Markus 13:9 - Porjanjian Boharu Torjomahan Baso Dilakng Soari-ari

⁹ Kaitn gola' boboi' obai kaitn tajahan ditangkap lalu dibaba' ko sidakng pomimpitn agama pakai' dipokaroan. Kaitn tajahan dipoduda'an diboko rumah sombayakng. Obai kaitn nantai murid-Ku, obai nianam kaitn tajahan dibaba' ko boko ponguaso huatan ko boko rajo pakai' dipokaroan jam. Apo, nianam watunyo pakai' kaitn bosasi mongona'i Aku.

Markus 13:9 ပူးပေါင်းရင်းမြစ်များ

Yohanes 16:2

Paca'an ado boko urakng inyo monundukng kaitn doi' rumah sombayakng urakng Yahudi. Nononyo, boko urakng inyo mombunuh kaitn paca'an monyangko sia' molayati Allah agatn molabuhan nantai.

Markus 13:5

Timbas Yesus ko sia', “Boboi'cam! Jangan sampai kaitn monjumpati boko urakng inyo salah.

Wahyu 2:13

Aku tohu obai kota kaitn ia'an tompat tahta Rajo Sitatn. Apo kaitn totap sotia ko aku. Somadikan Antipas momboritoan mongona'i Aku agatn sotia. Sio dibunuh di kota kaitn, ia'an nantai kota tompat kodiapan Rajo Sitatn. Biar pan ubo nantai, watu nantai kaitn totap moaku'i obai kaitn pocayo ko Aku.

Wahyu 2:10

Jangan gola' biar pan co manah agi' kaitn paca'an ajab sonsaro. Porotiancam, Rajo Sitatn paca'an moncubo mombulah sobagi'an doi' kaitn oca' co pocayo ko aku agi'. Kaitn paca'an ditikapan ko dalapm ponjara lalu didorako'i sopuluh ari manahnyo. Apo kaitn gola' sotia ko aku, biar pan sampai mati. Lalu, Aku paca'an moonji'i ko kaitn kohidupan kokal di sorugo.

Wahyu 1:9

Aku, Yohanes, somadikan kaitn inyo sonasib agatn kaitn, inyo bosamo ajab sonsaro agatn warga Koraja'an Allah, huatan bosamo botahatn mohadapi ajab sonsaro kapikng monantian Yesus. Aku udah momboritoan Pomandiran doi' Allah ongko boko hal inyo Yesus padahan ko aku. Obai nantaiam, aku dibuakan ko sobuah pulau inyo bodamoan Patmos.

2 Tesalonika 1:5

Nantaiam butinyo obai Allah moadili monsio agatn adil. Kaitn dianggap cucu' monjadi warga Koraja'an Allah. Nianam alasan kaitn ajab sonsaro obai kaitn hidup di Koraja'an Allah nantai.

Filipi 1:29

Obai, Allah udah moonji'i kosompatan ko kaitn bukainyo bayo pakai' pocayo ko Kristus, apo pakai' mondorita' obai Kristus jam.

Kisah Boko Rasul 21:11

Io mohampiki koi pakai' monyampaian posatn doi' Allah. Io monguti' ikat pinggakng Paulus, ongko mongobat kaki ongko longannyo siku'. Katonyo, “Roh Allah bopandir obai urakng umputn ikat pinggakng ni'in paca'an dikobat agatn caro inyo samo. Boko urakng Yahudi di Yerusalem paca'an mongobat io. Ongko sia' paca'an monyorahan io ko boko urakng inyo bukainyo Yahudi oca' io dihukupm.”

Kisah Boko Rasul 9:16

Obai io momboritoan mongona'i Aku, io paca'an moalapi banya' ajab sonsaro. Aku siku' paca'an monunju'an ko io mongona'i ajab sonsaro nantai.”

Kisah Boko Rasul 7:54

Watu boko pomimpitn Yahudi mondinga' somuo nantai, sia' bokorit gigi kotakan godi.

Yohanes 15:20

Ingantcam pomandiran-Ku ni'in ko kaitn komai: Siku' urakng hulutn kinyo lobih pontikng doi' habakngnyo. Aman sia' udah mondorako'i Aku, jadi sia' pan paca'an mondorako'i kaitn. Apo aman sia' monuruti pomandiran-Ku, jadi sia' pan paca'an monuruti pomandiran kaitn.

Lukas 9:5

Apo aman kaitn ditula' boko urakng disobuah kota, koluar ja'am doi' kota nian. Borosihi jam dobu doi' tampo kaki kaitn. Nian pakai' momporingant'i sia' inyo tajahan dihukupm Allah, obai monula' posatn mongonaꞌi Koraja'an Allah inyo kaitn sampaian.”

Markus 6:11

Apo aman kaitn kinyo ditorima' boko urakng di sobuah laman, aman sia' co honda' mondinga'an kaitn, koluar ja'am doi' laman nantai. Tata'an dobu doi' kaki kaitn pakai' momporingant'i sia'.”

Markus 1:44

Kato-Nyo, “Jangan mongisahan hal ni'in ko sopo pan. Apo, botula'cam ko imam holu'ai. Minto io moriso'i kolai udah nyamanam. Lopas nantai, onju' posombahan sosuai agatn porintah Musa pakai' monjadi buti ko urakng bukai, kolai bondar-bondar udah nyamanam.”

Matius 5:22

Apo Aku moonju' porintah ni'in ko kaitn: Sotiap urakng inyo godi agatn somadikannyo gola' dihukupm. Sotiap urakng inyo mohayam somadikannyo gola' dibaba' ko hadapan kolompok pomimpitn agama Yahudi inyo kotakan bokuaso pakai' dihukupm. Sotiap urakng inyo moningkau urakng bukai budu paca'an dihukupm dalapm api noraka.

Markus 13:8

Banso tajahan boparakng molawatn banso inyo bukai. Negara molawatn negara inyo bukai. Di mono-mono tajahan ado kolaparan huatan gompa bumi. Apo somuo hal nantai bayo pomula'an doi' somuo ajab sonsaro inyo tajahan tojadi. Samo sama'an indai inyo buntikan mooso podih watu mohidap-porut honda' boana'an.

2 Yohanes 1:8

Obai nantai, jagocam diri kaitn oca' kaitn co sosat. Koi udah bokorojo molayati oca' kaitn pocayo agatn ajaran inyo bondar. Jangan sampai kaitn kohilakan hasil pokoroja'an koi nantai. Bousahacam oca' kaitn totap monorima' upah kaitn doi' Allah.