Kisah Boko Rasul 28:23 - Porjanjian Boharu Torjomahan Baso Dilakng Soari-ari

²³ Ongko, sia' monontuan watu pakai' botomu agi' agatn Paulus. Pas ari nantai lobih banya' urakng datakng bokumpul di rumah tompat io monoluntukng. Doi' sunsukng tuntukng ko malapm Paulus monjolasan ko sia' mongona'i Koraja'an Allah. Io moingant'an sia' mongona'i boko hal inyo ditulis Musa huatan boko nabi watu joman komai. Agatn caro nantai, io bousaha moyakit'an sia' pakai' pocayo ko Yesus.

Kisah Boko Rasul 28:23 ပူးပေါင်းရင်းမြစ်များ

Kisah Boko Rasul 19:8

Paulus pan botula' ko rumah sombayakng agama Yahudi di kota Efesus. Somanah tigo bulatn, io opat mongajar di santai. Agatn borani io botikakng agatn boko urakng di santai. Io monjolasan mongona'i Koraja'an Allah. Io bousaha moyakit'an sia' obai Yesus nantai Rajo Inyo Dijanjian Allah inyo momorintah di Koraja'an Allah nantai.

Kisah Boko Rasul 18:28

Io kotakan pandai botikakng agatn boko urakng Yahudi inyo kinyo pocayo agatn Yesus. Di hadapan urakng banya', io molawatn sia' agatn koras. Io hala mongalahan sia'. Io momakai Buku Suci pakai' mombutian obai Yesus nantai Rajo Inyo Dijanjian Allah.

Kisah Boko Rasul 26:6

Pado joman komai, Allah bojanji moutus siku' urakng Rajo ko angki-bayatn kito huatan koduo bolas suku doi' banso kito Israel sangant moharap'an jam janji nantai ditopati. Nanam alasan sia' sobobondarnyo monyombah Allah. Sia' monyombah siakng ongko malapm. Doi' komai, aku pocayo Allah paca'an monopat'i janji-Nyo nantai. Habakngku Agripa, aku dituduh boko urakng Yahudi obai aku pocayo Allah udah monopat'i janji-Nyo nantai. Obai kopocaya'an nantai am aku diadili.

Kisah Boko Rasul 8:35

Jadi, Filipus monjolasan pomandiran nabi nantai sobondarnyo mongona'i Yesus. Ongko, Filipus momboritoan soluruh Kabar Boi' ko io.

Lukas 24:44

Lopas nantai Sio bopandir ko sia', “Watu Aku ija' sosamo agatn kaitn komai, Aku udah momadahan ko kaitn obai somuo inyo totulis mongonaꞌi Aku gola' tojadi, doi' inyo totulis dalapm boko buku Musa, buku boko Nabi, sampai buku Mazmur.”

Kisah Boko Rasul 18:4

Apo sotiap Ari Sabat, Paulus botula' ko rumah sombayakng agama Yahudi. Di santai io bopandir ko somuo urakng inyo datakng, boi' boko urakng Yahudi sama'an nian jam ko boko urakng Yunani. Io bousaha moyakit'an sia' oca' pocayo agatn Yesus.

Yohanes 4:34

Kato Yesus ko sia', “Makatan-Ku ia'an: molabuhan kohonda' Allah Bopai inyo moutus Aku, ia'an monjadi'i somuo pokoroja'an inyo Sio onju' ko Aku.

Filemon 1:2

Ongko ko Apfia, somadikan soiman kito, huatan Arkhipus inyo bokorojo humpas-pulas molayati Tuhatn bosamo agatn kito. Surat ni'in pan ko somuo jomaat inyo bokumpul di rumah kolai, Filemon.

Markus 4:34

Yesus hala momakai poumpamoan aman Sio mongajar boko urakng nantai. Apo aman Sio siku' agatn boko murid-Nyo, Sio monjolasan somuonyo ko sia'.

Lukas 16:28

Aku bisi lima' urakng somadikan inyo ija' hidup di dunia. Siuh Lazarus momporingant'i sia' pakai' botongga' bulah dosa huatan hidup monyonangan hati Allah oca' nononyo lopas jadi mati, sia' co mansu' ko tompat ajab sonsaro ni'in jam.’

Kisah Boko Rasul 23:11

Pas malapm nantai Tuhatn Yesus bodiritn di sopia' Paulus ongko bopandir ko io, “Jangan gola'. Kolai udah borani momboritoan mongona'i Aku di Yerusalem. Nononyo kolai gola' borani jam momboritoan mongona'i Aku di Roma.”

Kisah Boko Rasul 24:14

Apo aku moaku'i ni'in: Aku mongikuti boko ajaran Tuhatn Yesus. Sia' mongatoan ajaran nantai salah. Apo aku sobobondarnyo molayati Allah inyo disombah ulih angki-bayatn koi. Aku pocayo somuo hal inyo totulis dalapm boko Hukupm Torat huatan buku boko nabi.

Kisah Boko Rasul 28:31

Io momboritoan mongona'i Koraja'an Allah. Io mongajar mongona'i Tuhatn Yesus, Rajo Inyo Dijanjian Allah nantai. Io momboritoan nantai agatn borani. Co nyiant inyo mohalaki io.

Filemon 1:22

Solaitn nantai pan, tulukng siap'an tompat ponoluntukan di rumah kolai pakai' ku. Obai, aku yakitn Allah paca'an mongabulan doa kaitn sampai aku dibebasan lalu ulih bobali' agi' ko kaitn.