Kisah Boko Rasul 4:29 - Porjanjian Boharu Torjomahan Baso Dilakng Soari-ari

²⁹ Jadi ni'inan, Au Tuhatn, porotiancam ancapan sia' ko koi. Tulukngcam koi boko hulutn Duatn. Pulahcam koi borani pakai' momboritoan pomandiran Duatn, ia'an Borito Boi' mongona'i Yesus.

Kisah Boko Rasul 4:29 ပူးပေါင်းရင်းမြစ်များ

Kisah Boko Rasul 13:46

Apo Paulus ongko Barnabas kinyo gola'. Sia' bopandir, “Yesus moutus koi pakai' monyampaian Kabar Boi' mongona'i Sio. Koi gola' monyampaian lobih doholu ko kaitn, boko urakng Yahudi. Apo kaitn co honda' monorima' nantai. Rotinyo, kaitn kinyo moanggap diri cucu' monorima' hidup somanah-manahnyo. Obai nantai, ni'inan koi moninggalan kaitn ongko botula' molayati boko banso inyo bukainyo urakng Yahudi.

Kisah Boko Rasul 14:3

Apo, Paulus ongko Barnabas bodiapm cukup manah di su'utn. Agatn borani, sia' duo momboritoan Kabar Boi' mongona'i Tuhatn Yesus. Sia' duo bopandir biar pan urakng kinyo cucu' pakai' disolamant'an, apo Yesus totap monunju'an koboi'an hati-Nyo. Tuhatn Yesus moonji'i kuaso ko Paulus ongko Barnabas pakai' molabuhan bomacapm mujisat. Niannam caronyo Tuhatn mombutian obai somuo pomandiran sia' bondar.

Kisah Boko Rasul 19:8

Paulus pan botula' ko rumah sombayakng agama Yahudi di kota Efesus. Somanah tigo bulatn, io opat mongajar di santai. Agatn borani io botikakng agatn boko urakng di santai. Io monjolasan mongona'i Koraja'an Allah. Io bousaha moyakit'an sia' obai Yesus nantai Rajo Inyo Dijanjian Allah inyo momorintah di Koraja'an Allah nantai.

Kisah Boko Rasul 26:26

Rajo Agripa pan udah tohu mongona'i boko hal ni'in. Obai nantai, aku ulih bopandir agatn torus torakng ko io. Aku yakitn obai io udah kalo mondinga' mongona'i boko hal ni'in. Pasti io tohu somuonyo obai boko hal ni'in tojadi di boko tompat inyo dikotohu'i urakng banya'.”

Kisah Boko Rasul 28:31

Io momboritoan mongona'i Koraja'an Allah. Io mongajar mongona'i Tuhatn Yesus, Rajo Inyo Dijanjian Allah nantai. Io momboritoan nantai agatn borani. Co nyiant inyo mohalaki io.

Kisah Boko Rasul 4:13

Watu boko pomimpitn mondinga' rasul Petrus ongko rasul Yohanes bopandir agatn borani ubo nantai, sia' hiratn obai koduo rasul nantai bayo urakng biaso. Koduo rasul nantai kinyo bopondidikan. Boko pomimpitn nantai jam monyadari aman Petrus ongko Yohanes nantai murid Yesus.

Kisah Boko Rasul 4:21

Urakng banya' momuji Allah moniant mujisat nantai obai urakng nantai lumpuh doi' lahir apo udah boumur lobih doi' ompat puluh tohutn hoyu' dinyamani. Jadi, boko pomimpitn urakng Yahudi nantai co ulih monomuan caro pakai' mohukupm koduo rasul nantai agatn co bulah urakng banya' godi. Koponsuahannyo boko pomimpitn urakng Yahudi nantai mombebasan koduo rasul nantai, apo totap morarakng sia' agatn ancapan ni'in: oca' sia' jangan agi' momboritoan ko urakng bukai ajaran inyo jadi diajaran Yesus.

Kisah Boko Rasul 4:31

Lopas jadi bodoa, tompat sia' bokumpul nantai boguyakng. Roh Allah monguaso'i sia' somuo, jadi sia' mongkitn borani momboritoan pomandiran Allah.

Kisah Boko Rasul 9:27

Apo Barnabas monulukng Saulus. Barnabas mongonalan io ko boko rasul. Barnabas mongisahan sama'an apo Saulus udah moniant Tuhatn Yesus dalapm pojalatan ko Damsyik. Barnabas pan momadahan ko sia' obai Tuhatn Yesus udah bopandir ko Saulus. Io pan monjolasan obai Saulus udah momboritoan mongona'i Yesus agatn borani di Damsyik.

Kisah Boko Rasul 9:28

Jadi, Saulus pan ngopal agatn sia' di Yerusalem. Di su'utn pan, Saulus hala momboritoan mongona'i Tuhatn Yesus agatn borani.

1 Korintus 14:13

Obai nantai, urakng inyo bopandir pakai baso roh gola' bodoa oca' io pan dionji'i komampuan pakai' monjolasan roti doi' pomandiran baso nantai ko urakng bukai inyo pocayo.

2 Korintus 3:12

Obai koi yakitn moharap'an mongona'i hal nantai, jadi koi borani momboritoan mongona'i Pojanjian Boharu nantai.

Filipi 1:14

Solaitn nantai, watu ku di ponjara, aku monjadi toladatn bagi boko somadikan kito inyo pocayo ko Tuhatn Yesus. Kobanya'an doi' sia' monjadi mongkitn borani momboritoan Kabar Boi'. Sia' co gola' momadahan Pomandiran Allah nantai.

2 Timotius 4:17

Apo, watu nantai, Tuhatn monyoroto'iku. Sio moonji'i kokuatan ko aku. Obai nantai, aku ulih momboritoan Kabar Boi' ko urakng inyo bukainyo urakng Yahudi. Watu nantai, aku co dihukupm mati samo sama'an lopas doi' tontorokapan bonatakng buas.