Kolose 3:1 - Porjanjian Boharu Torjomahan Baso Dilakng Soari-ari

¹ Kaitn dionji'i kohidupan boharu samo sama'an kaitn hidup agi' bosamo-samo agatn Kristus. Obai nantai, kaitn gola' moutamoan boko hal inyo di sorugo, di mono Kristus dudu' di tompat inyo palikng tohormat di sopia' kanan Allah.

Kolose 3:1 ပူးပေါင်းရင်းမြစ်များ

Matius 22:44

‘Tuhatn bopandir ko Tuhatnku: Dudu'cam di sopia' kanan-Ku, sampai Aku mongalahan boko musuh Duatn, bulah sia' ubo kotonja'an kaki Duatn huatan bulah sia' tundu' agatn kuaso Duatn.’

Matius 26:64

Timbas Yesus, “Ubo kato kaitn nam. Apo porotian ja' ni'in! Mula'i doi' watu ni'in, kaitn paca'an moniant Ana' Monsio, dudu' di tompat inyo tohormat disopia' kanan Allah Inyo Kotakan Bokuaso. Kaitn paca'an moniant-Nyo datakng doi' sorugo di pucu' boko awatn.”

Matius 6:20

Apo kaitn gola' mongumpulan kodampuan pakai' di sorugo. Bubu' ongko togar kinyo morusa' bando barakng di sorugo. Pongolit kinyo ulih mansu' ongko mongolitnyo.

Matius 6:33

Jadi, tolobih doholu goyapcam Koraja'an Allah huatan kobondaran-Nyo. Somuonyo paca'an ditambahan ko kolai. Ongko lopas nantai, somuo kopontikan kaitn paca'an dionju' ko kaitn jam.

Markus 12:36

Memang bondaram nantai. Apo Roh Allah mombulah Daud monulis pomandiran ni'in: ‘Tuhatn Allah bopandir ko Tuhatnku: Dudu'cam di tompat inyo tohormat di sopia' kanan-Ku, sampai Aku mongalahan boko musuh Kolai, mombulah sia' monjadi samo sama'an kontonja'an kaki Kolai, mombulah sia' tundu' agatn kuaso Kolai.’

Markus 14:62

Timbas Yesus, “Aku nam io nantai. Kaitn paca'an moniant ana' Monsio dudu' di tompat inyo tohormat di sopia' kanan Allah Inyo kotakan bokuaso. Nononyo, kaitn pan paca'an moniant Io datakng di pucu' boko awatn di langit.”

Markus 16:19

Lopas Tuhatn Yesus momandiran nantai ko sia', Sio noi' ko sorugo. Di su'utn Sio dudu' momorintah di tompat inyo tohormat di sopia' kanan Allah.

Lukas 12:33

Jadi, jualcam umputn kaitn. Ongko onju'cam duitnyo ko boko urakng jaro. Aman kaitn molabuhan hal nantai, samo sama'an kaitn bulah somacapm dompet di sorugo pakai' diri kaitn. Dompet nantai co rusa' somanah-manahnyo. Kodampuan di sorugo nantai, kinyo paca'an habis. Conyiant pongolit inyo ulih mongolitnyo. Conyiant gogat inyo ulih morusa'annyo.

Lukas 20:42

Memang bondaram nantai. Apo porotian cam pomandiran ni'in inyo ditulis Daud di buku Mazmur: Tuhatn Allah bopandir ko Tuhatnku: ‘Dudu'cam di tompat inyo tohormat di sopia' kanan-Ku,

Lukas 22:69

Co manah agi', Ana' Monsio, tajahan dudu' di tompat inyo tohormat sopia' kanan Allah Inyo Kotakng Bokuaso.”

Kisah Boko Rasul 2:34

Nah Daud siku' kinyo noi' ko sorugo, apo io monulis pomandiran ni'in: ‘Tuhatn bopandir ko Tuhatnku: Dudu'cam di tompat inyo tohormat di sopia' kanan-Ku.

Kisah Boko Rasul 7:55

Apo watu nantai Roh Allah ado pado Stefanus. Io monongadah ko langit, moniant cohayo doi' Allah. Io moniant Yesus tongahan bodiritn di tompat inyo palikng tohormat, ia'an di sopia' kanan Allah.

Roma 8:34

Conyiant ado urakng inyo ulih mohukupm kito. Obai, Kristus Yesus udah dihukupm mati pakai' kito. Malahan lobih doi' nantai agi'! Kristus udah hidup agi' huatan dudu' di tompat inyo tohormat di sopia' kanan Allah. Sio nam inyo mombela kito!

Roma 8:6

Boko urakng inyo monuruti kohonda' Roh Allah hidup agatn sonang-nyamanam doi' Allah ongko mondapat'an kohidupan inyo bondar. Apo boko urakng inyo monuruti kohonda' monsio, hidup jouh doi' Allah. Sia' mondapat'an hukupan mati somanah-manahnyo

2 Korintus 4:18

Obai nantai am, koi co momikiran boko hal di duniani'in inyo ulih ditiat. Apo koi momikiran boko hal di sorugo inyo kinyo kotiat'an. Obai, boko hal inyo di dunia bayo somontaromo, apo boko hal inyo di sorugo tahatn sampai somanah-manahnyo.

Efesus 4:10

Jadi, Kristus inyo udah turutn ko dunia ni'in, Sio jam inyo udah noi' ko tompat inyo jouh lobih tinggi doi' somuo langit. Nantai tojadi oca' Sio ulih momonuhi somuo hal agatn koboradaan-Nyo.

Efesus 5:22

Ko boko botina' inyo udah kawitn aku momandiran: kaitn gola' mohormati laki samo sama'an kaitn mohormati Tuhatn.

Kolose 2:20

Kaitn udah dibebasan doi' kuaso boko roh dunia ni'in. Kaitn moanggap kohidupan inyo manah nantai udah mati, ubonyo kaitn mati bosamo-samo agatn Kristus. Jadi, jangan kaitn hidup sama'an urakng inyo dikuaso'i ulih boko poraturan di dunia ni'in!

Kolose 3:2

Kaitn gola' bopikir mongona'i boko hal di sorugo, bukainyo boko hal di dunia ni'in.

Ibrani 1:13

Allah pan bopandir dinga' ni'in ko Ana'-Nyo, bukainyo ko boko molekat-Nyo, “Dudu' cam di tompat inyo tohormat di sopia' kanan-Ku, Dudu' cam di santai sampai Aku mombulah boko musuh Kolai tundu' agatn kuaso Kolai.”

Ibrani 1:3

Sio momancaran komulia'an Allah. Sio nam gambar inyo nyata doi' diri Allah siku'. Somuo hal totap botahatn doi' pomandiran-Nyo inyo bokuaso. Lopas Sio mati oca' monsio ulih diborosihi doi' boko dosa, lalu Sio noi' ko sorugo ongko dudu' di tompat inyo tohormat di sopia' kanan Allah inyo kotakng bokuaso.

Ibrani 10:12

Apo Kristus momposombahan sobuti' kurbatn mo pakai' somanah-manahnyo, ia'an diri-Nyo siku', pakai' mohapusan dosa. Lopas nantai, Sio dudu' di tompat inyo tohormat di sopia' kanan Allah.

Ibrani 12:2

agatn mato totuju ko Yesus. Obai Sio ia'an sumber kopocaya'an kito. Doi' awal Sio momimpitn kito sampai ahirnyo kopocaya'an kito monjadi sompurna. Sio botahatn mondorita' di kayu salib ongko Sio kinyo tonturian caro komatian nantai momaluan obai Sio ongkah bopikir mongona'i sonang-nyaman inyo tajahan di torima' Sio nononyo. Watu ni'in Sio dudu' di tompat inyo tohormat di sopia' kanan tahta Allah.

Ibrani 8:1

Inti doi' somuo inyo sampai dikisahan di si'itan: Kito ado Imam Agukng inyo sama'an dikisahan nantai. Sio dudu' di tompat inyo tohormat di sorugo, di sopia' kanan tahta Allah inyo kotakng bokuaso.

1 Petrus 3:22

noi' ko sorugo, lalu dudu' di tompat tohormat di sopia' kanan Allah. Allah mombulah Kristus bokuaso di pucu' somuo molekat ongko somuo inyo ado kokuatan huatan kokuasa'an.