Matius 23:5 - Porjanjian Boharu Torjomahan Baso Dilakng Soari-ari

⁵ Somuo inyo sia' labuhan bayo oca' urakng bukai mohormati sia'. Contohnyo: Kotak sombayakng inyo dikobat'an di koning huatan di longan, sia' mombosarannyo. Boko rumbai jubah, sia' pulah panjakng oca' kotiat'annyo lobih taat doi' urakng bukai.

Matius 23:5 ပူးပေါင်းရင်းမြစ်များ

Matius 9:20

Dalapm pojalatan ko su'utn, ado siku' urakng botina' inyo sakit pondarahan. Udah duo bolas tohutn manahnyo io boponyakit nantai. Io bopandir dalapm hatinyo, “Biar pan aku bayo moncama' rumbai jubah Yesus, pasti aku paca'an nyamanam!” Jadi, io mohampiki Yesus doi' bolikat ongko moncama' rumbai jubah-Nyo.

Lukas 16:15

Apo Yesus bopandir ko sia', “Kaitn bousaha oca' di hadapan urakng bukai kaitn kotiat'annyo boi' huatan hala bondar. Apo Allah tohu isi hati kaitn inyo sobondarnyo jahat. Banyaꞌ hal inyo dirogo'i ulih monsio, kinyo dirogo'i ulih Allah.

Lukas 20:47

Sia' mongolakari boko botina' balu pakai' mondapat'an boko kodampuan sia', sampai rumah sia' pan dikuti'. Sia' moucap'an doa inyo bokopanjakan, apo nantai bayo pompadah boi' ja'am. Obai somuo porangai sia' inyo jahat nantai, Allah pasti tajahan mohukupm sia' lobih borat doi' urakng bukai.”

Yohanes 12:43

Sia' lobih sonang dihormati boko monsio, daripado dihormati Allah.

Yohanes 5:44

Nantai obai kaitn gala' hala bogoyap kohormatan doi' sosamo kaitn mo. Apo kaitn co kalo goyap pujian doi' Allah inyo satu-satunyo inyo bondar. Aman ubo nian, pasti kaitn co pocayo agatn Aku!

Yohanes 7:18

Urakng inyo mongajar agatn pomandiran doi' dirinyo siku', io bayo goyap kohormatan pakai' dirinyo siku'. Apo urakng inyo goyap kohormatan pakai' Sio inyo moutusnyo, urakng nantai bujur bondar. Io kinyo monipu urakng bukai.

Filipi 1:15

Memang ado urakng inyo momboritoan mongona'i Kristus obai sia' tungi ia'an sia' honda' oca' boko urakng tuyut sia' daripado aku. Apo ado jam urakng inyo momboritoan mongona'i Kristus doi' hati inyo borosih.

Filipi 2:3

Jangan buhau ongko bogoyap pujian sia-sia. Apo, rondahancam hati kaitn. Anggap ja' urakng bukai lobih pontikng doi' kolai siku'.

2 Tesalonika 2:4

Apo sobolupm io dibonasoan, io paca'an molawatn somuo hal inyo monsio anggap sobagai allah huatan somuo hal inyo disombah monsio. Io paca'an momandiran obai io lobih bokuaso doi' somuo allah nantai. Malahan, io paca'an mansu' ko dalapm Rumah Allah. Io paca'an dudu' di santai ongko moaku'i obai io nantai Allah.