Lukas 10:16 - Porjanjian Boharu Torjomahan Baso Dilakng Soari-ari

¹⁶ Lalu Yesus bopandir agi' ko sia' tujuh puluh murid inyo diutus tontai, “Urakng inyo mondingaꞌan kaitn, samo sama'an mondingaꞌan Aku siku'. Urakng inyo monula' kaitn, samo sama'an monula' Aku siku'. Urakng inyo monula' Aku, samo sama'an monula' Allah inyo moutus Aku.”

Lukas 10:16 ပူးပေါင်းရင်းမြစ်များ

Matius 10:40

“Aman kaitn monorima' siku' nabi obai nabi nantai monyampaian posatn Allah, kaitn paca'an monorima' upah inyo samo sama'an inyo dionju' ko siku' urakng nabi. Aman kaitn monorima' urakng bondar obai io molabuhan inyo bondar dihadapan Allah, kaitn paca'an monorima' upah inyo samo sama'an inyo dionju' ko urakng bondar. Jadi, sotiap urakng inyo monorima' kaitn, rotinyo io monorima' Aku jam. Huatan sotiap urakng inyo monorima' Aku, rotinyo io pan monorima' Allah inyo moutus Aku.

Matius 18:5

Aman ado urakng inyo monorima' bobia' kocit sama'an ni'in obai Aku, io samo sama'an monorima' Aku jam.”

Markus 9:37

“Urakng inyo monorima' siku' bobia' sama'an ni'in obai Aku, rotinyo io monorima' Aku. Urakng inyo monorima' Aku, io bukainyo aja' monorima' Aku, apo monorima' Allah inyo moutus Aku.”

Lukas 9:48

Lalu Yesus bopandir ko sia', “Urakng inyo monorima' bobia' kocit ni'in obai Aku, boroti io monorima' Aku jam. Huatan urakng inyo monorima' Aku, monorima' Allah inyo moutus Aku. Obai urakng inyo palikng kocit monurut monsio, sobondarnyo io inyo palikng pontikng monurut Allah.”

Yohanes 12:44

Lalu Yesus bopandir agatn saro borakng, “Sotiap urakng inyo pocayo ko aku kinyo haja' pocayo ko aku, apo pocayo ko Allah jam inyo udah moutus Aku.

Yohanes 12:48

Apo, pas ahir joman nononyo, somuo urakng inyo monula' Aku, somuo urakng inyo co mondinga' pomandiran-Ku, sia' paca'an dihukupm. Sia' paca'an dihukupm sosuai agatn ajaran inyo udah Aku sampaian. Pomandiran inyo Aku sampaian monjadi sama'an hakipm inyo mohukupm sia'

Yohanes 13:20

Pondinga'an bobondarcam! La'apo inyo Ku pandiran ni'in: Sotiap urakng inyo monorima' urakng inyo Ku utus, rotinyo io monorima' Aku jam. Huatan sotiap urakng inyo monorima' Aku, rotinyo io pan monorima' Allah inyo moutus Aku.”

Kisah Boko Rasul 5:4

Sobolupm dijual, tanah nantai memang hak umputn kolai. Lopas dijual, hasil nantai kolai totap bohak monontuan caro monggunoannyo. Jadi kolai udah bulah hajat dalapm hati kolai pakai' bulah tumbukan sama'an nantai! Kolai kinyo bayo moncubo monipu monsio, apo monipu Allah jam!”

Galatia 4:14

Biar pan watu nantai bukakng-tubuhku boponyakit, hal nantai kinyo bulah kaitn pakai' monula' damo mohayam aku. Apo malahan sobali'nyo. Kaitn monorima' aku agatn boi' samo sama'an kaitn monorima' molekat damo Kristus Yesus siku'.

1 Tesalonika 4:8

Jadi, aman ado di antaro kaitn inyo monula' ajaran ni'in, io kinyo monula' monsio apo io monula' Allah. Ingantcam! Allah jam inyo moonji'i Roh-Nyo inyo suci ko kaitn.