Kolose 1:28 - Porjanjian Boharu Torjomahan Baso Dilakng Soari-ari

²⁸ Kristus nantaiam inyo koi boritoan watu koi momakai somuo kopintar-corodi'an pakai' monosihat'i huatan mongajar sotiap urakng. Tujuannyo oca' koi ulih mombaba' sotiap urakng ko Allah dalapm koadaan suci obai bosatu agatn Kristus.

Kolose 1:28 ပူးပေါင်းရင်းမြစ်များ

Matius 28:20

Ajaricam sia' pakai' monaati somuo inyo udah Ku porintahan ko kaitn. Ingantcam: Aku paca'an hala monyoroto'i kaitn sampai ahir joman.”

Matius 3:7

Apo banya' jam pomimpitn agama Yahudi pan datakng pakai' dibaptis. Ado doi' kolompok Farisi huatan kolompok Saduki. Watu Yohanes moniant sia', io bopandir, “Oi kaitn inyo jahat huatan licik sama'an ular biso! Jangan bopikir kaitn ulih morarian diri doi' hukupan Allah nononyo.

Matius 5:48

Obai nantai, jadicam kotakng boi', samo sama'an Bopai kaitn di sorugo ia'an kotakng boi'.”

Markus 6:34

Watu Yesus turutn doi' porohu, Sio moniant ado banya' urakng di santai. Sio mooso kasih agatn sia' obai sia' conyiant urakng inyo moirikng sia'. Sia' samo sama'an boko domba inyo conyiant pongombolonyo. Jadi, Sio mongajaran banya' hal ko sia'.

Lukas 21:15

Obai Aku siku' tajahan moonji'i ko kaitn komampuan pakai' mongatoan pomandiran inyo topat, sampai boko musuh kaitn kinyo paca'an ulih monontakng ongko monikaki kaitn.

Kisah Boko Rasul 10:36

Kaitn tohu obai Allah udah monyampaian Kabar Boi' ko koi banso Yahudi. Joman komai, Allah bojanji Sio paca'an moutus siku' urakng Rajo. Rajo nantai paca'an mombuka' jalatn oca' urakng ulih bodamai agatn Allah. Yesus nantai Rajo Inyo Dijanjian Allah. Yesus nantai Tuhatn inyo puku' somuo urakng di dunia.

Kisah Boko Rasul 11:20

Ado boboropo urakng doi' antaro sia' inyo boasal doi' Siprus huatan kota Kirene. Sia' botula' ko Antiokhia jam. Di su'utn, sia' momboritoan Kabar Boi', ia'an Yesus nantai Tuhatn inyo bokuaso di pucu' somuonyo. Apo sia' momboritoan ko boko urakng bukainyo Yahudi jam.

Kisah Boko Rasul 13:38

Boko somadikan, aku monyimpulan pomandiranku. Aman kito monaati somuo Porintah Allah inyo ditulis Musa, hal nantai kinyo bulah boko dosa kito diamputi. Boko dosa kito diamputi ongkah aman kito pocayo agatn Yesus.

Kisah Boko Rasul 17:18

Ongko boboropo urakng Yunani inyo pintar-corodi' nantai mula'i botikakng agatn io. Ado inyo doi' kolompok Epikuros. Ado jam doi' kolompok Stoa. Sobagi'an sia' bopandir mongona'i Paulus. Kato sia', “Pomandiran urakng budu nantai kinyo mansu' akal.” Apo inyo bukai bopandir, “Ruponyo io bopandir mongona'i boko duato inyo bolupm kito konal.” Sia' momandiran nantai obai Paulus momboritoan Kabar Boi' mongona'i Yesus huatan sama'an apo boko urakng ulih bobali' hidup doi' komatian.

Kisah Boko Rasul 17:3

Io monunju'an boko bagian doi' Buku Suci mongona'i Rajo Inyo Dijanjian Allah. Io monjolasan obai Rajo nantai gola' ajab sonsaro ongko mati. Apo, Rajo nantai paca'an bobali' hidup. Ongko Paulus bopandir, “Aku momboritoan ko kaitn mongona'i Yesus. Sio nantai Rajo Inyo Dijanjian Allah.”

Kisah Boko Rasul 20:31

Obai nantai, bojago-jagocam! Ingantcam somanah tigo tohutn, siakng ongko malapm aku co botongga' mongajar kaitn masikng-masikng. Aku monosihat'i kaitn agatn banya' ara'i mato oca' kaitn totap pocayo agatn Yesus.

Kisah Boko Rasul 3:20

Jadi Tuhatn paca'an moonji'i sonang-nyaman ko dalapm hati kaitn. Ongko pan, Allah paca'an moutus Yesus Kristus, inyo Allah udah tontuan doi' mulonyo pakai' kaitn.

Kisah Boko Rasul 5:42

Sia' co botongga' moajaran Kabar Boi' obai Yesus nanam Rajo Inyo Dijanjian Allah. Sia' momboritoan nantai sotiap ari di tongahlamanan Rumah Allah ongko di boko rumah urakng.

Kisah Boko Rasul 8:35

Jadi, Filipus monjolasan pomandiran nabi nantai sobondarnyo mongona'i Yesus. Ongko, Filipus momboritoan soluruh Kabar Boi' ko io.

Kisah Boko Rasul 8:5

Di antaro sia' ado Filipus. Io botula' ko sobuah kota di doerah Samaria ongko momboritoan ko boko urakng di santai. Io momboritoan obai Yesus nantai Rajo Inyo Dijanjian Allah.

Kisah Boko Rasul 9:20

Lopas jadi io ulih moniant agi' huatan monjadi kuat agi', io lansukng botula' ko boko rumah sombayakng urakng agama Yahudi. Io momboritoan obai Yesus nantai Ana' Allah.

Roma 16:25

Topujicam Allah! Io inyo bokuaso bulah kaitn kuat pocayo sosuai agatn Kabar Boi' mongona'i Yesus Kristus inyo ku boritoan. Kabar Boi' nantai momadahan mongona'i hajat Allah pakai' somuo banso. Somanah boabad-abad, conyiant monsio inyo mongotohu'i hajat Allah nantai.

1 Korintus 1:23

Apo koi momboritoan obai Kristus, Rajo Inyo Dijanjian Allah mati di kayu salib. Hal nantai bulah boko urakng Yahudi tosinggukng, huatan boko urakng inyo kinyo Yahudi moanggap hal nantai kinyo ado rotinyo.

1 Korintus 1:30

Jadi, kaitn ado hubukan dokat agatn Kristus Yesus obai porbuatan Allah, bukainyo obai porbuatan kaitn. Yesus monjadi kopintar-corodi'an Allah bagi kito. Molalu'i Yesus, kito monjadi bondar di hadapan Allah. Kito pan monjadi umant husus pakai' umputn Sio. Sio monanggukng hukupan dosa kito pakai' monobus kito.

1 Korintus 12:8

Umpamonyo, ko urakng ni'in Roh Allah moonji'i komampuan bopandir agatn kopintar-corodi'an. Ko urakng nian Roh Allah moonji'i komampuan pakai' mongotohu'i sosuatu ongko monyampaian boko hal nantai agatn jolasko urakng bukai.

1 Korintus 15:12

Jadi, koi momboritoan obai Yesus udah dihidupan agi' doi' komatian. Aman kaitn udah pocayo nantai, co mungkitn kaitn mongatoan obai urakng mati kinyo paca'an dihidupan agi' doi' komatian.

1 Korintus 2:15

Apo boko urakng inyo dikuaso'i Roh Allah, sia' mampu momoriso'i la'apo pan. Apo sia' kinyo ulih diporiso'i boko urakng bukai

1 Korintus 2:6

Apo di antaro boko urakng inyo bondar-bondar pocayo ko Yesus, koi memang mongajar mongona'i kopintar-corodi'an. Apo kopintar-corodi'an bukainyo doi' kopintar-corodi'an monsio di dunia ni'in, bukainyo doi' kopintar-corodi'an boko pomimpitn di dunia ni'in. Sia' paca'an dibonasoan.

1 Korintus 4:14

Aku monulis boko hal kinyo pakai' bulah kaitn malu, apo aku honda' monogur kaitn samo sama'an boko ana'ku inyo ku kidah.

2 Korintus 10:14

Obai, komai koi udah datakng ko kaitn lalu momadahan Kabar Boi' mongona'i Kristus. Jadi, koi co molalu'i batas nantai.

2 Korintus 11:2

Osonyo aku ngomburu aman sampai kaitn tuyut urakng bukai. Apo porasa'an ngomburu nantai doi' Allah. Obai, aku honda' kaitn tuyut Kristus ja'am. Kaitn samo sama'an daro inyo udah ku potunangan agatn siku' lolaki, ia'an Kristus. Aku honda' oca' kaitn suci di hadapan-Nyo.

2 Korintus 4:5

Obai bukainyo diri koi siku' inyo koi boritoan. Apo, koi momboritoan mongona'i Yesus Kristus sobagai Tuhatn. Sio inyo moutus koi pakai' monjadi polayatn kaitn.

Efesus 3:8

Di antaro soluruh umant Allah, aku inyo kotakng kinyo pontikng. Apo, Allah totap monunju'an kasih karunia-Nyo ko aku agatn caro ni'in. Sio moutus ku momboritoan ko boko urakng bukainyo urakng Yahudi mongona'i somuo borokat inyo Kristus onju'. Kito kinyo ulih mombayakan somuo borokat inyo kotakng luar biaso nantai.

Efesus 5:27

Agatn sama'an nantai, Kristus mombulah oca' sia' ulih bodiritn di hadapan-Nyo sobagai jomaat inyo mulia, kinyo bodosa, kinyo ado kosalahan la'apo pan. Sia' bondar-bondar monjadi borosih huatan kinyo ulih disalahan.

Kolose 1:22

Apo agatn komatian Kristus Allah udah bulah kaitn bokoboi'an agi' agatn Sio. Sio molabuhan nantai oca' nono, timpu kaitn mohadapi Sio pakai' dihakipi, kaitn co ulih disalahan. Sio paca'an moanggap kaitn borosih, co bodosa.

Kolose 2:10

Ni'in, obai kaitn hidup bosatu agatn Kristus, ongko kaitn udah dionji'i somuo inyo kaitn pontikan socaro rohani. Kristusnam inyo bokuaso di pucu' somuo kuaso di dunia huatan di pucu' somuo roh inyo ado kuaso.

Kolose 2:3

Bayo Sio mo inyo ulih moonji'i kopintar-corodi'an huatan pongotohuan inyo borogo nantai.

Kolose 3:16

Kohonda'nyo ajaran Kristus somombondarannyo mansu' ko dalapm hati kaitn huatan monguaso'i caro hidup kaitn siku'-monyiku'. Kaitn gola' samo mongajar, samo moingant'an agatn somuo kopintar-corodi'an. Nyanyiancam mazmur, puji-pujian, nyanyian mongona'i Allah. Bonyanyicam agatn bosukur ko Allah dalapm hati kaitn.

Kolose 4:12

Salapm doi' Epafras, inyo boasal doi' tompat kaitn jam. Io molayati Kristus Yesus. Io hala bodoa agatn somombondarannyo pakai' kaitn oca' kaitn totap kuat pocayo ko Yesus. Io bodoa oca' kaitn monjadi kotakng yakitn mongona'i somuo inyo dikohonda'i Allah.

1 Tesalonika 4:6

Dalapm hal ni'in, jangan jam bulah dosa ko somadikan bukainyo inyo pocayo ko Yesus. Jangan monggogadati io. Obai Tuhatn paca'an mohukupm boko urakng inyo bulah dosa sama'an nantai. Sokomai, koi udah kalo moingant'an kaitn agatn togas mongona'i hal nantai.

1 Timotius 3:16

Sobondarnyo la'apo inyo tosimpatn dalapm kopocaya'an kito kotakan luar biaso! Boko hal nantai monunju'an caro hidup inyo monyonangan Allah. Boko hal nantai ia'an: “Yesus moniant'an diri-Nyo dalapm rupo monsio. Roh Allah monyatoan obai inyo dilabuhan Yesus bondar. Yesus monyatoan diri-Nyo ko boko molekat. Boko urakng momboritoan mongona'i Yesus ko somuo banso. Boko urakng di soluruh dunia monjadi pocayo ko Yesus. Allah bulah Yesus noi' ko sorugo dalapm komulia'an.”

1 Timotius 3:2

Obai nantai, siku' urakng ponotua' gola' hidup agatn caro inyo boi'. Io gola' hidup bujur bondar oca' urakng bukai co ulih monyalahan io. Io co ulih bisi bini lobih doi' siku'. Io gola' ulih mongondalian dirinyo. Io gola' pintar-corodi' huatan sopatn. Io gola' agatn coraca'an moonji'i koluntukan. Io gola' mampu mongajar urakng agatn boi'.

Ibrani 10:14

Agatn momposombahan sobuti' kurbatn nantai, Sio mombulah oca' boko urakng ulih monjadi borosih doi' dosa sia'. Sio mombulah sia' monjadi sompurna pakai' somanah-manahnyo.

Ibrani 13:21

Aku bodoa oca' Allah moonju' ko kaitn somuo hal boi' inyo dipontikan kaitn pakai' molabuhan kohonda'-Nyo. Aku bodoa oca' Allah molalu'i Yesus Kristus, mongorojoan dalapm hati kito somuo hal inyo dikohonda'i-Nyo. Mara kito momuji Sio pakai' somanah-manahnyo. Amin!

2 Petrus 3:15

Kaitn gola' sadar obai alasan Tuhatn kito sabar ia'an obai Sio moonji'i urakng kosompatan pakai' disolamant'an. Somadikan kito inyo ku kasihi, Paulus, pan udah monulis surat ko kaitn mongona'i nantai. Io monulis nantai agatn hikmat inyo Allah onju' ko inyo.