Lukas 9:41 - Porjanjian Boharu Torjomahan Baso Dilakng Soari-ari

⁴¹ Ongko Yesus bopandir ko somuo sia', “Urakng di joman ni'in sosat ongko kinyo pocayo! Apo ija' manahnyo Aku gola' bosamo agatn kaitn?! Apo ija' manahnyo Aku gola' bosabar agatn kaitn!” Ongko Yesus bopandir ko Bopai bobia' nantai, “Baba' ana' kolai nantai ko si'itan.”

Lukas 9:41 ပူးပေါင်းရင်းမြစ်များ

Matius 11:28

Datakngcam ko Aku, somuo kaitn inyo uyuh jorih monanggukng boko kosusahan inyo borat. Aku paca'an moonji'i sonang-nyaman ko kaitn.

Matius 12:39

Apo timbas Yesus ko sia', “Boko urakng di joman ni'in kotakng jahat ongko kinyo sotia ko Allah. Sia' monuntut suatu tando. Apo bayo sobuti' inyo paca'an dionji'i ko sia', bayo mujisat sama'an inyo tojadi ko Nabi Yunus timpu joman komai.

Matius 12:45

Ongko io botula', botomu agatn tujuh roh bukainyo inyo lobih jahat doi' io. Sia' somuo datakng, mansu' ko dalapm urakng nantai, ongko bodiapm di santai. Koponsuahannyo, koadaan urakng nantai monjadi lobih rusa' doi' inyo asalnyo. Nantaiam jam inyo paca'an tojadi agatn boko urakng jahat joman ni'in.”

Matius 16:4

“Boko urakng di joman ni'in kotakan jahat ongko kinyo sotia ko Allah. Sia' monuntut suatu tando. Apo bayo sobuti' inyo paca'an dionju' ko sia', bayo mujisat sama'an inyo tojadi ko Nabi Yunus timpu joman komai.” Lopas nantai, Yesus botula'am moninggalan sia'.

Matius 17:17

Lalu, Yesus bopandir, “Urakng timpu joman ni'in jahat huatan kinyo pocayo! Ija' apo manah agi', Aku gola' bosamo agatn kaitn! Ija' apo manah agi', Aku gola' bosabar agatn kaitn!” Lalu Yesus bopandir ko Bopai bobia' nantai, “Baba' ana' kolai nantai ko si'itn.”

Matius 23:36

Dinga'ancam! Somuo urakng joman ni'in paca'an monanggukng hukupan doi' somuonyo nantai.”

Matius 3:7

Apo banya' jam pomimpitn agama Yahudi pan datakng pakai' dibaptis. Ado doi' kolompok Farisi huatan kolompok Saduki. Watu Yohanes moniant sia', io bopandir, “Oi kaitn inyo jahat huatan licik sama'an ular biso! Jangan bopikir kaitn ulih morarian diri doi' hukupan Allah nononyo.

Markus 10:14

Yesus godi moniant boko murid-Nyo molabuhan nantai. Kato-Nyo ko sia', “Biaran nam boko bobia' datakng ko aku! Jangan morarakng sia'. Obai, boko urakng sama'an nianam inyo monjadi anggota koluarga Koraja'an Allah.

Markus 10:49

Yesus botongga' huatan bopandir, “Tingkau am io!” Ongko, sia' moningkau urakng buto nantai. Kato sia' ko io, “Lolangunt! Bodiritn cam, Yesus moningkau kulo!”

Markus 9:19

Ongko, Yesus bopandir ko sia', “Oi boko urakng inyo kinyo pocayo. Apo ija' manahnyo Aku gola' bosamo agatn kaitn agi'? Boropo manah agi' Aku gola' sabar agatn kaitn! Baba' bobia' nian ko si'itn.”

Lukas 8:25

Yesus monogur sia'. Kato-Nyo, “Kaitn gola' boiman inyo lobih kuat!” Sia' gola' huatan topocongo jam. Ongko bopandir ko siku'-monyiku', “Urakng ni'in kotakan luar biaso. Pas Sio mohakap, angin bonakau ongko golumbakng bosarpan botongga'.”

Lukas 9:40

Udaham aku mominto tulukng ko boko murid Duatn oca' monundukng roh jahat nantai, apo culih sia'.”

Lukas 9:42

Watu bobia' nantai mohampiki Yesus, roh jahat monyorakng bobia' nantai, mohompasannyo ko tanah, bokorikng-korikng bukakng-tubuhnyo. Apo Yesus monundukng roh jahat nantai koluar, lansukng bobia' nantai nyamanam ongko disorahan agi' ko bopainyo.

Yohanes 14:9

Timbas Yesus ko io, “Filipus, Aku udah cukup manah bosamo kaitn. Hibo sampai watu ni'in kolai bolupm mongonal Aku? Urakng inyo udah moniant Aku, rotinyo udah moniant Bopai jam. Jadi, hibo kolai bopandir sama'an nantai, ‘Pulah oca' koi ulih moniant Bopai agatn mato koi sikuꞌ’?

Yohanes 20:27

Lalu, Sio bopandir ko Tomas, “Tiatbo jari-Ku. Gahapan jari kolai di si'itn. Uluran longan kolai, huatan gahapam di porut-Ku. Jangan gangga'-gua'an agi' apo pocayocam!”

Kisah Boko Rasul 13:18

Lopas nantai, somanah ompat puluh tohutn sia' bodiapm di padakng pasir. Somanah nantai, sia' opat molawatn Allah. Apo Allah totap sabar agatn koulahan sia' nantai.

Kisah Boko Rasul 2:40

Petrus bisi banya' pomandiran inyo bukai agi' pakai' monguat'an hati sia' huatan moingant'an sia'. Katonyo, “Allah tajahan monjatu'an hukupan ko boko urakng joman ni'in inyo jahat. Culih hala sonjumpat'an sia' oca' kaitn disolamant'an doi' hukupan nantai.”

Roma 2:4

Allah kotakan boi' huatan sabar ko kaitn. Sio kinyo lansukng mohukupm kaitn. Jangan moanggap koboi'an-Nyo nantai kinyo borogo? Kaitn gola' mongoroti obai Allah monunju'an koboi'an-Nyo ko kaitn obai Sio honda' oca' kaitn moninggalan boko dosa kaitn.

Ibrani 3:19

Jadi, udah jolas angki-bayatn kito nantai kinyo ulih mansu' obai sia' kinyo pocayo.

Ibrani 4:11

Obai nantai, mara kito bousaha oca' kito ulih mansu' ko dalapm tompat torahat nantai. Jangan sampai ado urakng di antaro kito inyo culih mansu' obai io tuyut toladatn sia' doi' joman komai inyo kinyo taat ko Allah.

Ibrani 4:2

Obai, Kabar Boi' nantai udah dipadahan ko kito samo sama'an ko angki-bayatn kito komai. Apo, borito nantai kinyo boguno pakai' sia' obai sia' kinyo pocayo watu mondinga'nyo.

Ibrani 7:25

Obai nantai, Sio sanggup monyolamant'an somuo urakng agatn sompurna inyo datakng ko Allah molalu'i Sio. Sio hala hidup pakai' monjadi Porontaro inyo momuhun ko Allah pakai' sia'.