Matius 5:46 - Porjanjian Boharu Torjomahan Baso Dilakng Soari-ari

⁴⁶ Aman kaitn mongasihi bayo boko urakng inyo mongasihi kaitn, nantai bukainyo sosuatu inyo istimewa sampai cucu' mondapat hormat. Obai boko ponagih pajak inyo jahat bulah ubo nian jam.

Matius 5:46 ပူးပေါင်းရင်းမြစ်များ

Matius 11:19

Lopas nian Ana' Monsio datakng. Sio makatn, Sio minum, apo sia' bopandir Sio urakng kaha', pomabu', ‘Kawal ponagih pajak huatan urakng bukai inyo bodosa.’ Apo sia' salah obai porbuatan urakng mombutian aman urakng nantai bondar-bondar bisi kopintar-corodi'an doi' Allah kata'an cado.”

Matius 18:17

Aman io kinyo honda' mondinga'an nosihat kaitn, sampaiancam pokaro nantai ko jomaat. Aman io kinyo honda' jam mondinga'an nosihat sia', ongko anggapcam io nantai urakng inyo kinyo mongonal Allah huatan ponagih pajak.

Matius 5:47

Aman kaitn monyampaian salapm bayo ko boko somadikan kaitn mo, nantai bukainyo porbuatan inyo lobih boi' doi' urakng bukai. Obai boko urakng inyo bolupm mongonal Allah bulah ubo nian jam.

Matius 6:1

“Boboi'cam timpu kaitn molabuhan porbuatan boi' inyo sosuai agatn agama. Jangan molabuhan porbuatan nantai di hadapan urakng oca' ditiat sia'. Obai aman kaitn bulah sama'an nian, Bopai kaitn di sorugo kinyo paca'an moonji'i upah ko kaitn obai porbuatan boi' nantai.

Markus 2:15

Timpu Yesus tongahan makatn di rumah Lewi, ado banya' ponagih pajak ongko boko urakng bukai inyo dianggap ulih masrakat bodosa, datakng tuyut makatn bosamo-samo agatn Yesus ongko boko murid-Nyo. Obai, banya' di antaro sia' tuyut Yesus.

Markus 2:16

Apo watu boko pomimpitn agama Yahudi doi' kolompok Farisi ongko boko guru agama Yahudi moniant Yesus makatn agatn ponagih pajak ongko boko urakng bodosa. Sia' bopandir ko boko murid Yesus, “Mapo Sio makatn bosamo agatn ponagih pajak ongko boko urakng bodosa?”

Lukas 15:1

Ado boko ponagih pajak huatan boko urakng bukai inyo dianggap kinyo boi' ulih masrakat. Biasonyo, sia' datakng mondingaꞌ Yesus mongajar.

Lukas 18:13

Apo ponagih pajak nantai bodiritn jouh doi' somuo urakng bukai. Io monundu'an kopala'nyo obai mooso kinyo cucu' monongadah ko sorugo. Io momantu-mantu dadonyo obai monyosali boko dosanyo. Io bopandir, ‘Oi, Allah. Tulukng kasihibo aku. Aku ni'inan urakng inyo bodosa!’ ”

Lukas 19:2

Ado siku' urakng kopala' ponagih pajak inyo bodiapm di santai. Damonyo Zakheus. Io kotakng dampu.

Lukas 19:7

Apo boko urakng inyo moniant Yesus botula' ko rumah Zakheus botuta'. Kato sia', “Uai! Sio monoluntukng di rumah urakng inyo bodosa.”

Lukas 3:12

Boko potugas ponagih pajak pomorintahan Romawi pan datakng ko Yohanes oca' sia' dibaptis. Sia' botakutn, “Guru, la'apo inyo gola' koi labuhan?”

Lukas 5:29

Ongko di rumahnyo, Lewi moadoan pogai pakai' Yesus. Banya' ponagih pajak ongko boko urakng bukai jumpat makatn sosamo agatn sia'.

Lukas 5:30

Apo boko urakng Farisi ongko boko guru agama Yahudi botuta'-bomamai. Sia' bopandir ko murid Yesus, “Ma'apo kaitn makatn-minum bokawal agatn ponagih pajak ongko boko urakng bukai inyo bodosa? Nian salah!”

Lukas 7:29

(Somuo urakng, tomansu' boko ponagih pajak inyo mondingaꞌ pomandiran Yesus, mongaku'i caro Allah bondar. Sia' nantai boko urakng inyo udah dibaptis Yohanes.

Lukas 7:34

Lopas nian Ana' Monsio datakng. Io makatn, minum, ongko sia' bopandir Io kaha', pomabu', kawal ponagih pajak ongko urakng bukai inyo bodosa.