Matius 12:44 - Porjanjian Boharu Torjomahan Baso Dilakng Soari-ari

⁴⁴ Ongko, io bopandir, ‘Aku bobali' agi' ko urakng inyo udah aku tinggalan!’ Watu io sampai ko urakng nantai, io mondapat'an urakng nantai samo sama'an rumah inyo borosih huatan toatur, apo puakng.

Matius 12:44 ပူးပေါင်းရင်းမြစ်များ

Matius 12:29

Potimbakancam gambaran ni'in: Aman siku' urakng honda' momansu'i rumah urakng inyo kuat oca' morampas bando barakngnyo, pasti io gola' mongobat urakng inyo kuat nantai holu'ai. Hoyu' io ulih morampok rumah nantai.

Matius 12:43

Ongko Yesus mongajar agatn poumpamoan ni'in: “Aman roh jahat koluar doi' siku' urakng, roh nantai bokolilikng ko boko tompat inyo gorinsakng pakai' bogoyap tompat torahat. Apo io kinyo mondapat'annyo.

Matius 12:45

Ongko io botula', botomu agatn tujuh roh bukainyo inyo lobih jahat doi' io. Sia' somuo datakng, mansu' ko dalapm urakng nantai, ongko bodiapm di santai. Koponsuahannyo, koadaan urakng nantai monjadi lobih rusa' doi' inyo asalnyo. Nantaiam jam inyo paca'an tojadi agatn boko urakng jahat joman ni'in.”

Lukas 11:25

Watu io sampai ko urakng nantai, io monomu'i urakng nantai samo ubo rumah inyo borosih huatan toatur.

Yohanes 12:6

(Sobondarnyo, io bopandir ubo nantai bilonyo obai io honda' monulukng urakng jaro, apo obai io pongolit. Io inyo monjujut kantong pakai' duit inyo urakng bukai onju' pakai' polayatan Yesus. Huatan io hala mongolit doi' nantai.)

Yohanes 13:2

Jadi, watu nantai Yesus agatn boko murid-Nyo tongahan makatn malapm. (Sobolupm nantai, Rajo Sitatn udah bokorojo di dalapm hati Yudas Iskariot, ana' Simon. Rajo Sitatn mombulah oca' Yudas honda' monyorahan Yesus ko boko musuh-Nyo.)

Yohanes 13:27

Lopas Yudas monorima' roti nantai, Rajo Sitatn mansu' ko dalapm hatinyo. Lalu Yesus bopandir ko Yudas, “Labuhan copat cam hal apo inyo honda' kolai labuhan!”

1 Korintus 11:19

Memang gola' ado popisahan di antaro kaitn. Alasannyo oca' nononyo paca'an jolas sopo di antaro kaitn inyo tahatn uji.

Efesus 2:2

Watu nantai, caro hidup kaitn samo sama'an boko urakng di dunia ni'in inyo kinyo mongonal Allah. Kaitn tuyut Rajo Sitatn inyo bokuaso di langit di pucu' somuo kuaso jahat. Io ia'an roh inyo bokorojo dalapm hati boko urakng inyo kinyo monaati Allah.

1 Yohanes 2:19

Boko musuh Kristus nantai am boko urakng inyo udah koluar doi' kolompok kito. Apo, sobondarnyo sia' kinyo bobondar tomansu' kolompok kito inyo pocayo ko Yesus Kristus. Soandainyo sia' tomansu' kolompok kito, mungkitn sia' totap bosamo-samo agatn kito. Apo pas sia' moninggalan kito, hal nantai mombutian obai sia' somuo kinyo tomansu' kolompok kito.

1 Yohanes 4:4

Apo, boko poana'anku, kaitn boasal doi' Allah. Kaitn udah mongalahan boko nabi palsu nantai. Obai, Roh Allah inyo ado di dalapm diri kaitn lobih bokuaso daripado roh Musuh Kristus inyo ado di dalapm dunia.