Kisah Boko Rasul 4:1 - Porjanjian Boharu Torjomahan Baso Dilakng Soari-ari

¹ Timpu Petrus ongko Yohanes ija' bopandir ko urakng banya' nantai, sia' duo didataki boko pomimpitn urakng Yahudi. Ado kopala' ponjago Rumah Allah, boboropo imam, huatan boboropo urakng doi' kolompok Saduki.

Kisah Boko Rasul 4:1 ပူးပေါင်းရင်းမြစ်များ

Matius 16:12

Obai nantai, hoyu' sia' mongoroti. Yesus kinyo bomasud oca' sia' monjago diri tohadap ragi roti. Sio bomasud oca' sia' monjago diri tohadap ajaran urakng Farisi ongko urakng Saduki.

Matius 22:16

Jadi, sia' monyiuh boko murid sia' huatan boko urakng inyo mondukukng Rajo Herodes botula' ko Yesus. Boko urakng nantai bopandir ko Yesus, “Guru, koi tohu Duatn urakng inyo jujur. Duatn mongajar agatn jujur mongona'i caro hidup sosuai agatn porintah Allah. Duatn co bopihak ko boko urakng totontu. Obai nantai, Duatn co gola' agatn sopo pan.

Matius 27:20

Apo boko imam kopala' ongko boko pomimpitn banso Yahudi mohasut urakng banya' nantai pakai' mominto oca' Barabas dilopasan huatan Yesus dihukupm mati.

Matius 27:41

Ubo nian jam boko imam kopala', boko guru agama Yahudi, huatan boko totuho banso Yahudi. Sia' moulu'-ulu' Yesus.

Matius 3:7

Apo banya' jam pomimpitn agama Yahudi pan datakng pakai' dibaptis. Ado doi' kolompok Farisi huatan kolompok Saduki. Watu Yohanes moniant sia', io bopandir, “Oi kaitn inyo jahat huatan licik sama'an ular biso! Jangan bopikir kaitn ulih morarian diri doi' hukupan Allah nononyo.

Lukas 20:1

Timpu ari bukainyo, di tongahlamanan Rumah Allah, Yesus mongajar huatan momboritoan Kabar Boi' mongonaꞌi Koraja'an Allah. Watu Sio mongajar, datakam boko imam kopala', boko guru Agama Yahudi huatan boko pomimpitn bukai doi' banso Yahudi.

Lukas 22:4

Obai nantai, Yudas botula' ongko bohoupm agatn boko imam kopala' huatan boko kopala' ponjago Rumah Allah mongonaꞌi samaꞌan apo io ulih monyorahan Yesus ko sia'.

Yohanes 15:20

Ingantcam pomandiran-Ku ni'in ko kaitn komai: Siku' urakng hulutn kinyo lobih pontikng doi' habakngnyo. Aman sia' udah mondorako'i Aku, jadi sia' pan paca'an mondorako'i kaitn. Apo aman sia' monuruti pomandiran-Ku, jadi sia' pan paca'an monuruti pomandiran kaitn.

Yohanes 18:3

Yudas datakng ko santai mombaba' kolompok urakng pakai' monangkap Yesus. Ado boboropo ponjago Rumah Allah inyo disiuh boko imam kopala' huatan boko pomimpitn agama Yahudi doi' kolompok Farisi. Ado jam pasukan tontara Romawi. Kolompok urakng nantai datakng agatn mombaba' obor huatan sonjato.

Kisah Boko Rasul 4:6

Imam Agukng datakng ko potomuan nantai jam. Damonyo Hanas. Ado jam boko urakng pontikng doi' koturutan Hanas nantai, tomansu' Kayafas, Yohanes, huatan Aleksander.

Kisah Boko Rasul 5:17

Timpu nantai, ado Imam Agukng agatn boko pongikutnyo. Sia' boasal doi' pomimpitn agama Yahudi doi' kolompok Saduki. Sia' monjadi tungi obai banya' urakng pocayo Kabar Boi' mongona'i Yesus inyo disampaian boko rasul.

Kisah Boko Rasul 5:24

Watu kopala' ponjago Rumah Allah agatn boko imam kopala' mondinga' nantai, sia' topocongo, botakutan la'apo inyo paca'an tojadi agatn kojadian nantai.

Kisah Boko Rasul 5:26

Jadi, kopala' pongawal Rumah Allah bosamo agatn boko potugasnyo botula' ko su'utn. Sia' honda' mombaba' agi' boko rasul nantai. Apo sia' gola' agatn urakng banya' inyo tongahan mondinga' ajaran boko rasul nantai. Gola'nyo urakng banya' nantai godi ongko monikapm sia' agatn batu. Obai nantai, pongawal Rumah Allah bosamo boko potugasnyo mombaba' boko rasul nantai kinyo agatn kokorasan.

Kisah Boko Rasul 6:12

Jadi sia' bulah urakng banya' godi agatn Stefanus. Boko pomimpitn masrakat huatan boko guru Poraturan agama Yahudi jumpat godi jam. Sia' somuo monangkap Stefanus ongko mombaba' io ko kolompok pomimpitn agama Yahudi inyo kotakan pontikng.

Kisah Boko Rasul 6:7

Kabar Boi' mongona'i Yesus torus diboritoan. Jumlah urakng inyo pocayo di Yerusalem mongkitn botambah banya'. Malahan banya' imam pocayo agatn Yesus jam.