Kisah Boko Rasul 9:13 - Porjanjian Boharu Torjomahan Baso Dilakng Soari-ari

¹³ Apo Ananias bopandir, “Tuhatn, aku udah mondinga' banya' kisah mongona'i Saulus nantai. Di Yerusalem, io banya' mondorako'i urakng inyo pocayo ko Duatn.

Kisah Boko Rasul 9:13 ပူးပေါင်းရင်းမြစ်များ

Matius 10:16

“Dinga'anbo ni'in! Aku moutus kaitn samo sama'an boko ana' domba ko boko bonatakng ganas. Obai nantai, kaitn gola' corodi' sama'an ular. Apo kaitn pan gola' tulus hati sama'an burukng daro.

Kisah Boko Rasul 22:4

Komainyo, aku mondorako'i boko urakng inyo jumpat boko ajaran Tuhatn. Aku mondorako'i sia' sampai bomatian, aku jam inyo monangkap ongko monyorahan sia' pakai' di ponjara, boi' lolaki boi' pan botina'.

Kisah Boko Rasul 9:1

Somontaro boko rasul momboritoan Kabar Boi', Saulus kotakan godi bondar. Io moancapm boko murid Tuhatn Yesus. Katonyo io paca'an mombunuh sia'. Jadi, io botula' ko Imam Agukng.

Kisah Boko Rasul 9:21

Somuo urakng inyo mondinga' io monjadi kotakan hiratn. Kato sia', “Tontainyo io nianam inyo hala mondorako'i boko urakng inyo pocayo agatn Yesus di Yerusalem! Ubonyo io datakng ko si'itn honda' monangkap boko urakng inyo pocayo agatn Yesus jam huatan honda' mombaba' sia' ko Yerusalem oca' ulih diadili boko imam kopala'.”

Kisah Boko Rasul 9:32

Timpu nantai, Petrus bojalatn kolilikng doerah nantai. Suatu watu, io botula' usi'an ko boko urakng inyo pocayo Yesus di kota Lida.

Kisah Boko Rasul 9:41

Petrus mouluran longannyo, monulukng Tabita bodiritn. Lopas nian, Petrus moningkau somuo botina' balu huatan boko urakng bukai inyo pocayo Yesus. Io moniant'an ko sia' obai Tabita udah bobali' hidup doi' komatian.

Roma 15:31

oca' Tuhatn molinduki aku doi' boko urakng inyo kinyo pocayo di doerah Yudea inyo honda' monyakitiku. Tulukng bodoa jam oca' polayatanku pakai' Yerusalem ditorima' agatn boi' boko urakng inyo pocayo di siatn.

Roma 16:15

Salapm ko Filologus ongko Yulia; ko Nereus ongko somadikan botina'nyo; ko Olimpas ongko ko somuo urakng pocayo inyo bosamo-samo agatn sia'.

Roma 16:2

Honda' ku padahan ko kaitn nantai oca' kaitn monyambut io agatn caro inyo pantas pakai' urakng inyo pocayo. Sambutcam io dalapm Tuhatn ongko tulukngcam io agatn kopontikannyo. Obai, io udah monulukng urakng banya', tomansu' aku.

1 Korintus 14:33

Somuo komampuan doi' Roh Allah paca'an dipakai socaro toatur. Obai Allah kinyo mongohonda'i kokacauan. Sio mongohonda'i oca' kito ado kodamaian.

1 Korintus 16:1

Ni'inan aku honda' monulis mongona'i duit inyo paca'an dikumpulan pakai' monulukng boko jomaat di Yerusalem. Aku honda' oca' kaitn moikuti poraturan inyo udah ku onju' ko jomaat di doerah Galatia. Ni'innam poraturannyo:

1 Korintus 6:5

Aku mongatoan sama'an ni'in oca' kaitn mooso malu. Pasti ado urakng di antaro kaitn inyo cukup pintar-corodi' pakai' bulah koputusan dalapm boko pokaro di antaro boko urakng pocayo.

Efesus 1:1

Surat ni'in doi' aku, Paulus. Aku di tingkau pakai' monjadi rasul Kristus Yesus obai nantai kohonda' Allah. Surat ni'in ko somuo umant husus umputn Allah di kota Efesus, ia'an boko urakng inyo pocayo ko Kristus Yesus.

Filipi 1:1

Surat ni'in doi' ku, Paulus bosamo agatn Timotius. Koi urakng inyo bokorojo molayati Kristus Yesus. Surat ni'in pakai' somuo urakng husus umputn Allah di kota Filipi inyo bosatu dalapm Kristus Yesus, tomansu' agatn somuo ponotua' ongko diakon jomaat.

Filipi 4:22

Salapm ko kaitn tangga'i somuo umant Allah di si'itn, hususnyo tangga'i boko urakng inyo pocayo inyo bokorojo di istana Rajo Roma.

Ibrani 13:24

Sampaian cam salapm ko somuo pomimpitn kaitn ongko somuo urakng umant husus umputn Allah. Boko somadikan doi' propinsi Italia monyampaian salapm ko kaitn.

Yudas 1:3

Boko somadikan inyo ku kasihi! Kito samo-samo disolamant'an huatan aku bondar-bondar honda' monulis ko kaitn mongona'i nantai. Apo, aku mooso gola' monulis ko kaitn pakai' monguat'an kopocaya'an kaitn. Agatn sama'an nian, aku honda' oca' kaitn totap bojuakng mompotahatan iman kito, ia'an boko ajaran bondar inyo udah disampaian ko boko urakng husus umputn Allah.