Kolose 3:3 - Porjanjian Boharu Torjomahan Baso Dilakng Soari-ari

^3-4 Obai, caro hidup kaitn inyo manah nantai udah mati. Kaitn dionji'i hidup inyo boharu. Kristus ia'an puku' hidup kaitn nantai. Ni'in, hidup kaitn nantai tobumbutn bosamo Kristus di dalapm Allah. Apo, watu Kristus bobali' agi' ko dunia ni'in, urakng bukai paca'an moniant hidup kaitn bosamo Sio dalapm komulia'an.

Kolose 3:3 ပူးပေါင်းရင်းမြစ်များ

Galatia 2:20

Obai aku kinyo hidup agi' agatn caro sama'an komai. Ni'in, Kristus monontuan caro hidupku. Aku hidup di dunia ni'in agatn caro boharu obai aku pocayo ko Sio. Sio nantai Ana' Allah inyo kotakan mongasihi aku. Sio monyorahan diri-Nyo sampai mati sobagai kurbatn inyo monggonti'i aku.

Roma 6:2

Samo sokali cado! Kito udah moninggalan caro hidup inyo manah, samo sama'an kito mati tohadap dosa. Jadi, jangannam kito ija' hidup agatn hala mombulah dosa!

Kolose 2:20

Kaitn udah dibebasan doi' kuaso boko roh dunia ni'in. Kaitn moanggap kohidupan inyo manah nantai udah mati, ubonyo kaitn mati bosamo-samo agatn Kristus. Jadi, jangan kaitn hidup sama'an urakng inyo dikuaso'i ulih boko poraturan di dunia ni'in!

Yohanes 5:24

Pondinga'ancam bobondar inyo Ku pandiran ni'in: Somuo urakng inyo monuruti pomandiran-Ku huatan pocayo ko Allah inyo moutus Aku, sia' co dihukupm apo mondapat'an hidup somanah-manahnyo. Obai, sia' udah pindah doi' komatian somanah-manahnyo huatan mansu' ko dalapm kohidupan inyo bondar huatan somanah-manahnyo.

Roma 8:2

Obai, kuaso Roh Allah udah molopasan kaitn doi' kuaso dosa ongko hukupan mati nantai. Roh Allah moonji'i kaitn kohidupan inyo sobondarnyo di dalapm Kristus Yesus.

Roma 5:10

Komai, kito molawatn Allah. Apo kito bobali' bohubukan boi' agatn Sio obai Ana'-Nyo mati pakai' kito. Obai Yesus udah molabuhan nantai, pasti Sio jam paca'an monyolamant'an kito inyo udah bobali' bohubukan boi' agatn Allah. Obai Yesus hidup, jadi kito paca'an mondapat'an hidup kokal jam.

2 Korintus 5:14

Apo alasan pakai' somuo porbuatan koi ia'an obai Kristus mongasihi koi. Obai koi tohu agatn ni'in: Aman siku' urakng udah mati pakai' somuo urakng, jadi somuo urakng nantai udah mati jam.

Yohanes 5:21

Bopai bulah boko urakng mati lalu bobali' hidup, huatan moonji'i sia' kohidupan inyo sobondarnyo. Ubo nian jam Ana' moonji'i kohidupan inyo sobondarnyo ko sopo ja' sosuai kohonda'-Nyo.

Yohanes 3:16

Obai, Allah kotakng mongasihi boko urakng di dunia ni'in. Sampai, Sio udah monyorahan Ana'-Nyo inyo tunggal. Allah molabuhan nantai, oca' somuo urakng inyo pocayo ko Ana'-Nyo, sia' co bonaso di noraka, apo sia' dapat hidup somanah-manahnyo di sorugo.

Yohanes 14:19

Co manah agi', boko urakng di dunia kinyo paca'an moniant Aku agi'. Apo kaitn paca'an moniant Aku. Obai Aku hidup, rotinyo kaitn paca'an hidup jam.

1 Petrus 3:4

Apo, bousaha pulah diri kaitn lobih boi' di dalapm hati, samo agatn hidup inyo lomah-lombut huatan tenang. Pomboi' ubo nian tahatn sampai somanahnyo huatan kotakng borogo di mato Allah.

Matius 11:25

Timpu nantai Yesus bodoa, “Bopai, Duatn umputn somuo dunia ni'in. Aku bosukur obai Duatn kinyo moombakan somuo nantai doi' urakng pintar-corodi', apo Duatn monyatoan somuonyo nantai ko masrakat kocit.

Ibrani 7:25

Obai nantai, Sio sanggup monyolamant'an somuo urakng agatn sompurna inyo datakng ko Allah molalu'i Sio. Sio hala hidup pakai' monjadi Porontaro inyo momuhun ko Allah pakai' sia'.

Kolose 2:3

Bayo Sio mo inyo ulih moonji'i kopintar-corodi'an huatan pongotohuan inyo borogo nantai.

Yohanes 5:40

Biar pan ubo nian, kaitn co honda' datakng ko Aku pakai' mondapat'an hidup nantai.

Yohanes 4:14

Apo sotiap urakng inyo minum ara'i inyo Aku onju' ko io, io co paca'an korahakan agi' somanah-manahnyo. Obai, ara'i inyo paca'an Aku onju' ko io paca'an monjadi ubo mato ara'i di dalapm dirinyo. Ara'i nantai paca'an torus-norus mongalir huatan moonji'inyo hidup somanah-manahnyo.”

Wahyu 2:17

Sopo pan inyo ulih mondinga', kohonda'nyo io momporhatian somuo pomandiran Roh Allah ko boko jomaat. Ko boko urakng inyo monang, Aku paca'an moonju' doi' pomakatn bodamoan manna inyo kinyo kotohuan di mono tompatnyo. Aku pan paca'an moonji'i sobuah batu putih ko sia' siku'-monyiku'. Di batu nantai totulis damo boharu, inyo kinyo dikotohu'i urakng bukai. Bayo urakng inyo monorima' batu nantaiam paca'an mongotohu'i damo nantai.”

1 Yohanes 3:2

Boko somadikanku inyo ku kasihi, watu ni'in kito nam poana'an Allah. Kito co tohu pasti ubo apo Allah morubah kito nononyo. Apo kito tohu ni'inan: timpu Kristus datakng agi', kito paca'an monjadi samo sama'an Sio obai kito moniant Sio dalapm koadaan-Nyo inyo sobondarnyo

Filipi 4:7

Jadi, Allah tajahan moonji'i kaitn sonang-asau inyo monsio kinyo mongoroti. Damai nantai tajahan monjago hati ongko pikiran kaitn di dalapm Kristus Yesus.

1 Korintus 15:45

Sama'an inyo totulis di dalapm Buku Suci, “Allah bulah monsio potamo, ia'an Adapm. Adapm monjadi hidup.” Adapm nantai disobut Adapm potamo. Apo Kristus disobut Adapm toahir. Sio nantai Roh inyo bokuaso moonji'i hidup inyo somombondarannyo.

1 Korintus 2:14

Apo boko urakng inyo bayo bopikir socaro dunia, sia' co honda' pocayo boko hal doi' Roh Allah. Sia' moanggap boko hal nantai kinyo boroti. Sia' co ulih mongoroti boko hal nantai obai boko hal nantai bayo ulih diporiso'i socaro rohani.

Roma 5:21

Komai, dosa inyo bokuaso. Jadi, somuo urakng gola' mati. Apo watu ni'in, pakai' kito inyo pocayo, koboi'an Allah inyo bokuaso. Yesus Kristus, Tuhatn inyo bokuaso dipucu' kito, mombulah kito monjadi bondar di hadapan Allah huatan moonji'i kito hidup inyo kokal.

Kolose 1:5

Kaitn pocayo huatan mongasihi obai kaitn yakitn moharap'an somuo inyo disodiaan pakai' kaitn di sorugo. Kaitn udah mondinga' mongona'i nantai dalapm Kabar Boi' inyo bondar

2 Korintus 5:7

Obai, caro hidup koi bodasaran boko hal inyo koi pocayo'i bukainyo boko hal inyo koi tiat.

Roma 6:11

Kaitn gola' moniant diri kaitn sama'an nantai jam. Kaitn udah mati tohadap dosa huatan kaitn hidup pakai' monyonangan Allah obai kaitn ado hubukan agatn Kristus Yesus.

Efesus 3:9

Allah pan moutusku pakai' monyatoan ko somuo urakng mongona'i roncana-Nyo pakai' boko urakng bukainyo urakng Yahudi. Doi' awal-mulonyo, Allah inyo mombulah somuo hal bolupm momandirannyo ko monsio mongona'i roncana-Nyo nantai.

1 Petrus 4:2

Kaitn molabuhan nantai oca' somanah kaitn ija' hidup di dunia ni'in, kaitn co monuruti kohonda' dunia, apo kaitn monuruti kohonda' Allah.