyo moonji'i harapan ko kito. Aku bodoa obai kaitn pocayo ko Kristus, jadi Allah tajahan bulah kaitn kotakan sonang-nyamanam ongko hidup agatn sonang-asau. Aku bodoa pakai' nantai oca' kuaso Roh Allah bulah kaitn mongkitn boharap ko Sio.

Roma 15:13 ပူးပေါင်းရင်းမြစ်များ

Yohanes 14:1

Lalu Yesus bopandir ko boko murid-Nyo, “Jangannam hati kaitn golisah! Pocayocam ko Allah. Pocayocam ko aku.

Yohanes 14:27

Timpu watu Aku botula', Aku moonji'i sonang-asau-Ku ko kaitn. Sonang-asau-Ku inyo Aku onju' ko kaitn, bukainyo sama'an ponyaman inyo dunia onju'. Jadi jangan golisah. Jangan gola'.

Roma 12:12

Sonang-nyamancam obai kaitn yakitn boharap ko Tuhatn. Kaitn gola' botahatn mohadapi ajab sonsaro ongko hala bodoa.

Roma 14:17

Obai, Koraja'an Allah bukainyo soal poraturan pomakatn ongko minuman, apo soal hidup inyo bondar, hidup agatn damai, ongko hidup agatn sonang-nyamanam. Somuo nantai doi' Roh Allah.

Roma 15:19

Sio pan momakai bomacapm mujisat ongko kuaso Roh Allah. Ubo nianam caronyo aku momboritoan soluruh Kabar Boi' mongona'i Kristus doi' kota Yerusalem sampai ko doerah Ilirikum.

Roma 15:5

Sio nam Allah inyo monguat'an hati kito ongko bulah kito botahatn mohadapi ajab sonsaro. Aku bodoa oca' Sio bulah kaitn hidup dalapm kosatuan sosuai agatn kohonda' Kristus Yesus.

1 Korintus 2:4

Watu aku momboritoan Kabar Boi', aku kinyo momakai kopintar-corodi'an monsio pakai' moyakit'an kaitn oca' monjadi urakng pocayo. Apo aku momboritoan agatn caro inyo monunju'an obai Roh Allah bokuaso.

2 Korintus 9:8

Ingantcam obai Allah sanggup moonji'i banya' borokat ko kaitn, oca' kaitn hala ado la'apo pan inyo kaitn pontikan. Agatn ubo nantai, kaitn ulih molabuhan banya' porbuatan boi'.

Galatia 5:22

Apo aman kaitn hidup sosuai agatn kohonda' Roh Allah, ia'an: hala mongasihi, rindakng-rigah, hidup sonang dalapm hati, sabar, gala' monulukng, gala' bulah koboi'an, sotia,

Efesus 1:2

Aku bodoa oca' Allah Bopai kito huatan Tuhatn Yesus Kristus monunju'an kasih karunia ongko moonji'i sonang-asau ko kaitn.

1 Tesalonika 1:5

Obai watu koi momboritoan Kabar Boi' ko kaitn, koi kinyo bayo momakai boko pomandiran koi modas. Apo kuaso Roh Allah monulukng koi monyampaiannyo huatan koi kotakng yakitn aman Kabar Boi' nantai bondar. Kaitn mongotohu'i somuo nantai obai kaitn udah moniant caro hidup koi. Watu koi ado di antaro kaitn, koi molayati kaitn.

1 Timotius 1:1

Ko Timotius: inyo bondar-bondar sama'an ana'ku dalapm Yesus. Salapm doi' aku, Paulus. Kristus Yesus ongko Allah moutus aku monjadi rasul-Nyo pakai' momboritoan mongona'i Sio. Allah nanam Ponyolamant kito huatan Kristus Yesus tompat kito boharap. Aku bodoa oca' kasih karunia ongko sonang-asau doi' Allah, Bopai kito, huatan Tuhatn Yesus Kristus monyoroto'i kolai.

Ibrani 6:11

Apo koi honda' kaitn siku'-monyiku' totap torus bosomangant mombulah sama'an nantai sampai ahir, oca' kaitn yakitn mongona'i harapan kaitn.

1 Petrus 1:8

Kaitn bolupm kalo moniant Sio, apo kaitn totap mongasihi-Nyo. Watu ni'in, kaitn culih moniant Sio, apo kaitn totap pocayo ko Sio. Jadi, kaitn rindakng rigah ongko sonang-nyamanam inyo kotakan luar biaso sampai kinyo tokatoan.