Roma 11:7 - Porjanjian Boharu Torjomahan Baso Dilakng Soari-ari

⁷ Jadi kosimpulannyo ubo ni'inan: Urakng Israel bousaha monjadi bondar di pohadapan Allah. Apo kobanya'an doi' sia' kinyo mondapat'annyo. Bayo sodikitmo inyo mondapat'annyo, ia'an nantai boko monsio inyo dipilih Allah. Somuo monsio bukai, Allah bulah hati sia' korikng hati.

Roma 11:7 ပူးပေါင်းရင်းမြစ်များ

Markus 6:52

obai sia' bolupm mongoroti sopo Sio sobondarnyo. Biar pan sia' udah moniant Sio mombulah mujisat agatn roti nantai tontainyo, hati sia' ija' manah mongoroti.

Lukas 13:24

Lalu Yesus monimbas, “Koraja'an Allah soumpamo sobuah rumah agatn lawakng inyo songka'. Bousahacam pakai' mansu' molalu'i lawakng inyo songka' nantai, obai banyaꞌ urakng inyo moncubo mansu', apo bayo sodikit inyo ulih.

Yohanes 12:40

“Tuhatn udah mombulah mato sia' buto. Sio udah mombulah hati sia' koras. Oca' jangan sampai ni'in tojadi: sia' moniant agatn mato, sia' mongoroti agatn hati, lalu moninggalan boko dosa sia', oca', Tuhatn moamputi sia'.”

Roma 10:3

Sia' co mongoroti caronyo Allah mombulah monsio monjadi bondar di hadapan-Nyo, ongko sia' moncubo monjumpati caro sia' siku'. Jadi, sia' co honda' monorima' caro inyo ditontuan Allah nantai.

Roma 11:25

Boko somadikan! Oca' kaitn kinyo bopikir kaitn udah mongotohu'i boko la'apo pan, jadi aku honda' momadahannyo ko kaitn mongona'i hajat Allah ni'in inyo komai kinyo dikotohu'i monsio: Sobagi'an banso Israel udah monjadi korikng hati, kinyo honda' pocayo agatn Yesus. Apo, koadaan ni'in bayo sampai jumlah monsio doi' banso bukai udah datakng ko Allah, ia'an nantai jumlah inyo udah ditontuan-Nyo.

Roma 11:5

Ubo nantai jam, watu joman ni'in ado sojumlah monsio inyo Allah pilih obai koboi'an-Nyo,

Roma 3:9

Jadi, sama'an apo kosimpulannyo? Apobai kito urakng Yahudi lobih boi' di hadapan Allah daripado urakng bukai? Samo sokali cado! Koi udah monjolasan obai somuo urakng dikuaso'i ulih dosa, boi' urakng Yahudi honda' pan urakng bukai Yahudi.

Roma 6:15

Jadi sama'an apo? Aku momandiran obai kito co hidup dibabah kuaso Hukupm Torat, apo kito hidup dibabah kuaso Allah inyo torus-monorus monunju'an koboi'an-Nyo ko kito. Apobai nantai boroti kito suba' mo mombulah dosa? Samo sokali cado!

Roma 9:18

Jadi, udah jolas obai Allah monunju'an bolas-kasihan ko urakng sosuai agatn kohonda'-Nyo. Apo Allah pan ulih bulah urakng korikng hati sosuai agatn kohonda'-Nyo, sama'an inyo tojadi agatn rajo Mesir nantai.

Roma 9:23

pakai' monunju'an obai Sio kotakan mulia. Sio monunju'an nantai ko boko urakng inyo monorima' bolas-kasihan-Nyo. Allah udah siap moonji'i hidup inyo mulia ko boko urakng nantai,

1 Korintus 10:19

La'apo masudku inyo sobondarnyo? Aku co bomasud aman boko duato bondar-bondar hidup. Aku pan co bomasud aman dagikng inyo diposombahan ko boko duato nantai kinyo lobih boroti daripado dagikng biaso.

2 Korintus 3:14

Pikiran sia' udah totutup. Sampai ari ni'in pan, sama'an nian jam. Jadi, timpu urakng Israel mombaco Pojanjian Manah di Hukupm Torat nantai, ubo ado koitn ponutup mato-muho inyo mombulah pikiran sia' buntu'. Sia' co mongoroti sobondarnyo tujuan Hukupm Torat nantai, obai urakng bayo mongoroti aman io di dalapm Kristus.

2 Korintus 4:4

ia'an boko urakng inyo kinyo honda' pocayo. Rajo Sitatn, inyo monguaso'i dunia ni'in, udah bulah sia' co mongoroti. Io bulah mato hati sia' monjadi buto oca' sia' co moniant cohayo, ia'an Kabar Boi' mongona'i Kristus inyo mulia, Kristus inyo nianam samo agatn rupo Allah.

Efesus 1:4

Obai, sobolupm Allah mombulah dunia ni'in, Sio udah momilih kito monjadi umat-Nyo dalapm Kristus. Tujuan-Nyo oca' kito monjadi borosih, co bodosa di hadapan-Nyo.

Efesus 4:18

Sia' kinyo dapat mongoroti mongona'i Allah obai sia' tinggal di dalapm potakng, jouh doi' kohidupan inyo dionju' Allah. Obai, sia' kinyo mongonal Allah, huatan obai sia' korikng hati.

Filipi 1:18

Apo co apo-apo! Biar pan urakng ado tujuan lapo ja', doi' hati inyo bondar kata'an salah, inyo pontikng sia' momboritoan mongona'i Kristus. Obai sia' molabuhan nantai, jadi aku sonang-nyamanam. Aku tajahan totap sonang-nyamanam jam,

Ibrani 12:17

Kaitn tohu kisahnyo, watu Esau honda' monorima' borokat nantai, io ditula'. Biar pan io monangis bogoyap caro pakai' mombulah'i kosalahannyo io kinyo bodapat kosompatan.

1 Petrus 1:2

Allah, Bopai kito, momilih kaitn sosuai agatn roncana-Nyo. Roh Allah mombulah kaitn monjadi borosih doi' dosa oca' kaitn monaati Yesus Kristus. Allah molabuhan nantai jam oca' kaitn ulih monorima' hasil doi' darah Yesus Kristus inyo dicurahan ko kaitn watu Sio mati di kayu salib. Aku bodoa oca' Allah monunju'an koboi'an ongko moonji'i sonang-asau ko kaitn agatn bolimpah.