Lukas 22:29 - Porjanjian Boharu Torjomahan Baso Dilakng Soari-ari

²⁹ Jadi, Aku paca'an moonju' kuaso ko kaitn pakai' momorintah dalapm Koraja'an Allah, samo samaꞌan Bopai-Ku moonju' kuaso ko aku pakai' monjadi Rajo inyo momorintah somuo Korajaan-Nyo.

Lukas 22:29 ပူးပေါင်းရင်းမြစ်များ

Matius 24:47

Pasti, habakngnyo paca'an moangkat io agi' monjadi pongurus somuo inyo umputn habakngnyo.

Matius 25:21

Lalu, habakngnyo nantai bopandir ko io, ‘Boi'am! Kolai hulutn inyo boi' huatan sotia. Obai nantai kolai dapat dipocayo agatn urusan inyo kocit, jadi aku paca'an moonju' kuaso ko kolai pakai' urusan inyo bosar agi'. Mara mansu'. Bosonang-sonang bosamo agatn aku!’

Matius 25:34

Lalu, sobagai Rajo, Sio paca'an bopandir ko boko urakng di sopia' kanannyo, ‘Maracam, kaitn inyo diborokati ulih Bopai-Ku! Mansu'cam ko dalapm Koraja'an inyo disodiaan pakai' kaitn tangga'i dunia dipulah.

Matius 28:18

Yesus mohampiki sia' huatan bopandir, “Allah udah moonji'i kuaso ko Aku di sorugo ongko di bumi.

Matius 5:10

Diborokaticam urakng inyo didorako'i obai hidup bondar di hadapan Allah. Sia' diborokati obai sia' nantai anggota koluarga Koraja'an Sorugo!

Matius 5:3

“Diborokaticam urakng inyo jaro di hadapan Allah, obai sia' nantai anggota koluarga Koraja'an Sorugo!

Lukas 12:32

“Kaitn samaꞌan kabatn domba inguan inyo kocit. Apo, jangan gola'. Bopai kaitn inyo di sorugo paca'an sonang moonji'i kaitn somuo la'apo inyo kaitn pontikan obai kaitn hidup dalapm Korajaan-Nyo.

Lukas 19:17

Jadi, habakng nantai bopandir, ‘Boi' bondar! Kolai hulutn inyo boi'. Obai kolai suba' dipocayo agatn boko hal inyo kocit, aku moangkat kolai monjadi ponguaso disopuluh kota.’

1 Korintus 9:25

Ubo nian jam, somuo urakng inyo tuyut dalapm potandikan gola' mongondalian diri dalapm somuo hal pakai' bolatih koras. Sia' molabuhan nantai pakai' mondapat'an hadiah. Hadiah sia' kinyo tahatn manah. Apo kito inyo pocayo mongondalian diri dalapm somuo hal oca' bodapat hadiah inyo kinyo paca'an rusa' somanah-manahnyo.

2 Korintus 1:7

Koi yakitn obai kaitn paca'an botahatn. Koi co gangga'-gua'an mongona'i nantai obai koi tohu ni'in: samo sama'an kaitn mohadapi pondorita'an, ubo nantai jam hati kaitn paca'an dikuatan.

Yakobus 2:5

Boko somadikan inyo ku kasihi! Dinga'anbo ni'in! Allah momilih boko urakng jaro di dunia pakai' monjadi urakng inyo bondar-bondar konal agatn Sio. Obai sia' pocayo ko Yesus, jadi sia' monjadi ahli waris Koraja'an Allah. Nantaiam kodampuan inyo Allah janjian ko somuo urakng inyo mongasihi Sio.

1 Petrus 5:4

Lalu, watu Kristus datakng, ia'an Gombala inyo moirikan somuo gombala, jadi kaitn paca'an mondapat'an mahkota inyo mulia. Mahkota nantai kinyo hilakng komulia'annyo.

Wahyu 21:14

Dindikng kota nantai jam ado duo bolas batu pondasi. Di sotiap batu nantai totulis damo doi' koduo bolas rasul Ana' Domba nantai.