Lukas 2:47 - Porjanjian Boharu Torjomahan Baso Dilakng Soari-ari

⁴⁷ Ado jam boko urakng bukai di santai bondinga'an pomandiran Yesus dalapm boko soal-jawab agatn boko guru agama nantai. Hiratn sia' somuo, mondingaꞌ boko jawaban Yesus, obai pongorotian-Nyo kotakng dalapm.

Lukas 2:47 ပူးပေါင်းရင်းမြစ်များ

Matius 13:54

Sio bobali' ko laman-tompu' tompat asal-Nyo lalu mongajar boko urakng di santai, di rumah sombayakng sia'. Lalu sia' hiratn. Kato sia', “Doi' mono Urakng ni'in bodapat kopintar-corodi'an sama'an nantai. Doi' mono Sio bodapat kuaso ongko mombulah mujisat ubo nantai?

Matius 22:33

Timpu urakng banya' mondinga' ponjolasan Yesus nantai, sia' topocongo bondar agatn ajaran-Nyo.

Matius 7:28

Lopas Yesus jadi mongajar somuonyo nantai, urakng banya' inyo mondinga'an pomandiran-Nyo mooso hiratn.

Markus 1:22

Sia' hiratn mondinga'an Sio mongajar. Obai, Sio mongajar agatn kuaso doi' Allah, kinyo samo sama'an boko guru agama Yahudi.

Markus 11:18

Boko imam kopala' agatn boko guru agama Yahudi mondinga' mongona'i hal nantai. Sia' gola' agatn Sio obai somuo urakng hiratn agatn ajaran-Nyo. Jadi, sia' bogoyap caro pakai' mombunuh Sio.

Markus 6:2

Watu ari Sabat, Yesus mongajar di rumah sombayakng. Timpu boko urakng mondinga' ajaran-Nyo, sia' hiratn bondar. Kato sia', “Doi' mono Urakng ni'in mondapat'an pongotohuan pakai' mongajar sama'an nian? Doi' mono Sio mondapat'an kuaso pakai' mombulah boko mujisat? Padohal, Sio bayo urakng biaso mo. Sio ni'in ana' doi' tukakng kayu. Indai-Nyo bodamo Maria. Boko somadikan-Nyo Yakobus, Yoses, Yudas ongko Simon. Boko somadikan-Nyo inyo botina' ado bosamo kito jam. Jadi, doi' mono Io mondapat somuo pongotohuan ongko kuaso nantai?” Jadi, sia' monula' Sio.

Lukas 2:18

Boko urakng somuonyo hiratn mondingaꞌ kisah boko pongombolo domba nantai.

Lukas 2:46

Koponsuahannyo, lopas tigo ari monggoyapi, sia' monomuan Yesus di tongahlamanan Rumah Allah. Yesus tongahan dudu' agatn boko guru agama Yahudi mondingaꞌan pongajaran sia', huatan botakutn ko sia'.

Lukas 4:22

Somuo urakng inyo ado di santai bopandir, “Sio urakng boi'.” Sia' hiratn mondingaꞌ pomandiran Sio inyo kotakan corodi'. Kato sia', “Padohal Sio ni'in ana' Yusuf mo!”

Lukas 4:32

Sio bopandir agatn bisi kuaso. Jadi, sia' hiratn moniant caro Sio mongajar.

Yohanes 7:15

Boko pomimpitn agama Yahudi hiratn bondar. Kato sia', “Ubo apo Urakng ni'in ulih tohu hala? Sio co jumpat sokolah husus Hukupm Torat.”

Yohanes 7:46

Timbas boko ponjago nantai, “Bolupm kalo ado urakng inyo mongajar momadahan boko hal ubo Sio nantai!”