Kisah Boko Rasul 9:29 - Porjanjian Boharu Torjomahan Baso Dilakng Soari-ari

²⁹ Saulus opat jam botikakng agatn boko urakng agama Yahudi inyo bobaso Yunani. Apo sia' kinyo pocayo ko Yesus. Sia' bogoyap caro pakai' mombunuhnyo.

Kisah Boko Rasul 9:29 ပူးပေါင်းရင်းမြစ်များ

Kisah Boko Rasul 6:1

Mongkitn manah, mongkitn banya' urakng Yahudi inyo pocayo agatn Yesus. Ado urakng Yahudi inyo pocayo agatn Yesus inyo bobaso Ibrani. Ado jam inyo bobaso Yunani. Inyo bobaso Yunani tungi obai inyo bobaso Ibrani mombagi'i pomakatn sotiap ari ko boko urakng botina' balu kinyo adil. Boko urakng balu inyo bobaso Yunani hala kinyo dionji'i.

Yudas 1:9

Mikhael ia'an pomimpitn molekat, apo io siku' kinyo mohayam sama'an sia'. Timpu, sio botikakng mulut agatn Rajo Sitatn mongona'i bangkai Musa, Mikhael kinyo bopikir io ado kuaso pakai' mohukupm Rajo Sitatn agatn mohayamnyo. Sobali'nyo, io bopandir, “Kironyo Tuhatn siku' paca'an mohukupm kolai!”

2 Korintus 11:26

Dalapm banya' pojalatan, aku mohadapi bomacapm bohayo: bohayo doi' sungai, bohayo doi' porampok, bohayo doi' bansoku siku' urakng Yahudi, bohayo doi' boko urakng bukainyo urakng Yahudi, bohayo di kota, bohayo di padakng pasir, bohayo di lout, bohayo doi' boko urakng inyo pompadah sia' pocayo, apo sobondarnyo cado.

Kisah Boko Rasul 11:20

Ado boboropo urakng doi' antaro sia' inyo boasal doi' Siprus huatan kota Kirene. Sia' botula' ko Antiokhia jam. Di su'utn, sia' momboritoan Kabar Boi', ia'an Yesus nantai Tuhatn inyo bokuaso di pucu' somuonyo. Apo sia' momboritoan ko boko urakng bukainyo Yahudi jam.

Kisah Boko Rasul 19:8

Paulus pan botula' ko rumah sombayakng agama Yahudi di kota Efesus. Somanah tigo bulatn, io opat mongajar di santai. Agatn borani io botikakng agatn boko urakng di santai. Io monjolasan mongona'i Koraja'an Allah. Io bousaha moyakit'an sia' obai Yesus nantai Rajo Inyo Dijanjian Allah inyo momorintah di Koraja'an Allah nantai.

Kisah Boko Rasul 18:19

Pas sia' datakng di kota Efesus, Paulus mansu' ko rumah sombayakng. Io agatn boko urakng Yahudi di santai bopandir mongona'i Yesus. Sia' mominto io pakai' monotap lobih manah di su'utn. Apo io monula'. Katonyo, “Aman Allah moijitan, aku paca'an datakng agi' ko si'itn.” Jadi, io botula' noi' kapal, apo Priskila ongko Akwila totap tinggal di kota Efesus nantai.

Kisah Boko Rasul 17:17

Obai nantai, io opat mansu' ko rumah sombayakng urakng Yahudi. Di santai, io bopandir mongona'i Yesus bosamo boko urakng Yahudi huatan boko urakng inyo bukainyo urakng Yahudi jam inyo komai udah monjadi urakng inyo pocayo ko Allah. Kinyo bayo nantai, opat jam io ko pasar pakai' bopandir mongona'i Yesus ko sopo ja' inyo kotomuan di santai.

Kisah Boko Rasul 9:27

Apo Barnabas monulukng Saulus. Barnabas mongonalan io ko boko rasul. Barnabas mongisahan sama'an apo Saulus udah moniant Tuhatn Yesus dalapm pojalatan ko Damsyik. Barnabas pan momadahan ko sia' obai Tuhatn Yesus udah bopandir ko Saulus. Io pan monjolasan obai Saulus udah momboritoan mongona'i Yesus agatn borani di Damsyik.

Yudas 1:3

Boko somadikan inyo ku kasihi! Kito samo-samo disolamant'an huatan aku bondar-bondar honda' monulis ko kaitn mongona'i nantai. Apo, aku mooso gola' monulis ko kaitn pakai' monguat'an kopocaya'an kaitn. Agatn sama'an nian, aku honda' oca' kaitn totap bojuakng mompotahatan iman kito, ia'an boko ajaran bondar inyo udah disampaian ko boko urakng husus umputn Allah.

Kisah Boko Rasul 9:28

Jadi, Saulus pan ngopal agatn sia' di Yerusalem. Di su'utn pan, Saulus hala momboritoan mongona'i Tuhatn Yesus agatn borani.

Kisah Boko Rasul 22:18

Dalapm poniant'an nantai Tuhatn bopandir ko aku, ‘Boko urakng Yahudi di si'itn kinyo paca'an pocayo pomandiran kolai mongona'i Aku. Jadi, kolai gola' hagar botula' doi' Yerusalem ni'in.’