Matius 10:23 - Porjanjian Boharu Torjomahan Baso Dilakng Soari-ari

²³ Aman kaitn didorako'i di sobuah kota, raricam ko kota inyo bukai. Dinga'anbo! Kaitn co paca'an jadi mondataki somuo kota di tanah Israel nantai sobolupm Ana' Monsio datakng.

Matius 10:23 ပူးပေါင်းရင်းမြစ်များ

Matius 16:27

Obai Ana' Monsio paca'an datakng agi' agatn kuaso Allah Bopai-Nyo huatan diiriki boko molekat-Nyo. Timpu nantai, Sio paca'an mombalas sotiap urakng sosuai agatn porbuatannyo.

Matius 16:28

Dinga'anbo, ado urakng di antaro kaitn somuo di si'itn inyo kinyo paca'an mati sobolupm moniant Ana' Monsio datakng agatn Korajaan-Nyo.”

Matius 2:13

Lopas jadi boko urakng majus nantai botula', molekat Tuhatn Allah datakng ko Yusuf dalapm mimpi. Molekat nantai bopandir, “Rajo Herodes paca'an monggoyapi Bobia' nantai oca' ulih mombunuh Sio. Jadi huascam, baba' Bobia' nantai agatn indai-Nyo pindah ko Mesir. Bodiapmcam di su'utn sampai Aku momandiran ko kolai pakai' bobali'.”

Matius 23:34

Pondinga'anbo! Aku moutus ko kaitn boko nabi, boko urakng pintar-corodi', huatan boko guru inyo moajaran Pomandiran Allah. Ado doi' sia' inyo paca'an kaitn bunuh. Sobagi'an doi' sia' paca'an kaitn hukupm mati di kayu salib. Inyo bukai paca'an kaitn sipat di boko rumah sombayakng kaitn. Inyo bukai agi' paca'an kaitn dorako'i doi' kota ko kota.

Matius 23:36

Dinga'ancam! Somuo urakng joman ni'in paca'an monanggukng hukupan doi' somuonyo nantai.”

Matius 24:27

Obai watu Ana' Monsio bobali' ko dunia ni'in, somuo urakng ulih moniant kodatakan nantai agatn jolas. Samo sama'an kilat momanjah doi' timur huatan bosinar sampai ko barat. Ubo nianam kodatakan ‘Ana' Monsio.’

Matius 24:30

Watu nantai, boko urakng paca'an moniant tando Ana' Monsio di langit. Somuo banso paca'an kotakng bulikng. Pas Ana' Monsio datakng di pucu' awatn, sia' paca'an moniant kuaso huatan komulia'an-Nyo.

Matius 24:34

Kotakan bondar inyo Ku pandiran ni'in: Kinyo somuo urakng doi' joman ni'in paca'an mati sobolupm somuonyo ni'in tojadi.

Matius 24:48

Apo, soumpamonyo hulutn tontai jahat, io paca'an bopandir di dalapm hatinyo,

Matius 25:13

Ubo nian jam paca'an tojadi agatn boko urakng inyo kinyo siap watu Aku datakng agi'. Obai nantai, bojago-jagocam, obai kaitn co tohu ari damo japmnyo.”

Matius 26:64

Timbas Yesus, “Ubo kato kaitn nam. Apo porotian ja' ni'in! Mula'i doi' watu ni'in, kaitn paca'an moniant Ana' Monsio, dudu' di tompat inyo tohormat disopia' kanan Allah Inyo Kotakan Bokuaso. Kaitn paca'an moniant-Nyo datakng doi' sorugo di pucu' boko awatn.”

Matius 4:12

Lopas nantai, Yesus mondinga' obai Yohanes dimansu'an ko dalapm ponjara. Jadi, Yesus moninggalan doerah Yudea ongko bobali' ko doerah Galilea.

Markus 13:26

Timpu nantai, boko urakng tajahan moniant Ana' Monsio datakng di pucu' awatn. Io tajahan monunju'an kuaso huatan komulia'an-Nyo.

Lukas 18:8

Aku bopandir ko kaitn: Allah pasti janjakng molabuhan la'apo inyo adil pakai' sia'. Apo watu Ana' Monsio datakng bobali' ko dunia ni'in, bolupm pasti apobai Io monomu'i banya' urakng inyo totap pocayo ko Io.”

Lukas 21:27

Timpu nantai, urakng paca'an moniant Ana' Monsio paca'an datakng bobali' ko dunia ni'in, turutn doi' sorugo di pucu' awatn. Io paca'an bocohayo torakng. Io paca'an kotakan bokuaso.

Yohanes 7:1

Lopas jadi nantai, Yesus bojalatn mongoliliki doerah Galilea. Sio co honda' ko doerah Yudea obai boko pomimpitn agama Yahudi di santai honda' mombunuh Sio.

Kisah Boko Rasul 17:10

Pado malapm nantai, boko somadikan di santai hagar monyiuh Paulus ongko Silas botula' ko kota Berea. Di su'utn, sia' duo botula' ko rumah sombayakng urakng Yahudi.

Kisah Boko Rasul 17:14

Obai nantai, boko urakng pocayo di su'utn hagar moonju'an Paulus ko doerah pantai lout. Apo Silas ongko Timotius totap tinggal di Berea.

Kisah Boko Rasul 20:1

Lopas boko urakng di kota Efesus langunt am, Paulus mongumpulan boko urakng pocayo. Io monulukng oca' sia' pocayo ko Yesus agatn lobih yakitn, ongko bopadah pulakng. Lopas nantai, io botula' ko propinsi Makedonia.