Kisah Boko Rasul 3:12 - Porjanjian Boharu Torjomahan Baso Dilakng Soari-ari

¹² Petrus moniant obai somuo sia' nantai hiratn. Ongko, io bopandir, “Boko somadikanku urakng Israel! Jangan kaitn hiratn obai kojadian ni'in. Jangan kaitn borotian koi duo. Jangan kaitn bopikir koi duo bisi koboi'an husus di hadapan Allah sampai urakng lumpuh ni'in nyamanam. Jangan kaitn bopikir koi duo bisi kuaso siku' pakai' monyamani urakng ni'in.

Kisah Boko Rasul 3:12 ပူးပေါင်းရင်းမြစ်များ

Yohanes 7:18

Urakng inyo mongajar agatn pomandiran doi' dirinyo siku', io bayo goyap kohormatan pakai' dirinyo siku'. Apo urakng inyo goyap kohormatan pakai' Sio inyo moutusnyo, urakng nantai bujur bondar. Io kinyo monipu urakng bukai.

Kisah Boko Rasul 13:26

Boko somadikan koturutan Abrahapm, huatan boko urakng bukainyo urakng Yahudi udah pocayo agatn Allah: Yesus mombuka' jalatn oca' urakng ulih disolamant'an doi' hukupan dosa. Borito nantai udah disampaian ko kito somuo!

Kisah Boko Rasul 2:22

Petrus molajuan pandirnyo, Watu ni'in boko somadikanku urakng Israel, dinga'an pomandiranku ni'in. Yesus doi' laman Nazaret diutus ulih Allah. Allah udah mombutian nantai obai Allah molabuhan somuo macapm mujisat di tongah-tongah kaitn somuo molalu'i Sio. Kaitn udah mongotohu'i nantai.

Kisah Boko Rasul 3:11

Urakng inyo dinyamani nantai totap tuyut Petrus ongko Yohanes obai io kotakan bosukur. Sia' ado di salah sobuti' polantaran Rumah Allah inyo bodamoan ‘Polantaran Salomo’. Jadi somuo urakng inyo topocongo huatan hiratn nantai bonggidi'an mondataki sia' di santai.

Kisah Boko Rasul 3:13

Urakng inyo kaitn tiat huatan udah kaitn konal ni'in nyamanam agatn kuaso Yesus. Io nyamanam obai io huatan koi samo-samo pocayo ko kuaso Yesus. Allah udah bulah Yesus sangant tohormat. Yesus nantai Hulutn Allah, Allah inyo disombah angki-bayatn kito Abrahapm, Ishak ongko Yakub. Apo kaitn mombaba' Yesus ko gubernur Pilatus oca' Sio dihukupm mati. Pilatus nantai udah momotusan pakai' mombebasan Sio. Apo kaitn monula' Sio ongko minto oca' Pilatus mombebasan siku' urakng pombunuh pakai' kaitn daripado mombebasan Yesus. Sio nantai Inyo Suci huatan Inyo Bondar. Jadi, sobondarnyo kaitn mombunuh Sio inyo Puku' hidup. Apo Allah udah bulah Sio hidup agi' doi' komatian. Koi duo udah tohu hal nantai bondar obai koi tiat agatn mato kopala' koi siku'.

Roma 11:1

Aku botakutn: Kata'an Allah udah monula' umant-Nyo urakng Israel bai? Samo sokali cado! Obai aku urakng Israel huatan Allah kinyo monula' ku. Aku doi' koturutan Abrahapm, doi' suku Benyamin.

Roma 9:4

Sia' nam umant Allah. Sio mombulah sia' monjadi poana'an-Nyo. Sio monunju'an ko sia' obai Sio mulia. Sopanjakng sojarah sia', Sio mombulah boko pojanjian husus agatn sia'. Sio moonju' Hukupm Torat ko sia' huatan momadahannyo ko sia' caro sia' gola' monyombah Sio. Sio pan bulah banya' janji bukai agatn sia'.

2 Korintus 3:5

Aku co bomasud obai koi ado komampuan siku' inyo bulah koi sanggup molabuhan polayatan ni'in. Apo, koi sanggup obai kuaso Allah.

Wahyu 7:13

Lalu, siku' urakng doi' boko pomimpitn nantai bopandir ko aku, “Sopo kironyo sia' inyo momakai jubah putih nantai? Doi' mono kiro sia' datakng?”