Roma 1:17 - Porjanjian Boharu Torjomahan Baso Dilakng Soari-ari

¹⁷ Obai, dalapm Kabar Boi' nantai, Allah monunju'an caronyo monsio dapat monjadi bondar di pohadapan-Nyo, ia'an agatn pocayo ko Yesus, huatan torus pocayo sampai ahirnyo. Sama'an pomandiran ni'in inyo totulis di Buku Suci: “Boko urakng inyo pocayo paca'an monjadi bondar di pohadapan Allah, jadi sia' paca'an bodapat hidup inyo sobondar-bondarnyo.”

Roma 1:17 ပူးပေါင်းရင်းမြစ်များ

Yohanes 3:36

Boko urakng inyo pocayo ko Ana' Allah, mondapat'an kohidupan somanah-manahnyo. Apo boko urakng inyo kinyo monaati Ana' Allah, co mondapat'an kohidupan nantai. Sia' ija' kona' hukupan doi' Allah.”

Roma 10:3

Sia' co mongoroti caronyo Allah mombulah monsio monjadi bondar di hadapan-Nyo, ongko sia' moncubo monjumpati caro sia' siku'. Jadi, sia' co honda' monorima' caro inyo ditontuan Allah nantai.

Roma 3:21

Apo watu ni'in Allah udah monunju'an caronyo monsio ulih monjadi bondar di hadapan-Nyo. Caronyo bukai agatn monaati Hukupm Torat. Apo buku Hukupm Torat huatan boko buku nabi-nabi momadahan mongona'i caro nantai.

Roma 3:22

Ia'an, urakng monjadi bondar di hadapan Allah agatn caro pocayo ko Yesus Kristus. Caronyo samo pakai' somuo urakng. Dalapm hal nantai, urakng Yahudi kinyo ado bedanyo doi' urakng bukai Yahudi.

Roma 3:3

Apo sama'an apo aman ado urakng Yahudi inyo kinyo sotia ko Allah? Apobai nantai paca'an mombulah Allah kinyo sotia monopat'i boko janji-Nyo ko sia'?

Roma 9:30

Aman ubo nian, la'apo inyo ulih kito padahan? Kito ulih monyimpulan ni'in: Boko urakng bukainyo urakng Yahudi kinyo bousaha monjadi bondar di hadapan Allah. Apo, sia' monjadi bondar obai sia' pocayoagatn Kristus.

2 Korintus 3:9

Obai monsio culih monaati somuo porintah huatan poraturan di Hukupm Torat, jadi polayatan Musa momimpitn monsio monjadi salah di hadapan Allah. Apo, polayatan Roh Allah momimpitn monsio monjadi bondar di hadapan Allah. Jadi, aman polayatan Musa mulia, polayatan Roh Allah pan lobih mulia agi'.

2 Korintus 5:21

Kristus kinyo bodosa, apo Allah bulah Sio monanggukng hukupan dosa kito. Allah molabuhan nantai oca' di dalapm Kristus, kito ulih monjadi bondar di hadapan Allah.

Galatia 3:11

Jadi, urakng dianggap bondar di hadapan Allah bukainyo agatn caro monaati Hukupm Torat. Hal nantai udah jolas obai di dalapm Buku Suci ado pomandiran bukai agi' inyo totulis: “Boko urakng inyo pocayo ko Allah paca'an dianggap bondar di hadapan Allah. Sia' paca'an mondapat'an hidup inyo sobondarnyo.”

Filipi 3:9

ongko oca' aku ulih bosatu agatn Sio. Aku monjadi bondar di hadapan Allah bukainyo obai usaha ku siku' monaati Hukupm Torat. Aku monjadi bondar obai aku pocayo agatn Kristus. Allah inyo molabuhan nantai. Sio mombulah monsio monjadi bondar di hadapan-Nyo aman sia' pocayo.

Ibrani 10:38

Umant-Ku inyo bondar paca'an pocayo, jadi sia' tajahan bodapat hidup inyo sobondar-bondarnyo. Apo aman ado inyo mundur jadi Aku co sonang agatn io.”