Kisah Boko Rasul 9:39 - Porjanjian Boharu Torjomahan Baso Dilakng Soari-ari

³⁹ Jadi, Petrus lansukng tuyut sia'. Sampai di su'utn, Petrus dionju'an ko ruakan pucu' nantai. Somuo botina' balu bodiritn mongoliliki Petrus di santai. Kapikng monangis sia' moniant'an ko io boko baju huatan pakai'an bukai inyo dipulah Dorkas. Timpu Dorkas ija' hidup, io bulah somuo pakai'an nantai pakai' monulukng sia'.

Kisah Boko Rasul 9:39 ပူးပေါင်းရင်းမြစ်များ

Matius 17:17

Lalu, Yesus bopandir, “Urakng timpu joman ni'in jahat huatan kinyo pocayo! Ija' apo manah agi', Aku gola' bosamo agatn kaitn! Ija' apo manah agi', Aku gola' bosabar agatn kaitn!” Lalu Yesus bopandir ko Bopai bobia' nantai, “Baba' ana' kolai nantai ko si'itn.”

Matius 26:11

Kaitn hala ado kosompatan pakai' bulah koboi'an ko boko urakng jaro obai sia' hala ada'an di antaro kaitn. Apo Aku co paca'an hala bosamo-samo agatn kaitn.

Markus 14:8

Botina' ni'in udah molabuhan la'apo inyo ulih io labuhan. Agatn caro monuyungan minya' harupm nantai ko Aku, sobondarnyo io udah monyiap'an bukakng-tubuh-Ku pakai' dipasar.

Lukas 24:44

Lopas nantai Sio bopandir ko sia', “Watu Aku ija' sosamo agatn kaitn komai, Aku udah momadahan ko kaitn obai somuo inyo totulis mongonaꞌi Aku gola' tojadi, doi' inyo totulis dalapm boko buku Musa, buku boko Nabi, sampai buku Mazmur.”

Yohanes 12:8

Urakng jaro hala ado bosamo kaitn, apo Aku kinyo paca'an hala bosamo kaitn.”

Yohanes 17:12

Somanahan Aku bokopal agatn sia', Aku molinduki sia' agatn kuaso dalapm damo Duatn inyo udah Duatn onju' ko aku. Aku udah molinduki sia' ongko kinyo ado siku' pan inyo bonaso doi' sia'. Kocuali siku' mo inyo memang paca'an bonaso. Nantai tojadi oca' pomandiran inyo ditulis dalapm Buku Suci monjadi nyata.

Kisah Boko Rasul 1:13

Kali sampai di kota, sia' botula' ko rumah tompat sia' monoluntukng. Di rumah nantai sia' noi' ko kamar sia' di loteng. Boko rasul nantai: Petrus, Yohanes, Yakobus, Andreas, Filipus, Tomas, Bartolomeus, Matius, Yakobus (ana' Alfeus), Simon (urakng Zelot), ongko Yudas (ana' Yakobus).

Kisah Boko Rasul 20:35

Dalapm somuo inyo aku labuhan nantai, aku monjadi contoh pakai' kaitn. Kaitn pan gola' bokorojo koras ongko monulukng boko urakng inyo jaro. Jangan tongkolupatn pomandiran Tuhatn Yesus, ‘Allah lobih momborokati urakng inyo moonji'i bantu'an daripado urakng inyo monorima' bantu'an.’ ”

Kisah Boko Rasul 6:1

Mongkitn manah, mongkitn banya' urakng Yahudi inyo pocayo agatn Yesus. Ado urakng Yahudi inyo pocayo agatn Yesus inyo bobaso Ibrani. Ado jam inyo bobaso Yunani. Inyo bobaso Yunani tungi obai inyo bobaso Ibrani mombagi'i pomakatn sotiap ari ko boko urakng botina' balu kinyo adil. Boko urakng balu inyo bobaso Yunani hala kinyo dionji'i.

Kisah Boko Rasul 9:41

Petrus mouluran longannyo, monulukng Tabita bodiritn. Lopas nian, Petrus moningkau somuo botina' balu huatan boko urakng bukai inyo pocayo Yesus. Io moniant'an ko sia' obai Tabita udah bobali' hidup doi' komatian.

2 Korintus 8:12

Aman ado kohonda' pakai' moonji'i, jadi Allah monorima' poonju' nantai. Allah honda' monorima' poonju' inyo sosuai agatn komampuan urakng. Urakng kinyo gola' moonji'i lobih doi' komampuannyo.

Efesus 4:28

Urakng inyo komainyo pongolit jangan mongolit agi'. Apo io gola' bokorojo koras agatn jarinyo siku', mombulah boko hal inyo boi', oca' io ulih monulukng urakng bukai inyo ado kopontikannyo.

1 Tesalonika 1:3

Koi bosukur ko Allah Bopai kito obai koi moingant caro hidup kaitn. Ia'an, obai kaitn pocayo ko Yesus huatan udah moniant'an dalapm porbuatan kaitn inyo nyata. Kaitn mongasihi urakng bukai agatn somombondarannyo monulukng sia'. Ongko kaitn totap kuat ongkah boharap ko Yesus Kristus, Tuhatn kito.

1 Tesalonika 4:13

Boko somadikan, koi kotakng honda' oca' kaitn mongotohu'i mongona'i la'apo inyo paca'an tojadi ko boko urakng inyo pocayo lopas sia' mati. Koi co honda' kaitn bulikng samo sama'an boko urakng inyo kinyo pocayo ko Yesus. Sia' co nyiant pongharapan obai boko urakng inyo mati paca'an bobali' hidup.

1 Timotius 5:3

Hormaticam boko botina' balu inyo co nyiant koluarganyo pakai' monulukng sia'.

1 Timotius 5:5

Siku' botina' balu inyo bondar-bondar gola' ditulukng doi' jomaat ia'an botina' balu inyo hidup sonsiku'an, co nyiant koluarga pakai' monulukng io. Io boharap ko Allah. Io bodoa siakng-malapm mominto potulukan doi' Allah.

1 Yohanes 3:18

Poana'anKu! Jangannam kito bayo bopandir obai kito mongasihi urakng bukai damo bopandir mongona'i kasih ja'am. Apo kohonda'nyo kito bondar-bondar mongasihi agatn porbuatan ongko dalapm kobondaran.