Lukas 22:19 - Porjanjian Boharu Torjomahan Baso Dilakng Soari-ari

¹⁹ Lopas nantai Yesus monguti' roti. Lopas jadi bodoa sukur agi', Sio momingkai'-mingkai' roti nantai agatn jari-Nyo lalu moonju'nyo ko sia'. Kato-Nyo, “Ni'innam bukakng-tubuh-Ku inyo paca'an Ku sorahan pakai' kaitn. Pulahcam ni'in torus-monorus pakai' monggonang Aku.”

Lukas 22:19 ပူးပေါင်းရင်းမြစ်များ

Matius 14:19

Lalu Sio monyiuh boko urakng nantai dudu' di pucu' rumput. Lopas nian, Yesus monguti' lima' pingkai' roti agatn duo iku' ikatn nantai, monongadah ko langit, moucap torima' kasih ko Allah. Lalu Sio momingkai'-mingkai' roti nantai, dionju'nyo ko boko murid-Nyo oca' di pombagian ko boko urakng banya' nantai.

Matius 15:36

Lopas nian, Yesus monguti' tujuh pingkai' roti ongko boboropo ikatn nantai lalu moucap'an torima' kasih ko Allah. Sio momingkai'-mingkai' roti ongko ikatn nantai, lalu dionju'nyo ko boko muridnyo oca' dipombagian ko boko urakng banya' nantai.

Lukas 22:17

Lopas nantai Yesus monguti' socangkir anggur, lalu bodoa bosukur ko Allah. Lopas nian Sio bopandir, “Kuti'cam ni'in, lalu pombagi-bagiancam.

Lukas 22:20

Lopas sia' jadi makatn, lalu, agatn caro inyo samo agatn roti nantai, Yesus moonju' socangkir anggur agi' ko sia' kapikng bopandir, “Socangkir anggur ni'in mowakili darah-Ku inyo tajahan ditumpahan pakai' kaitn watu Aku mati. Darah ni'in moresmian Porjanjian Boharu inyo Allah pulah agatn monsio.

Lukas 24:30

Watu Sio dudu' makatn sosamo agatn sia', Sio monguti' roti. Lopas jadi moucap'an doa sukur, Sio momingkai'-mingkai' roti nantai agatn jari-Nyo ongko moonju'nyo ko sia'.

Yohanes 6:23

Lopas nantai ado boboropo porohu inyo datakng doi' kota Tiberias. Boko porohu nantai datakng ko dampikng tompat Tuhatn Yesus moonji'i roti ko boko urakng banya' somamannyo lopas jadi Sio moucap'an torima' kasih ko Allah.

Yohanes 6:51

Aku ninam roti hidup inyo udah turutn doi' sorugo. Urakng inyo bopua' roti ni'in paca'an hidup somanahnyo. Roti ninam isi-Ku inyo paca'an Ku sorahan pakai' boko urakng di dunia oca' sia' ulih hidup inyo sobondarnyo.”

1 Korintus 10:16

Watu kito morayaan Porjamuan Tuhatn, kito minum anggur ongko bosukur ko Allah. Nantai monunju'an obai kito bosokutu agatn darah Kristus. Huatan watu kito mombagi-bagian roti pakai' dipua'i sosamo, nantai monunju'an obai kito bosokutu agatn bukakng-tubuh Kristus.

1 Korintus 10:4

Somuo sia' minum ara'i inyo samo doi' Allah. Ara'i nantai hala mancur doi' batu. Sobondarnyo Kristus ia'an batu nantai obai Sio hala molinduki huatan momborokati sia' urakng Israel nantai.

Galatia 1:4

Yesus monyorahan diri-Nyo huatan mati di kayu salib. Agatn porbuatan nantai, Sio monyolamant'an kito doi' hukupan boko dosa kito. Sio molabuhan nantai pakai' monyolamant'an kito doi' kojahatan inyo ado di joman ni'in jam. Somuo nantai tojadi sosuai agatn kohonda' Allah.

Efesus 5:2

Kaitn gola' mongasihi urakng bukai samo sama'an Kristus udah mongasihi kaitn ia'an Sio monyorahan diri-Nyo monjadi kurbatn posombahan pakai' monanggukng hukupan dosa kito. Sio monjadi posombahan harupm inyo monyonangan Allah.

1 Tesalonika 5:18

Bosukurcam ko Allah dalapm somuo hal. Obai nantaiam kohonda' Allah pakai' kaitn di dalapm Kristus Yesus.

Titus 2:14

Yesus monyorahan diri sampai mati. Agatn caro nantai, Sio mombebasan kito doi' boko kojahatan. Sio jam bulah kito borosih doi' boko dosa kito oca' kito monjadi boko urakng umputn Sio siku', ia'an boko urakng inyo bondar-bondar totap hala bulah koboi'an.

1 Petrus 2:24

Kristus siku' pan udah monanggukng hukupan dosa kito watu Sio mati di kayu salib. Sio molabuhan nantai oca' kito jangan bulah dosa agi', oca' kito dapat hidup agatn caro inyo bondar di hadapan Allah. Obai boko luko Kristus, kaitn monjadi nyamanam.