Lukas 13:11 - Porjanjian Boharu Torjomahan Baso Dilakng Soari-ari

¹¹ Di santai ado siku' urakng botina' inyo udah dolapatn bolas tohutn ponyakit. Ado roh jahat di dalapm dirinyo inyo mombulah io ponyakit sampai monjadi bungku'. Io samo sokali culih bodiritn tontakng boi'.

Lukas 13:11 ပူးပေါင်းရင်းမြစ်များ

Matius 4:23

Yesus bokolilikng di somuo doerah Galilea. Sio mongajar di boko rumah sombayakng urakng Yahudi. Sio momboritoan Kabar Boi' mongona'i Koraja'an Sorugo. Sio jam inyo monyamani somuo urakng inyo sakit ongko lomah.

Markus 9:21

Yesus botakutn ko bopai bobia' nantai, “Udah boropo manahnyo ana' kulo sama'an ni'in?” Timbas io, “Doi' io ija' kocit!

Lukas 13:12

Watu Yesus moniant botina' nantai, Yesus moningkau io ko muka'. Ongko Yesus bopandir, “Indai, watu ninam kolai nyamanam doi' ponyakit kolai.”

Lukas 13:16

Apo botina' ni'in koturutan Abrahapm banso inyo diborokati Allah. Huatan roh jahat, Rajo Sitatn udah bulah io sonsaro dolapatn bolas tohutn manahnyo. Io pasti jouh lobih dirogo'i Allah daripado sapi damo koledai. Cucu'am io dinyamani doi' sonsaro ponyakitnyo, biar pan ni'in Ari Sabat.”

Lukas 21:28

Watu kaitn moniant somuonyo ni'in mula'i tojadi, jadi yakitn huatan pocayo cam. Boharap cam soponuhnyo, obai co manah agi' kaitn paca'an disolamant'an.”

Lukas 8:2

Ado banyaꞌ jam boko botina' inyo tuyut. Sia' udah dinyamani doi' bomacapm ponyakit huatan boko roh jahat. Di antaronyo ado Maria, Yohana, ongko Susana. (Maria nantai disobut Magdalena. Tujuh roh jahat udah ditundukng doi' io. Yohana bini Khuza. Khuza nantai ia'an kopala' pogawai istana Rajo Herodes.) Somuo boko botina' inyo tuyut Yesus moonju' duit sia' siku' pakai' monulukng polayatan sia'.

Lukas 8:27

Di santai ado siku' urakng lolaki inyo dirasu'i boko roh jahat. Udah manaham kinyo bobanggi-bopakaian. Roh jahat hala monyorakng io. Jadi, urakng nantai dijago, longan ongko kakinyo dikobat agatn rantai. Apo io totap ulih momutusan rantai nantai. Roh jahat momoso io botula' ko tompat inyo langunt. Jadi, udah manah kinyo bodiapm di rumah, apo bodiapm di boko gua dipasaran. Io moniant Yesus turutn doi' porohu noi' ko darat. Io mondataki Yesus, mondorah, huatan tundu' monyungkapan di kaki-Nyo. Ongko, Yesus mohakap roh jahat koluar doi' urakng nantai. Jadi roh jahat nantai mondorah, “Ui, Ana' Allah Inyo Maho Tinggi! Duatn honda' bulah la'apo ko aku? Aku muhun jangan mondorako'i aku.”

Lukas 8:43

Di antaronyo ado botina' inyo sakit pondarahan. Udah duo bolas tohutn manahnyo io bomosalah agatn lampat-tapih. Io udah mohabisan somuo umputnnyo pakai' boubat apo kinyo tonyamani ulih sopo pan.

Kisah Boko Rasul 3:2

Sia' duo sampai ko lawakng tembok Rumah Allah bodamo “Gerbakng Kotakng Boi'”. Watu sia' duo honda' mansu', di santai ado urakng inyo kakinyo lumpuh tangga'i io lahir. Sotiap ari io dibaba' ko pintu gerbakng nantai pakai' mominto-minto ko boko urakng inyo koluar mansu' tongahlamanan Rumah Allah.