Roma 1:13 - Porjanjian Boharu Torjomahan Baso Dilakng Soari-ari

¹³ Boko somadikan, aku honda' oca' kaitn tohu obai aku udah opat bohajat pakai' mondataki kaitn, apo sampai watu ni'in hala ado halakan. Aku honda' datakng oca' nononyo polayatanku di antaro kaitn ulih bohasil samo sama'an inyo tojadi di antaro boko urakng inyo bukai Yahudi di boko tompat inyo bukai jam.

Roma 1:13 ပူးပေါင်းရင်းမြစ်များ

Yohanes 12:24

Porotiancam contoh ni'in: aman sobigi' gandupm jatu' ko dalapm tanah, bigi' nantai gola' mati holu sobolupm lantakng monjadi tontanaman. Aman bigi' nantai co mati, io totap sobigi' mo. Apo, aman inyo mati huatan lantakng, inyo paca'an mohasilan banya' buah.

Yohanes 15:16

Bukainyo kaitn inyo momilih Aku, apo Akunam inyo momilih kaitn. Aku moutus kaitn oca' kaitn botula' ongko bobuah lobat, ia'an buah inyo tahatn somanah-manahnyo. Aman kaitn molabuhan nantai lalu, Bopai paca'an moonji'i kaitn lapo inyo kaitn minto doi' Sio dalapm damo-Ku.

Yohanes 4:36

Urakng inyo mohanyi, io udah monorima' upahnyo. Io mongumpulan buah pakai' hidup somanah-manahnyo. Lalu, urakng inyo monanam huatan urakng inyo mohanyi sonang bosamo-samo.

Kisah Boko Rasul 1:15

Lopas nantai boboropo ari, ado kiro-kiro soratus duo puluh urakng inyo pocayo ko Yesus bokumpul watu nantai. Petrus bodiritn di antaro sia' somuo. Katonyo,

Kisah Boko Rasul 14:27

Jadi, watu sia' tuntukng di Antiokhia, sia' mongumpulan boko urakng pocayo ko Yesus. Sia' duo mongisahan somuo inyo udah Allah labuhan dalapm polayatan sia'. Hususnyo, sia' mongisahan mongona'i Allah inyo moonji'i caro oca' banya' urakng inyo bukainyo urakng Yahudi monjadi pocayo ko Yesus.

Kisah Boko Rasul 15:12

Somuo urakng di santai pan kotakan langunt ongko mondinga'an Paulus ongko Barnabas bopandir. Paulus ongko Barnabas mongisahan somuo mujisat inyo udah Allah labuhan dalapm polayatan sia' ko boko urakng inyo bukainyo urakng Yahudi.

Kisah Boko Rasul 19:21

Lopas nantai, obai bimbikan Roh Allah Paulus bulah hajat pakai' botula' ko Yerusalem. Dalapm pojalatan ko su'utn, io honda' molalu'i propinsi Makedonia huatan Akhaya oca' io ulih mondataki boko urakng pocayo di su'utn. Io pan honda' ko kota Roma. Katonyo, “Lopas jadi aku botula' ko Yerusalem, aku gola' mondataki Roma.”

Kisah Boko Rasul 21:19

Paulus bosonsalapan agatn sia'. Ongko io mongisahan agatn jolas mongona'i boko hal inyo dilabuhan Allah dalapm polayatannyo ko boko banso inyo bukainyo banso Yahudi nantai.

Kisah Boko Rasul 28:14

Di kota nantai, koi botomu agatn boko urakng pocayo agatn Yesus. Sia' mominto koi monoluntukng samoan agatn sia' somanah tujuh ari. Lopas nian, koi molajuan pojalatan ko Roma molalu'i jalatn darat.

Roma 1:12

Masudku, watu aku bosamo kaitn, kito samo-samo ulih dikuatan. Ia'an, hati aku paca'an dikuatan obai moniant kaitn bondar-bondar pocayo ko Yesus. Sama'an nian jam, hati kaitn paca'an dikuatan obai kopocaya'anku.

Roma 11:25

Boko somadikan! Oca' kaitn kinyo bopikir kaitn udah mongotohu'i boko la'apo pan, jadi aku honda' momadahannyo ko kaitn mongona'i hajat Allah ni'in inyo komai kinyo dikotohu'i monsio: Sobagi'an banso Israel udah monjadi korikng hati, kinyo honda' pocayo agatn Yesus. Apo, koadaan ni'in bayo sampai jumlah monsio doi' banso bukai udah datakng ko Allah, ia'an nantai jumlah inyo udah ditontuan-Nyo.

Roma 7:1

Boko somadikan, kaitn somuo mongoroti mongona'i hukupm socaro umum. Jadi, kaitn tontu tohu obai urakng monaati hukupm somanahan io hidup, apo kinyo pas-udah io mati.

1 Korintus 1:10

Boko somadikan, agatn kuaso Tuhatn kito, Yesus Kristus, aku monosihat'i oca' kaitn bosatu hati. Jangan kaitn bosongkayo monjadi bomacapm kolompok. Apo kohonda'nyo kaitn somombondarannyo bosatu dalapm porasa'an huatan pikiran kaitn.

1 Korintus 10:1

Boko somadikan, aku honda' moingant'an kaitn mongona'i angki-bayatn kito urakng Israel. Joman komai, Musa momimpitn sia' koluar doi' hulutn-pacal di tanah Mesir. Allah moirikan somuo sia' agatn tihakng awatn. Ongko, Allah moirikan somuo sia' monyomboraki Lout Mirah.

1 Korintus 12:1

Ni'inan, boko somadikan, aku honda' monulis mongona'i boko komampuan husus inyo dionji'i Roh Allah. Aku honda' oca' kaitn bondar-bondar mongoroti mongona'i boko hal ni'in.

1 Korintus 14:20

Boko somadikan, jadicam sama'an boko bobia' dalapm hal kojahatan obai boko bobia' kinyo tohu porbuatan jahat. Apo jangan monjadi sama'an boko bobia' dalapm kaitn bopikir mongona'i boko komampuan husus doi' Roh Allah. Dalapm hal nantai, kaitn gola' bopikir agatn pintar-corodi' sama'an urakng tuho.

1 Korintus 14:26

Jadi ubo ni'in boko somadikan: Watu kaitn bokumpul pakai' sombayakng, ado inyo monyanyi lagu pujian, ado inyo moajaran sosuatu, ado inyo monyampaian sosuatu inyo Allah poniant'an ko io, ado inyo bopandir pakai baso roh, ado inyo monjolasan roti doi' pomandiran dalapm boko baso nantai. Somuo nantai gola' dilabuhan pakai' monguat'an urakng bukai.

1 Korintus 9:2

Mungkitn ado urakng bukai inyo kinyo moaku'i aku sobagai rasul. Apo pasti kaitn moaku'i aku sobagai rasul. Obai, hidup kaitn di dalapm Tuhatn ia'an buti aku ni'inam rasul.

2 Korintus 1:8

Boko somadikan, kohonda' koi oca' kaitn mongotohu'i mongona'i pondorita'an inyo koi alapi di propinsi Asia Kocit. Pondorita'an nantai kotakng borat sampai koi co sanggup botahatn. Koi putus asa, osonyo honda' mati ja'am.

2 Korintus 2:14

Apo bosukur ko Allah! Sio moirikan koi dalapm pawai boko urakng inyo monang obai koi hidup di dalapm Kristus. Allah momakai koi pakai' monyampaian borito mongona'i Kristus di mono-mono, samo sama'an bou harupm.

Galatia 3:15

Boko somadikan, aku moonji'i contoh inyo opat dialapi monsio. Umpamonyo, ado duo urakng inyo bulah sobuah porjanjian. Lopas jadi porjanjian nantai disahan, co nyiant siku' urakng pan inyo dapat mombalakan porjanjian nantai. Co nyiant siku' urakng pan inyo ulih monambahan sosuatu ko dalapm porjanjian nantai. Biar pan porjanjian nantai bayo di antaro monsio, porjanjian nantai kinyo ulih borubah.

Galatia 6:18

Boko somadikan, Aku bodoa oca' Tuhatn kito Yesus Kristus hala momborokati kaitn. Amin!

Filipi 1:22

Apo, aman aku hidup di dunia ni'in, polayatanku tajahan kotakng boguno. Jadi, aku co tohu mono inyo gola' ku pilih ia'an hidup damo mati.

Filipi 4:17

Aku momandiran nantai bukainyo pakai' bogoyap bantu'an agi' doi' kaitn. Apo aku honda' oca' Tuhatn somongkitn momborokati kaitn obai kaitn udah monulukngku.

Kolose 1:10

Agatn sama'an nantai kaitn ulih hidup agatn caro inyo hala monyonangan Tuhatn. Jadi, somuo porbuatan boi' inyo kaitn labuhan paca'an ado pongulihan inyo boi'. Kaitn pan paca'an mongkitn mongotohu'i mongona'i Allah huatan mongkitn mongonal Sio.

Kolose 1:6

inyo udah disampaian ko kaitn. Kabar Boi' nantai tongahan diboritoan di mono-mono sampai bokombakng huatan bobuah. Sama'an nantaiam jam inyo tojadi di antaro kaitn, doi' watu kaitn mondinga' Kabar Boi' nantai lalu mongoroti koboi'an Allah inyo sobondarnyo.

1 Tesalonika 2:18

Aku, Paulus, udah bousaha boboropo kali pakai' ulih monjongu' kaitn. Koi kotakng honda' bobali' apo Rajo Sitatn hala mohalaki koi.

1 Tesalonika 4:13

Boko somadikan, koi kotakng honda' oca' kaitn mongotohu'i mongona'i la'apo inyo paca'an tojadi ko boko urakng inyo pocayo lopas sia' mati. Koi co honda' kaitn bulikng samo sama'an boko urakng inyo kinyo pocayo ko Yesus. Sia' co nyiant pongharapan obai boko urakng inyo mati paca'an bobali' hidup.

2 Tesalonika 2:7

Io paca'an totap ditahatn, apo socaro bototapu' kuaso inyo molawatn Allah udah mula'i bokorojo di dunia ni'in. Nono inyo monahan Rajo kotakng jahat nantai paca'an di buakan.

2 Timotius 4:17

Apo, watu nantai, Tuhatn monyoroto'iku. Sio moonji'i kokuatan ko aku. Obai nantai, aku ulih momboritoan Kabar Boi' ko urakng inyo bukainyo urakng Yahudi. Watu nantai, aku co dihukupm mati samo sama'an lopas doi' tontorokapan bonatakng buas.