Markus 3:2 - Porjanjian Boharu Torjomahan Baso Dilakng Soari-ari

² Boko urakng Farisi kotakan borotian Yesus, honda' moniant aman Sio tajahan monyamani urakng nantai. Monurut sia', nantai tomansu' pokoroja'an inyo culih dilabuhan watu ari Sabat. Jadi, nononyo sia' ulih monyalahan Sio.

Markus 3:2 ပူးပေါင်းရင်းမြစ်များ

Lukas 14:1

Timpu Ari Sabat, Yesus makatn sosamo agatn boboropo urakng guru agama Yahudi huatan boboropo urakng pomimpitn agama doi' kolompok Farisi. Sia' makatn di rumah salah siku' urakng pontikng doi' kolompok Farisi nantai. Somuo urakng Farisi ongko guru inyo ado di santai borotian Yesus agatn toliti, pakai' bogoyap kosalahan-Nyo.

Lukas 6:7

Di santai ado boko guru agama Yahudi ongko boko urakng doi' golokan Farisi. Sia' borotian Yesus pakai' monggoyap kosalahan-Nyo, oca' ulih monuduhan kosalahan ko Yesus monurut poraturan Agama. Jadi sia' totap borotian apobai Sio monyamani urakng nantai watu ari sabat.

Lukas 20:20

Jadi, boko guru agama Yahudi huatan boko imam kopala' bogoyap caro oca' sia' ulih mombaba' Yesus ko gubernur Romawi pakai' dihukupm. Lalu sia' hala borotian Yesus. Malahan sia' moncubo bulah gogadatn pakai' Sio. Sia' moutus boboropo urakng ko Yesus pakai' botakutn ubonyo tujuannyo boi', apo sobondarnyo sia' honda' oca' Yesus mongatoan sosuatu inyo salah.

Yohanes 9:16

Sobagi'an doi' kolompok urakng Farisi nantai bopandir, “Urakng nantai co datakng doi' Allah. Obai, Sio co monaati Ari Sabat.” Apo inyo bukai bopandir, “Co mungkitn siku' urakng bodosa tohu bulah boko mujisat samo sama'an inyo udah Sio pulah!” Jadi ado posolisihan di antaro sia'.

Matius 12:10

Di santai ado urakng inyo longannyo mati sopia'. Boko urakng Farisi nantai bogoyap kosalahan Yesus, oca' ulih monuduh-Nyo. Jadi, sia' botakutn ko Yesus, “Ulih cado monyamani urakng watu Ari Sabat?”

Markus 3:3

Yesus bopandir ko urakng inyo longannyo mati sopia' nantai, “Mara, bodiritncam ko tongah!”

Yohanes 8:6

(Sia' botakutn ubo nantai pakai' moncubo'i Sio oca' sia' ulih monyalahan Sio socaro hukupm.) Apo Yesus mombungku'an bukakng-tubuh Sio, lalu monulis agatn jari-Nyo di tanah.