Lukas 23:26 - Porjanjian Boharu Torjomahan Baso Dilakng Soari-ari

²⁶ Lalu, boko projurit mombaba' Yesus ko luar kota pakai' mohukupm-Nyo sampai mati. Watu sia' tongahan bojalatn, ado siku' urakng lolaki honda' mansu' kota Yerusalem nantai. Damonyo Simon, doi' kota Kirene. Boko projurit nantai monangkap io, momoso io momikul kayu salib, ongko bojalatn di bolikat Yesus.

Lukas 23:26 ပူးပေါင်းရင်းမြစ်များ

Matius 5:41

Aman ado urakng inyo momoso kaitn bojalatn sojouh so pal, bojalatncam bosamo agatn io sojouh duo pal.

Lukas 14:27

Urakng inyo honda' tuyut Aku gola' siap mohadapi ajab sonsaro, apotolagi' sampai mati. Nian samo samaꞌan urakng inyo paca'an dihukupm mati, io gola' momikul kayu salibnyo siku'. Aman io kinyo siap mohadapi ajab sonsaro, io culih monjadi murid-Ku.

Lukas 23:25

Biar pan Barabas ditamoan ko dalapm ponjara obai bulah korusuhan huatan pombunuhan, Pilatus totap molopasan Barabas, lalu monyiuh boko projuritnyo pakai' mohukupm mati Yesus di kayu salib obai nantai kohonda' boko urakng banyaꞌ.

Lukas 9:23

Lopas nian Yesus bopandir ko somuo urakng inyo ado di santai, “Aman ado di antaro kaitn inyo bondar-bondar honda' monjadi murid-Ku, io gola' moninggalan kohonda' dirinyo siku'. Sotiap ari, io gola' bojago-jago huatan bosodia monanggukng bobatn, ongko bosodia mohadapi ajab sonsaro ongkopan sampai mati. Nian samo ubo urakng inyo dihukupm mati gola' momikul kayu salibnyo. Boko murid-Ku gola' samaꞌan nian jam huatan hala monumpakng la'apo inyo udah Aku labuhan.

Kisah Boko Rasul 13:1

Di antaro boko urakng inyo pocayo Yesus di Antiokhia, ado boko nabi inyo monyampaian posatn Allah huatan boko pongajar inyo mongajar mongona'i Yesus. Sia' nantai Barnabas, Simeon (inyo jam disobut ‘Urakng Hitapm’), Lukius (inyo boasal doi' kota Kirene), Manahem (inyo dibosaran bososamo agatn Gubernur Herodes), ongko Saulus.

Kisah Boko Rasul 2:10

Tomansu' jam doerah Frigia, Pamfilia, Mesir, huatan boko bagian Libia inyo dampikng kota Kirene. Ado jam inyo datakng doi' ibu kota Roma,

Kisah Boko Rasul 6:6

Tujuh urakng ni'in dibaba' ko boko rasul. Boko rasul bodoa kapikng molota'an jarinyo ko kotujuh urakng nantai. Nianam caro sia' disiuh pakai' molabuhan tugas nantai.

Kisah Boko Rasul 6:9

Apo ado kolompok urakng Yahudi inyo molawatn io. Sia' doi' kolompok urakng inyo dibebasan. Anggota kolompok nantai ia'an pondudu' Yerusalem inyo datakng doi' kota Kirene, kota Aleksandria, propinsi Kilikia, ongko propinsi Asia. Sia' botikakng agatn Stefanus,