Matius 6:2 - Porjanjian Boharu Torjomahan Baso Dilakng Soari-ari

² Contohnyo, timpu kaitn moonju' sumbakan pakai' urakng jaro, jangan buhau agatn hal nantai. Boko urakng inyo pompadah boi' inyo bulah sama'an nantai. Sia' gala' moonji'i sumbakan pakai' urakng jaro di hadapan urakng banya' di boko rumah sombayakng huatan di jalatn. Sia' molabuhannyo agatn caro nantai oca' urakng bukai mohormati sia'. Kotakng bondar inyo Aku pandiran ni'in: Sia' udah bodapat upah doi' sosamo monsio.

Matius 6:2 ပူးပေါင်းရင်းမြစ်များ

Matius 15:7

Jadi, sobondarnyo kaitn bayo pompadah boi'. Timpu joman komai, nabi Yesaya udah monyampaian pomandiran Allah mongona'i kaitn. Topat bondar pomandiran Allah ni'in:

Matius 16:3

Apo aman ado lotupm huatan potakng-hiru' watu sunsukng, ongko kaitn bopandir, ‘Pasti ari honda' hujatn.’ Jadi, aman kaitn moniant langit, kaitn ulih mongotohu'i cuacanyo agatn bondar. Apo biar pan kaitn moniant boko kojadian inyo tojadi joman ni'in, kaitn totap kinyo dapat mongotohu'i kohonda' Allah.”

Matius 22:18

Apo Yesus tohu mo tujuan sia' inyo jahat nantai. Ia'an Sio bopandir, “Kaitn pompadah boi' mo. Mapo kaitn monjebak-Ku?

Matius 23:5

Somuo inyo sia' labuhan bayo oca' urakng bukai mohormati sia'. Contohnyo: Kotak sombayakng inyo dikobat'an di koning huatan di longan, sia' mombosarannyo. Boko rumbai jubah, sia' pulah panjakng oca' kotiat'annyo lobih taat doi' urakng bukai.

Matius 23:6

Di rumah sombayakng ongko diboko tompat pogai sia' gala' dudu' di tompat inyo tohormat.

Matius 24:51

Pasti habakngnyo nantai paca'an mombunuh hulutn nantai, lalu ditikapannyo ko tompat hukupan pakai' somuo urakng inyo pompadah boi' nantai. Di siatan sia' paca'an monangis ongko bokorit gigi obai kotakan ajab sonsaro.”

Matius 5:18

Dinga'anbo ni'in: Somanah ija' ado langit huatan bumi, co nyiant la'apo pan inyo paca'an dihilakan doi' Hukupm Torat, biar pan sobuti' hurup damo sobuti' titik, sampai somuonyo tojadi.

Matius 6:16

“Watu kaitn bolampah, jangan mato-muho kaitn kotiat'an salu'. Boko urakng inyo pompadah boi' molabuhan sama'an nantai. Sia' songajo bulah mato-muho sia' kotiat'an salu' oca' urakng bukai tohu obai sia' tongahan bolampah. Kotakng bondar inyo Aku pandiran ni'in: Sia' udah mondapat upah sia' doi' sosamo monsio.

Matius 6:3

Apo, timpu kaitn moonju' sumbakan pakai' urakng jaro, labuhan nantai socaro bototapu'.

Matius 6:5

“Watu kaitn bodoa, jangan sama'an boko urakng inyo pompadah boi'. Sia' gala' bodoa agatn bodiritn di hadapan urakng banya' di boko rumah sombayakng huatan di boko simpakng jalatn bosar. Sia' bodoa agatn caro nantai oca' urakng bukai moniant sia'. Kotakng bondar inyo Aku pandiran ni'in: Sia' udah bodapat upah sia' doi' sosamo monsio.

Matius 7:5

Urakng sama'an nantai urakng inyo pompadah boi' apo sobondarnyo hatinyo jahat. Hilakan holu'ai balok doi' mato kolai, hoyu' ulih moniant agatn jolas oca' ulih mohilakan kosimaian doi' mato somadikan kolai.”

Markus 12:39

Di rumah sombayakng huatan di boko pogai, sia' gala' dudu' di tompat inyo kotakng tohormat.

Markus 7:6

Timbas Yesus ko sia', “Kaitn bayo pompadah boi'. Watu joman komai, Nabi Yesaya udah momadahan pomandiran Allah mongona'i kaitn. Topat bondar pomandiran Allah ni'in: ‘Banso ni'in bayo momuji Aku agatn saro sia'. Apo hati sia' kinyo bobondar honda' monyonangan Aku.

Lukas 11:41

Jadi daripado bayo momborosihi tobi' luar pirikng-mangku' nian, onji'icam pomakatn inyo ado di dalapmnyo ko boko urakng jaro. Hoyu' kaitn bondar-bondar monyonangan hati Allah.

Lukas 11:43

Allah paca'an mohukupm kaitn boko urakng Farisi obai porbuatan kaitn samaꞌan ni'in. Di dalapm rumah sombayakng kaitn gala' dudu' di muka', tompat inyo tohormat. Di pasar pan kaitn honda' hala dipuji dihadapan urakng banyaꞌ.”

Lukas 12:33

Jadi, jualcam umputn kaitn. Ongko onju'cam duitnyo ko boko urakng jaro. Aman kaitn molabuhan hal nantai, samo sama'an kaitn bulah somacapm dompet di sorugo pakai' diri kaitn. Dompet nantai co rusa' somanah-manahnyo. Kodampuan di sorugo nantai, kinyo paca'an habis. Conyiant pongolit inyo ulih mongolitnyo. Conyiant gogat inyo ulih morusa'annyo.

Lukas 12:56

Ui boko urakng inyo gala' pompadah boi'! Agatn moniant awatn ongko angin, kaitn ulih mongotohu'i cuacanyo. Apo biar pan kaitn udah moniant boko porbuatan inyo udah Ku pulah di joman ni'in, kaitn pan totap co ulih mongotohu'i kohonda' Allah.

Lukas 13:15

Lalu Tuhatn Yesus bopandir ko io huatan somuo urakng inyo bopikir samo samaꞌan io, “Kaitn boko urakng inyo pompadah boi', apo sobondarnyo jahat! Sotiap ari, tomansu' Ari Sabat, kaitn molopasan sapi damo koledai doi' kandakannyo, mombaba'nyo ko luar oca' sia' ulih minum ara'i. Nantai pan pokoroja'an jam.

Lukas 20:46

“Boboi'cam oca' kaitn jangan sonjumpat'an porangai boko guru agama Yahudi. Sia' gala' hala bojalatn momakai jubah inyo panjakng oca' sia' kotiat'an pontikng. Sia' gala' dihormati di pasar. Sia' gala' dudu' di tompat inyo kotakng tohormat di rumah sombayakng, makatn di tompat inyo kotakng tohormat di pogai.

Lukas 6:24

Apo Allah tajahan mohukupm kaitn bayakan inyo dampu watu ni'in, obai kaitn udah mooso'i sonang-nyamanam di dunia ni'in.

Yohanes 13:29

Ado inyo monyangko Yesus monyiuh Yudas momboli boko hal inyo dipontikan pakai' morayaan pogai Paskah nantai damo monyiuh Yudas pakai' botula' moonju' la'apo pan ko urakng jaro. Sia' bopikir sama'an nantai obai Yudas inyo monyimpatn kas duit sia'.)

Yohanes 5:41

Aku co bogoyap pujian doi' monsio.

Yohanes 5:44

Nantai obai kaitn gala' hala bogoyap kohormatan doi' sosamo kaitn mo. Apo kaitn co kalo goyap pujian doi' Allah inyo satu-satunyo inyo bondar. Aman ubo nian, pasti kaitn co pocayo agatn Aku!

Yohanes 7:18

Urakng inyo mongajar agatn pomandiran doi' dirinyo siku', io bayo goyap kohormatan pakai' dirinyo siku'. Apo urakng inyo goyap kohormatan pakai' Sio inyo moutusnyo, urakng nantai bujur bondar. Io kinyo monipu urakng bukai.

Kisah Boko Rasul 10:2

Kornelius ongko somuo koluarganyo hala hidup taat agatn Allah. Kornelius opat moonji'i duit ko boko urakng jaro. Io pan hala bodoa ko Allah.

Kisah Boko Rasul 10:31

Kato molekat nantai, ‘Kornelius, Allah mondinga' doa kolai. Allah pan sonang obai kolai opat moonji'i duit ko boko urakng jaro.

Kisah Boko Rasul 10:4

Io kotakan gola', moniant molekat nantai. Io botakutn, “Ado la'apo Habakng?” Molekat nantai monimbas, “Kolai monyonangan Allah obai kolai sotia bodoa ko Sio. Kolai opat moonji'i duit ko boko urakng jaro. Boko hal nantai monjadi sama'an posombahan kolai ko Allah. Obai nantai, Allah moingant kolai.

Kisah Boko Rasul 11:29

Lopas jadi, mondinga' posatn nantai, somuo murid Yesus di Antiokhia momutusan pakai' monulukng boko somadikan nantai inyo tinggal di doerah Yudea. Sia' mongumpulan sumbakan. Sotiap urakng moonji'i sumbakan sobanya' mungkitn, sosuai agatn pongulihan siku'-monyiku'.

Kisah Boko Rasul 24:17

Somanah boboropo tohutn, aku cuku di Yerusalem. Apo duo bolas ari inyo udah ongko aku datakng agi' ko Yerusalem mombaba' sumbakan dana pakai' monulukng boko somadikan sobansoku. Aku pan honda' momposombahan boboropo kurbatn posombahan.

Kisah Boko Rasul 9:36

Kinyo jouh doi' santai di kota Yope ado siku' urakng botina'. Damonyo Tabita. (Dalapm baso Yunani damo nantai disobut Dorkas.) Dorkas nantai urakng inyo pocayo agatn Yesus. Io hala bulah koboi'an agatn urakng bukai. Io pan opat monulukng urakng jaro.

Roma 12:8

Aman ado urakng inyo dionji'i komampuan husus pakai' moonji'i somangant ko urakng bukai, io gola' moonji'i somangant. Urakng inyo dionji'i komampuan husus pakai' mombagi umputnnyo ko urakng bukai, io gola' molabuhan nantai agatn boi' hati. Urakng inyo dionji'i komampuan husus pakai' momimpitn, io gola' molabuhan nantai agatn rajitn. Urakng inyo dionji'i komampuan husus pakai' monunju'an kasih ko urakng bukai, io gola' molabuhan nantai agatn sonang.

1 Korintus 13:3

Soandainyo aku mombagi-bagian somuo kodampuan umputnku, apotolagi' aku rela monyorahan bukakng-tubuhku pakai' ditunu'i dalapm api, apo aku kinyo mongasihi urakng bukai, aku samo sokali co boguno.

Galatia 2:10

Sia' bayo momuhun oca' koi hala monulukng urakng jaro. Memang aku udah somombondarnyo honda' molabuhan nantai.

Efesus 4:28

Urakng inyo komainyo pongolit jangan mongolit agi'. Apo io gola' bokorojo koras agatn jarinyo siku', mombulah boko hal inyo boi', oca' io ulih monulukng urakng bukai inyo ado kopontikannyo.

1 Tesalonika 2:6

Koi pan co kalo bogoyap pujian doi' monsio boi' doi' kaitn honda' pan doi' urakng bukai. Koi ado hak pakai' monuntut la'apo inyo koi pontikan doi' kaitn obai koi ni'in rasul Kristus.

1 Timotius 6:18

Poringant'ancam sia' oca' sia' bulah koboi'an. Sia' gola' banya' molabuhan porbuatan boi'. Sia' gola' onsi' agatn urakng, hala bobagi doi' kodampuan sia' pakai' monulukng urakng bukai.

Filemon 1:7

Somadikanku! Kolai udah monyegaran hati boko urakng inyo husus umputn Allah. Obai kasih kolai nantai, jadi aku kotakan sonang bondar huatan hati ku botambah somangant.

Ibrani 13:16

Jangan kolupatn bulah koboi'an ongko monulukng urakng bukai, obai boko hal nantai samo sama'an kurbatn posombahan jam inyo monyonangan hati Allah.

1 Petrus 4:11

Aman ado urakng inyo dionji'i komampuan pakai' bopandir, io gola' bopandir monyampaian Pomandiran Allah. Aman ado urakng inyo dionji'i komampuan pakai' molayati urakng bukai, io gola' molayati agatn kokuatan inyo Allah onju' ko io. Pakaicam somuo komampuan kaitn oca' urakng bukai momuliaan Allah obai Yesus Kristus inyo bulah somuo nantai dapat tojadi. Sionam inyo mulia ongko bokuaso somanah-manahnyo. Amin!