Kisah Boko Rasul 8:25 - Porjanjian Boharu Torjomahan Baso Dilakng Soari-ari

²⁵ Lopas nantai, koduo rasul nantai monyampaian borito doi' Tuhatn. Sia' momboritoan mongona'i pongalapan sia' siku' bosamo Yesus. Ongko, sia' bobali' ko Yerusalem. Dalapm pojalatan pulakng, sia' momboritoan Kabar Boi' mongona'i Yesus di banya' laman bukai di doerah Samaria nantai.

Kisah Boko Rasul 8:25 ပူးပေါင်းရင်းမြစ်များ

Kisah Boko Rasul 20:21

Aku hala mongajar agatn torus torakng, boi' ko boko urakng Yahudi huatan ko boko urakng Yunani oca' sia' botongga' bulah dosa huatan hidup monyonangan hati Allah. Sia' gola' pocayo ko Yesus, Tuhatn inyo bokuaso pucu' kito.

1 Petrus 5:12

Aku monulis surat singkat ni'in di tulukng Silas. Io nam somadikan, somadikan soiman inyo sotia. Aku monulis surat ni'in pakai' momadahi huatan moonji'i somangant ko kaitn. Aku pan honda' oca' kaitn yakitn obai isi suratku ni'in bondar-bondar mongona'i koboi'an Allah. Kaitn gola' totap hidup dalapm koboi'an-Nyo nantai.

Kisah Boko Rasul 28:31

Io momboritoan mongona'i Koraja'an Allah. Io mongajar mongona'i Tuhatn Yesus, Rajo Inyo Dijanjian Allah nantai. Io momboritoan nantai agatn borani. Co nyiant inyo mohalaki io.

Kisah Boko Rasul 28:28

Jadi, kaitn gola' mongotohu'i ni'in: borito mongona'i kosolamant'an doi' Allah nantai paca'an disampaian ko boko banso inyo bukainyo banso Yahudi, sia' paca'an pocayo agatn borito nantai.” [

Kisah Boko Rasul 28:23

Ongko, sia' monontuan watu pakai' botomu agi' agatn Paulus. Pas ari nantai lobih banya' urakng datakng bokumpul di rumah tompat io monoluntukng. Doi' sunsukng tuntukng ko malapm Paulus monjolasan ko sia' mongona'i Koraja'an Allah. Io moingant'an sia' mongona'i boko hal inyo ditulis Musa huatan boko nabi watu joman komai. Agatn caro nantai, io bousaha moyakit'an sia' pakai' pocayo ko Yesus.

Kisah Boko Rasul 18:5

Lopas nian, Silas ongko Timotius datakng doi' propinsi Makedonia. Jadi, Paulus ulih momakai somuo watunyo pakai' momboritoan ko somuo urakng inyo boagama Yahudi. Paulus momboritoan agatn jolas obai Yesus nantai Rajo Inyo Dijanjian Allah.

Kisah Boko Rasul 8:40

Apo Roh Allah mombaba' Filipus doi' tompat nantai ko kota inyo bodamo Asdod. Tangga'i santai io bojalatn ko kota Kaisarea. Io momboritoan Kabar Boi' di somuo kota di sopanjakng pojalatannyo.

Kisah Boko Rasul 1:8

Apo Roh Allah paca'an tinggal di dalapm kaitn. Watu nantai, kaitn paca'an monorima' kuaso. Kaitn paca'an momboritoan mongona'i Aku ko boko urakng bukai di kota Yerusalem huatan di sotiap doerah Yudea. Kaitn paca'an momboritoan mongona'i Aku jam di sotiap doerah Samaria. Kaitn paca'an momboritoan mongona'i Aku sampai ko boko tompat inyo palikng jouh di soluruh dunia.”

Yohanes 15:27

Kaitn pan gola' bosasi mongona'i Aku obai kaitn udah bosamo agatn Aku doi' mulo polayatan-Ku.

Matius 10:5

Ongko, Yesus moutus koduo bolas rasul agatn boko potunju' ni'in. Kato-Nyo, “Jangan botula' ko doerah boko urakng inyo bukainyo urakng Yahudi. Jangan jam ko boko kota urakng Samaria.

Lukas 16:28

Aku bisi lima' urakng somadikan inyo ija' hidup di dunia. Siuh Lazarus momporingant'i sia' pakai' botongga' bulah dosa huatan hidup monyonangan hati Allah oca' nononyo lopas jadi mati, sia' co mansu' ko tompat ajab sonsaro ni'in jam.’

Kisah Boko Rasul 13:12

Gubernur moniant la'apo inyo tojadi nantai. Ongko, io monjadi pocayo agatn Yesus. Io topocongo agatn ajaran Paulus ongko Barnabas mongona'i Tuhatn Yesus.