Kolose 3:10 - Porjanjian Boharu Torjomahan Baso Dilakng Soari-ari

¹⁰ Kaitn udah hidup agatn caro boharu. Allah inyo bulah hidup kaitn inyo boharu nantai. Sio hala bulah sipat kaitn samo sama'an Sio. Sio molabuhan nantai oca' kaitn bondar-bondar konal agatn Sio.

Kolose 3:10 ပူးပေါင်းရင်းမြစ်များ

Yohanes 17:3

Ninam hidup inyo kokal, ia'an obai sia' mongonal ongkah Duatam Allah inyo bondar, huatan pan obai sia' mongonal Yesus Kristus inyo udah Duatn utus.

Roma 12:2

Jangannam kaitn tontuyutan kolaku'an boko urakng bukai di dunia ni'in. Apo biar Allah morubah pomikiran kaitn monjadi boharu. Agatn ubo nantai, kaitn ulih mongotohu'i la'apo inyo Allah kohonda'i, ia'an lapo inyo boi', la'apo inyo monyonangan Sio, huatan la'apo inyo sompurna.

Roma 13:12

Malapm udah hampir laluam ongko sobontar agi' matoari tajahan moncara'. Jadi, kito gola' botongga' bulah kojahatan ongko kito gola' bulah koboi'an pakai' molawatn kuaso golap. Samo sama'an kito molongkapi diri kito agatn sonjato inyo dipakai pakai' boparakng bagi torakng.

Roma 13:14

Apo, kito gola' monjadi samo sama'an Tuhatn Yesus Kristus ongko hala monuruti Sio. Jangannam kito bopikir agi' mongona'i caronyo pakai' mongosihan kohonda' monsio.

Roma 6:4

Dalapm baptisan nantai, kito mati huatan dipasar bosamo Kristus oca' kito pan mondapat'an kohidupan boharu, samo sama'an Allah Bopai mombulah Kristus bobali' hidup doi' komatian ulih kuaso-Nyo inyo mulia.

Roma 8:29

Doi' komai, Allah udah tohu sopo inyo tajahan dipilih Sio. Doi' komai, Sio pan udah momutusan oca' sia' monjadi sorupo agatn Ana'-Nyo, Yesus. Agatn ubo nantai, Yesus monjadi Ana'-Nyo inyo potamo di antaro banya' somadikan.

2 Korintus 3:18

Somuo kito inyo di bimbikng Roh Tuhatn, Sio torus-monorus morubah kito monjadi mongkitn samo agatn Sio. Jadi, kohidupan kito monunju'an obai Tuhatn mulia, samo sama'an mato-muho kito co ditutupi koitn ponutup nantai.

2 Korintus 4:16

Nantaiam sobabnyo koi co putus asa. Biar pan bukakng-tubuh koi cocat tuho goluam, apo hati koi doi' ari ko ari diboharu'i.

2 Korintus 4:6

Obai, Allah inyo bopandir, “Kohonda'nyo ado torakng inyo bocohayo doi' kogolapan!” Sio jam inyo mombulah torakng bocohayo di dalapm hati kito. Ia'an, Sio mombulah oca' kito ngoroti agatn hal ni'in: Komulia'an Allah dapat ditiat di dalapm muho Kristus.

2 Korintus 5:17

Boko urakng inyo ado di dalapm Kristus, sia' monjadi monsio boharu. Sia' udah botongga' hidup agatn caro inyo manah. Sobondarnyo, sia' hidup agatn caro inyo boharu.

Galatia 3:27

Kaitn somuo inyo udah dibaptis dalapm damo Kristus. Kaitn udah monorima' Yesus samo sama'an sikuꞌ urakng inyo mongona'an pakai'an inyo boharu

Galatia 6:15

Disunant kata'an co bosunant nantai co nyiant bedanyo. Inyo pontikng ia'an kito hidup agatn caro inyo boharu.

Efesus 2:10

Obai kito ni'in pulahan Allah huatan molalu'i Kristus, Allah mombulah kito oca' kito molabuhan boko hal inyo boi', ia'an boko pokoroja'an inyo udah Sio siap'an sobolupmnyo pakai' kito.

Efesus 2:15

Komainyo urakng Yahudi monaati somuo porintah huatan poraturan di Hukupm Torat oca' dosa sia' diamputi ongko sia' ulih bodamai agi' agatn Allah. Apo watu Kristus monjadi monsio huatan mati di kayu salib, Sio mombulah agatn caro nantai kinyo ulih di pakai' agi', obai Sio inyo monanggukng hukupan dosa somuo urakng. Agatn sama'an nantai, Sio mombulah oca' somuo urakng inyo pocayo doi' duo pihak nantai, urakng Yahudi ongko urakng bukainyo Yahudi, sia' ulih bodamai agi' agatn Allah. Kristus molabuhan somuo nantai oca' sia' monjadi satu umant inyo boharu di dalapm Sio. Boko urakng inyo pocayo doi' duo pihak nantai bodamai agatn inyo bukainyo. Sia' kinyo bokonjahatan agi' obai porbuatan Kristus di kayu salib.

Kolose 3:12

Obai nantai, hidupcam agatn caro inyo boharu. Kaitn nantai boko urakng inyo dipilih Allah, pakai' umputn Sio inyo husus huatan dikasihi-Nyo. Jadi, jadicam urakng inyo mongasihi, boi' hati, rondah hati, lomah-lombut, huatan sabar.

Kolose 3:14

Inyo palikng pontikng doi' somuo sipat nantai ia'an samo mongasihi. Kasih nantai bulah kito monjadi satu huatan monjadi sompurna.

Filemon 1:6

Aku bodoa oca' hubukan boi' antaro kolai agatn urakng bukai inyo pocayo ni'in ado hasilnyo: Kolai ulih mongotohu'i mongona'i somuo inyo boi' inyo umputn kito dalapm Kristus.

Ibrani 6:6

lopas somuonyo nantai, aman sia' moninggalan Kristus, jadi co mungkitn sia' ulih dibimbikng oca' sia' moninggalan dosa sia' lalu bobali' agi' ko Sio. Obai, umpamonyo sia' siku' mohukupm mati Ana' Allah di kayu salib agi'. Sia' mombulah Sio dihanyam di hadapan urakng banya'.

1 Yohanes 2:3

Aman kito monaati boko porintah Allah, hal nantai monunju'an obai kito bondar-bondar mongonal Sio.

1 Yohanes 2:5

Apo urakng inyo monuruti Pomandiran Allah, urakng nantai bondar-bondar ado kasih Allah di dalapm hatinyo. Hal nantai monunju'an obai kito hidup bosatu agatn Allah

Wahyu 21:5

Allah inyo dudu' di pucu' tahta nantai bopandir, “Tiatcam! Aku bulah somuo hal monjadi boharu!” Sio pan bopandir ko aku, “Tuliscam ni'inan, obai somuo pomandiran ni'in bondar huatan ulih dipocayo.”