Kolose 2:18 - Porjanjian Boharu Torjomahan Baso Dilakng Soari-ari

¹⁸ Ado urakng inyo pompadah rondah hati huatan monyombah boko molekat. Jangan biaran urakng sama'an nantai bulah kaitn pocayo ajaran inyo salah, sampai kaitn co dapat borokat doi' Allah. Urakng sama'an nantai buhau agatn mongatoan io ado boko poniant'an doi' Allah. Apo sobondarnyo pikirannyo duniawi inyo bulah io buhau.

Kolose 2:18 ပူးပေါင်းရင်းမြစ်များ

Matius 24:24

Obai paca'an ado boko urakng datakng inyo mongaku' obai dirinyo nianam Rajo Inyo Dijanjian Allah. Apo sia' co bondar. Paca'an ado boko nabi palsu jam. Boko rajo palsu huatan boko nabi palsu nantai paca'an bulah bomacapm mujisat jam. Tujuan sia' oca' monyosat'an somuo urakng, huatan soandainyo mungkitn tomansu' boko urakng inyo dipilih Allah jam.

Roma 1:25

Daripado pocayo Allah inyo bondar, sia' pocayo boko hal inyo kinyo bondar. Sia' monyombah huatan molayati boko hal inyo dipulah daripado monyombah Allah inyo mombulah la'apo pan nantai. Ongkah Sionam inyo soharusnyo dipuji somanah-manahnyo. Amin!

Roma 16:18

Obai, boko urakng inyo molabuhan ubo nantai sobondarnyo co bokorojo molayati Kristus, Tuhatn kito. Sia' bayo honda' mongosihan kohonda' sia' siku'. Sia' momuji-muji agatn pomandiran inyo manis pakai' monipu urakng inyo co tohu tujuan sia' inyo jahat.

1 Korintus 13:4

Urakng inyo mongasihi ia'an urakng inyo hala sabar huatan hala bulah koboi'an agatn urakng bukai. Urakng inyo mongasihi nantai ia'an urakng inyo kinyo tungi. Io kinyo bopangkakng diri huatan kinyo buhau.

1 Korintus 3:3

obai kaitn ija' hidup samo sama'an monsio dunia! Kaitn ija' tungi-dongkian siku'-monyiku'. Kaitn ija' ado posolisihan siku'-monyiku'. Boko hal nantai monunju'an obai kaitn ija' hidup samo samaꞌan monsio dunia.

1 Korintus 4:18

Ado boboropo urakng di antaro kaitn inyo mongiro obai aku co paca'an datakng agi'. Obai nantai, sia' monjadi buhau.

1 Korintus 4:6

Boko somadikan, boko pomandiran inyo aku tulis ni'in bolaku pakai' diri aku siku' huatan Apolos. Tujuannyo oca' doi' toladatn koi, kaitn ulih bolajar roti ungkap'an ni'in: “Jangan mombosar-bosaran apo inyo totulis.” Agatn sama'an nian, kinyo ado di antaro kaitn inyo paca'an bopangkakng agatn moutamoan sikuꞌ urakng di atas urakng bukai.

1 Korintus 8:1

Ni'in mongona'i dagikng bonatakng inyo diposombahan ko boko duato. Ado boko urakng bopandir, “Somuo kito ado pongotohuan.” Apo aman siku' urakng ado ‘pongotohuan husus’, ongko urakng nantai jadi buhau. Sobondarnyo kito gola' mongasihi urakng bukai. Nantaiam caronyo kito bulah urakng bukai monjadi lobih kuat socaro rohani.

1 Korintus 9:24

Pasti kaitn tohu obai dalapm potandikan bolapat'an bonggidi'an, somuo sia' tuyut bonggidi'an. Apo bayo siku' inyo bodapat hadiah. Samo sama'an nantai, kaitn gola' bousaha hidup agatn caro inyo monyonangan Allah oca' bodapat hadiah inyo Allah onju'.

2 Korintus 11:3

Apo aku gola' kaitn paca'an ditipu, samo sama'an joman komai Hawa ditipu ular inyo licik nantai, ia'an Rajo Sitatn. Aman ubo nian, kaitn paca'an monjadi sosat huatan kinyo bobondar sotia ko Kristus.

2 Korintus 12:20

Obai aku bogonang watu ku datakng nononyo, kolaku'an kaitn kinyo boi' sama'an inyo ku kohonda'i. Ubo nian jam, aku gola' monogur kaitn, tindakanku kinyo samo agatn kohonda' kaitn. Aku kuatir kaitn hala botikakng-bokolohi, tungi, ponggodian, molajuan kohonda' diri siku', monjahai'an urakng bukai, mohahadu, buhau, bulah kokacauan.

Efesus 4:17

Obai nantai aku momandiran ni'in, malahan aku monyiuh kaitn dalapm Tuhatn: Jangan agi' hidup sama'an boko urakng inyo kinyo mongonal Allah. Pikiran sia' sia-sia.

Efesus 5:6

Jangan totipu aman ado urakng inyo monyampaian ajaran inyo bukainyo doi' nantai. Pomandirannyo kinyo bondar. Obai, pastiam Allah paca'an mohukupm boko urakng inyo molabuhan somuo macapm porbuatan jahat nantai, ia'an boko urakng inyo kinyo taat ko Sio.

Filipi 3:14

Aku samo sama'an urakng dalapm polomba'an inyo bonggidi'an oca' mondapat'an hadiahnyo. Hadiahku ia'an Allah moningkauku pakai' hidup bosamo agatn Sio di sorugo. Nantai ulih tojadi ongkah obai Kristus Yesus.

Kolose 2:23

Memang boko poraturan nantai kotiat'annyo bopongaruh boi' obai boko urakng inyo moikuti gola' momoso diri pakai' monaatinyo. Sia' pompadah rondah hati. Sia' monyisa bukakng-tubuh sia' siku'. Apo somuo poraturan sama'an nantai kinyo boguno huatan ongkah bulah urakng honda' momuasan kohonda' dunia ni'in.

Kolose 2:4

Aku momandiran boko hal nantai oca' urakng bukai co ulih mongontumbuki kaitn agatn pomandiran inyo manis.

Kolose 2:8

Boboi'cam jangan ado urakng inyo mongontumbuki kaitn agatn ajaran inyo kinyo boguno, ajaran inyo salah. Boko ajaran nantai doi' pondapat monsio, doi' boko roh inyo bokuaso di dunia ni'in, kinyo doi' Kristus.

1 Timotius 1:7

Sia' honda' monjadi boko guru Hukupm Torat. Sia' mongajar ajaran sia' agatn ponuh pocayo diri. Apo sobondarnyo sia' kinyo mongoroti la'apo inyo sia' pandiran.

1 Timotius 4:1

Ingantcam Roh Allah udah mongatoan agatn togas obai paca'an ado boko urakng inyo paca'an co pocayo agi' ko Yesus. Sia' paca'an pocayo ko boko urakng inyo mongajar boko ajaran inyo salah. Boko ajaran nantai doi' boko roh jahat.

2 Petrus 2:14

Sia' kinyo kalo suah bulah dosa. Mato sia' hala moncari' boko botina' inyo gala' bomporajoan. Sia' mompongaruhi boko urakng inyo bolupm pocayo agatn kuat. Hati sia' udah tolatih monjadi tama'. Jadi, Allah pasti mohukupm sia'!

1 Yohanes 2:26

Aku monulis somuo nantai ko kaitn oca' kaitn boboi' cam ko boko urakng inyo bousaha monipu kaitn agatn ajaran inyo salah.

Wahyu 12:9

(Nago bosar nantai ia'an ular inyo monipu doi' joman komai. Io jam disobut Si Iblis damo Rajo Sitatn. Io inyo monipu somuo urakng di dunia.) Io ditikapan ko bumi bososamo agatn somuo molekatnyo.

Wahyu 13:14

Io mombulah boko tando nantai di pohadapan mato bonatakng inyo potamo. Agatn boko tando nantai, io monyosat'an boko urakng inyo bodiapm di bumi. Io monyiuh sia' pakai' moninjakan lompatukng dalapm rupo bonatakng inyo potamo, bonatakng inyo udah diluko'i podakng apo hidup.

Wahyu 13:8

Io paca'an disombah ulih somuo urakng inyo bodiapm di bumi, ia'an somuo urakng inyo doi' mulo dunia dipulah damonyo co totulis dalapm Buku Kohidupan. Buku nantai umputn Ana' Domba inyo udah disombolih.

Wahyu 19:10

Aku lansukng tokorobah tokosungkapm di pohadapan kaki io pakai' monyombah io. Apo io bopandir ko aku, “Jangan monyombah aku! Aku bayo hulutn inyo molayati Allah, samo sama'an kolai huatan boko somadikan kolai, ia'an boko urakng inyo pocayo ko somuo inyo Yesus ajaran. Sombah Allah aja'am. Obai somuo inyo Yesus ajaran nianam pomandiran doi' Roh Allah.”

Wahyu 3:11

Aku paca'an oca'mo datakng! Totap sotia pocayo ko aku oca' co nyiant ado urakng inyo ulih morampas hadiah komonangan kaitn.