Kisah Boko Rasul 26:18 - Porjanjian Boharu Torjomahan Baso Dilakng Soari-ari

¹⁸ Kolai paca'an monulukng sia' oca' mongoroti jadi sia' co hidup dalapm kopocaya'an inyo salah, apo bobali' pocayo inyo bondar. Kolai paca'an monulukng sia' oca' mongoroti jadi sia' kinyo hidup dibabah kuaso Iblis agi', apo bobali' ongko hidup di babah kuaso Allah. Agatn ubo nian, aman sia' pocayo agatn Aku, ongko boko dosa sia' paca'an diamputi. Sia' mondapat tompat di antaro umant Allah.’ Nanam pomandiran Yesus ko Aku.

Kisah Boko Rasul 26:18 ပူးပေါင်းရင်းမြစ်များ

Matius 4:10

Apo Yesus bopandir ko io, “Oi Sitatn, jouhancam diri kolai doi' Aku! Obai, ado pomandiran Allah inyo ditulis dalapm Buku Suci, Sombahcam Tuhatn Allah kolai. Layati Sio ja'am.”

Matius 4:16

Banso inyo hidup dalapm potakng, udah moniant Torakng inyo bosar huatan torakng udah timbul pakai' sia' inyo hidup dalapm bayakng-bayakng komatian.”

Lukas 1:77

Kolai tajahan molabuhan nantai oca' moonji'i pongorotian ko umant Sio, siaꞌ tajahan disolamant'an obai boko dosa siaꞌ diamputi.

Lukas 2:32

Ponyolamant ni'in ubo torakng inyo monjolasan kohonda' Tuhatn ko boko urakng inyo bukainyo banso Yahudi. Sio pan bulah umant Duatn Israel dihormati”.

Lukas 24:45

Lopas nantai Yesus pan mombuka' pikiran sia' pakai' mongoroti masud Buku Suci.

Lukas 24:47

Lalu agatn kuaso-Nyo tajahan diboritoan kabar obai urakng gola' tongga' bulah dosa lalu monyonangan hati Allah, ongko dosa sia' tajahan diamputi. Borito ni'in gola' disampaian, mula'i doi' kota Yerusalem lalu ko somuo banso bukai di dunia.

Lukas 4:18

“Roh Tuhatn Allah ado di Aku, obai Sio momilih Aku pakai' monyampaian kabar boi' ko boko urakng jaro; Sio moutus Aku pakai' mongabaran

Yohanes 17:17

Pulahcam sia' monjadi husus umputn Duatn agatn momakai ajaran inyo bondar. Pomandiran Duatn nantaiam inyo bondar.

Yohanes 3:19

Hukupan nantai tojadi obai ni'in: Torakng udah datakng ko dunia. Apo monsio lobih sonang agatn golap daripado torakng. Sia' lobih sonang agatn golap obai boko porbuatan sia' jahat.

Yohanes 4:10

Timbas Yesus, “Kolai bolupm tohu mongona'i poonju' doi' Allah. Sobondarnyo kolai bolupm konal sopo Aku inyo minto minum. Aman kolai tohu boko hal nantai, pasti kolai inyo minto minum ko Aku. Lalu, Aku paca'an moonji'i kolai ara'i kohidupan.”

Yohanes 4:14

Apo sotiap urakng inyo minum ara'i inyo Aku onju' ko io, io co paca'an korahakan agi' somanah-manahnyo. Obai, ara'i inyo paca'an Aku onju' ko io paca'an monjadi ubo mato ara'i di dalapm dirinyo. Ara'i nantai paca'an torus-norus mongalir huatan moonji'inyo hidup somanah-manahnyo.”

Yohanes 8:12

Yesus bopandir agi' ko urakng banya'. Kato-Nyo, “Aku ninam torakng dunia. Sotiap urakng inyo tuyut Aku, io co paca'an bojalatn di kompotakan, apo io paca'an ado torakng pakai' kohidupannyo.”

Yohanes 9:39

Kato Yesus, “Aku datakng ko dunia ni'in pakai' mohakipi, oca' boko urakng buto ulih moniant huatan ubo nian jam oca' boko urakng inyo ulih moniant, sia' monjadi buto.”

Yohanes 9:5

Somanah Aku ado di dunia, Aku ninam torakng dunia.”

Kisah Boko Rasul 10:43

Pado joman komai, boko nabi jam momadahan mongona'i Sio obai sia' monulis mongona'i Sio, ia'an Rajo Inyo Dijanjian Allah. Sia' monulis obai Sio ado kuaso pakai' moamputi boko dosa somuo urakng inyo pocayo agatn Sio.”

Kisah Boko Rasul 13:47

Obai Allah udah monyiuh koi. Kato-Nyo, ‘Aku udah moutus kaitn pakai' monjadi torakng inyo monyampaian Kabar Boi' ko boko banso inyo bukainyo banso Yahudi. Oca' somuo kaitn momboritoan kosolamant'an ko boko urakng di soluruh bumi.’ ”

Kisah Boko Rasul 2:38

Timbas Petrus, “Tinggalan cam dosa kaitn ongko hidup monyonangan hati Allah. Kaitn gola' dibaptis pakai' monunju'an obai kaitn pocayo ko Yesus Kristus. Agatn ubo nian, ongko dosa kaitn paca'an diamputi, ongko kaitn paca'an monorima' Roh Allah.

Kisah Boko Rasul 20:21

Aku hala mongajar agatn torus torakng, boi' ko boko urakng Yahudi huatan ko boko urakng Yunani oca' sia' botongga' bulah dosa huatan hidup monyonangan hati Allah. Sia' gola' pocayo ko Yesus, Tuhatn inyo bokuaso pucu' kito.

Kisah Boko Rasul 20:32

Ni'inan, aku monyorahan kaitn ko Allah. Mudahan Allah molinduki kaitn. Totap ja' pocayo ko Kabar Boi' mongona'i koboi'an Allah. Mudahan Allah huatan Kabar Boi' nantai hala bulah hati kaitn pocayo ko Yesus mongkitn kuat. Obai Allah bokuaso moonji'i tuah inyo udah disodiaan husus bayo pakai' umant kokidah-Nyo.

Kisah Boko Rasul 26:19

Obai nantai, Habakngku Agripa, aku kotakan monaati porintah inyo Yesus onju' ko aku dalapm poniant'an doi' sorugo.

Kisah Boko Rasul 26:23

Rajo Inyo Dijanjian Allah gola' ajab sonsaro sampai mati. Apo sia' pan monulis jam obai Sio paca'an monjadi urakng potamo inyo bobali' hidup doi' komatian. Agatn caro nantai Sio ulih monjadi ubo torakng inyo monjolasan kohonda' Allah ko banso Yahudi huatan ko boko banso inyo bukainyo banso Yahudi.”

Kisah Boko Rasul 3:19

Obai nantai am, tongga'ancam kaitn bulah dosa huatan bobali' taat agatn Allah. Labuhancam nantai oca' boko dosa kaitn diamputi.

Kisah Boko Rasul 5:31

Yesus udah noi' ko sorugo ongko dudu' di tompat inyo kotakan tohormat di sopia' kanan Allah. Allah moonji'i kuaso ko Yesus pakai' momimpitn ongko monyolamant'an urakng. Allah molabuhan nantai oca' kito urakng Israel mondapat kosompatan pakai' diamputi, ia'an aman kito botongga' bulah dosa ongko monuruti Allah.

Roma 8:17

Nah, aman kito ni'in poana'an-Nyo, jadi kito pan tajahan monorima' somuo borokat inyo Sio sodia'an pakai' poana'an-Nyo. Samo sama'an Kristus mondapat'an borokat doi' Allah, kito pan tajahan mondapat'an borokat. Masudnyo, aman kito mondorita' samo sama'an Kristus, kito tajahan monorima' kohidupan inyo mulia samo sama'an Sio jam.

1 Korintus 1:30

Jadi, kaitn ado hubukan dokat agatn Kristus Yesus obai porbuatan Allah, bukainyo obai porbuatan kaitn. Yesus monjadi kopintar-corodi'an Allah bagi kito. Molalu'i Yesus, kito monjadi bondar di hadapan Allah. Kito pan monjadi umant husus pakai' umputn Sio. Sio monanggukng hukupan dosa kito pakai' monobus kito.

2 Korintus 4:4

ia'an boko urakng inyo kinyo honda' pocayo. Rajo Sitatn, inyo monguaso'i dunia ni'in, udah bulah sia' co mongoroti. Io bulah mato hati sia' monjadi buto oca' sia' co moniant cohayo, ia'an Kabar Boi' mongona'i Kristus inyo mulia, Kristus inyo nianam samo agatn rupo Allah.

2 Korintus 4:6

Obai, Allah inyo bopandir, “Kohonda'nyo ado torakng inyo bocohayo doi' kogolapan!” Sio jam inyo mombulah torakng bocohayo di dalapm hati kito. Ia'an, Sio mombulah oca' kito ngoroti agatn hal ni'in: Komulia'an Allah dapat ditiat di dalapm muho Kristus.

2 Korintus 6:14

Jangannam kaitn bosatu agatn urakng inyo kinyo pocayo inyo mombaba' kaitn monjouh doi' Kristus. Obai, co mungkitn urakng inyo boi' dapat bokumpul agatn urakng inyo jahat? Co mungkitn torakng ulih bosatu agatn golap?

Galatia 2:20

Obai aku kinyo hidup agi' agatn caro sama'an komai. Ni'in, Kristus monontuan caro hidupku. Aku hidup di dunia ni'in agatn caro boharu obai aku pocayo ko Sio. Sio nantai Ana' Allah inyo kotakan mongasihi aku. Sio monyorahan diri-Nyo sampai mati sobagai kurbatn inyo monggonti'i aku.

Galatia 3:14

Watu Yesus Kristus monyolamant'an kito doi' hukupan nantai, borokat inyo dionji'i ko Abrahapm dionji'i jam ko boko urakng bukainyo Yahudi. Solaitn nantai, aman kito pocayo ko Yesus, kito pan ulih monorima' Roh inyo dijanjian Allah.

Galatia 3:2

Timbasibo potakutanku ni'in: Ma'apo kaitn monorima' Roh Allah? Apobai kaitn monorima' Roh Allah obai kaitn monaati somuo porintah huatan poraturan Allah inyo ditulis Musa dalapm buku Hukupm Torat? Samo sokali cado! Kaitn monorima' Roh Allah obai kaitn pocayo Kabar Boi' mongona'i Yesus inyo aku boritoan ko kaitn!

Efesus 1:11

Allah mongorojoan somuo hal sosuai agatn kohonda'-Nyo huatan koputusan-Nyo siku'. Doi' mulonyo, Sio udah ado tujuan pakai' momilih koi. Jadi, di dalapm Kristus, Allah mombulah koi monjadi umat-Nyo.

Efesus 1:14

Roh inyo dionju'Nyo ko kito ia'an jaminan obai Sio paca'an hala moonji'i ko kito somuo inyo Sio janjian, sampai nononyo kito inyo monjadi umant umputn-Nyo dibebasan doi' dosa. Obai nantai, Allah patut dipuji obai Sio mulia.

Efesus 1:18

Aku bodoa Allah mombuka' hati kaitn oca' kaitn bondar-bondar mongoroti somuo inyo kaitn ulih harapan doi' Allah obai Sio udah moningkau kaitn monjadi umat-Nyo. Aku pan bodoa oca' kaitn tohu kotakng banya' borokat inyo paca'an Allah onju' ko kaitn, sobagai boko urakng husus umputn-Nyo.

Efesus 1:7

Watu Ana'-Nyo mati di kayu salib, Sio mombayar agatn darah-Nyo pakai' mombebasan kito doi' hukupan dosa. Jadi, molalu'i Ana'-Nyo, Allah moamputi dosa kito. Allah molabuhan somuonyo nantai obai kasih karunia-Nyo inyo kotakng bosar.

Efesus 2:8

Obai kaitn disolamant'an obai Allah monunju'an kasih karunia-Nyo ko kaitn huatan obai kaitn pocayo ko Kristus Yesus. Nantai bukainyo boko hal inyo kaitn usahaan, apo boko hal inyo Allah onju' ko kaitn.

Efesus 4:18

Sia' kinyo dapat mongoroti mongona'i Allah obai sia' tinggal di dalapm potakng, jouh doi' kohidupan inyo dionju' Allah. Obai, sia' kinyo mongonal Allah, huatan obai sia' korikng hati.

Efesus 5:11

Jangan kaitn jumpat molabuhan boko porbuatan urakng inyo ija' hidup dalapm kogolapan. Somuo nantai sia-sia ja'am. Apo kaitn gola' botindak oca' boko porbuatan sia' kotohuan.

Efesus 5:14

Nantaiam sobabnyo ado pomandiran ni'in, “Oi kulo inyo tidu', huascam! Kulo inyo mati, bobali' hidup cam! Kristus paca'an bosinar ko kulo.”

Efesus 5:8

Memang komainyo kaitn bodiapm di dalapm kogolapan. Apo watu ni'in kaitn udah mansu' ko dalapm torakng obai kaitn mongonal Tuhatn Yesus. Jadi, kaitn gola' hidup agatn caro inyo sosuai pakai' boko urakng inyo hidup di dalapm torakng.

Efesus 6:12

Obai kito boparakng bukatnnyo molawatn monsio apo molawatn somuo macapm kuaso golap di dunia ni'in, huatan molawatn somuo boko roh jahat di awakng-awakng.

2 Timotius 2:26

Agatn ubo nian, boko urakng monjadi sadar huatan lopas doi' joyat Rajo Sitatn. Joyat nantai inyo udah mongujut sia' somanah ni'innam, sampai sia' jumpat kohonda' Rajo Sitatn.

Ibrani 10:10

Obai, memang Yesus Kristus udah molabuhan kohonda' Allah. Ia'an, Sio momposombahan bukakng-tubuh-Nyo siku' sokali mo pakai' somanah-manahnyo. Sio molabuhan nantai oca' kito di borosihi doi' dosa kito.

Ibrani 10:14

Agatn momposombahan sobuti' kurbatn nantai, Sio mombulah oca' boko urakng ulih monjadi borosih doi' dosa sia'. Sio mombulah sia' monjadi sompurna pakai' somanah-manahnyo.

Ibrani 11:6

Aman urakng kinyo pocayo, co mungkitn io ulih monyonangan hati Allah. Obai, urakng inyo datakng ko Allah gola' pocayo obai Allah ado. Io pan gola' pocayo obai Allah moonji'i upah ko sotiap urakng inyo bondar-bondar moncari'i Sio.

Ibrani 9:15

Obai nantai, Kristus nam Porontaro inyo moadoan pojanjian boharu, ia'an oca' urakng inyo ditingkau Allah ulih monorima' somuo borokat pakai' somanah-manahnyo inyo udah dijanjian-Nyo. Somuonyo nantai ulih tojadi obai udah ado inyo mati, ia'an Kristus. Komatian-Nyo mombebasan urakng doi' boko kosalahan inyo dilabuhan sia' timpu pojanjian inyo potamo ija' bolaku.

Yakobus 2:5

Boko somadikan inyo ku kasihi! Dinga'anbo ni'in! Allah momilih boko urakng jaro di dunia pakai' monjadi urakng inyo bondar-bondar konal agatn Sio. Obai sia' pocayo ko Yesus, jadi sia' monjadi ahli waris Koraja'an Allah. Nantaiam kodampuan inyo Allah janjian ko somuo urakng inyo mongasihi Sio.

1 Petrus 1:4

Ia'an kito ulih boharap agatn kuat obai kito paca'an monorima' borokat inyo Allah janjian. Borokat nantai disimpatn di sorugo pakai' kaitn. Borokat nantai tahatn bondar, kinyo tohu rusa', kinyo tohu buru', kinyo tohu kusap.

1 Petrus 2:25

Komai, kaitn samo sama'an domba inyo sosat. Apo ni'in kaitn udah tuyut Kristus. Sio samo sama'an gombala inyo molinduki jiwa kaitn.

1 Petrus 2:9

Apo kaitn nam banso inyo dipilih Allah. Kaitn nam boko urakng inyo molayati Kristus, samo sama'an boko imam molayati rajo. Kaitn nam umant husus umputn Allah, boko urakng inyo ado hubukan agatn Allah siku'. Allah momilih kaitn oca' kaitn ulih momboritoan mongona'i somuo porbuatan bosar inyo Sio labuhan, ia'an Sio inyo moningkau kaitn koluar doi' kogolapan, lalu mansu' ko dalapm torakng-Nyo inyo luar biaso. Samo sama'an inyo totulis di dalapm Buku Suci,

1 Yohanes 1:9

Apo, aman kito moaku'i boko dosa kito ko Allah, Sio monunju'an obai Sio sotia huatan adil. Obai nantaiam, Sio moamputi boko dosa kito, huatan momborosihi kito doi' boko porbuatan kito inyo jahat.

1 Yohanes 2:12

Poana'anku! Aku monulisan ni'in ko kaitn obai dosa kaitn udah diamputi obai porbuatan Yesus Kristus.

1 Yohanes 3:8

Apo urakng inyo totap bulah dosa, rotinyo io ia'an ana' Rajo Sitatn. Nantai udah jolas obai Rajo Sitatn hala bulah dosa doi' sobolupm dunia dipulah. Nantaiam alasan Ana' Allah udah datakng ko dunia, ia'an oca' Sio monongga'an pokoroja'an Rajo Sitatn.

1 Yohanes 5:19

Kito tohu obai kito boasal doi' Allah. Apo somuo urakng di dunia sia' ado di babah kuaso Rajo Sitatn inyo jahat.

Yudas 1:1

Surat ni'in doi' aku, Yudas, hulutn Yesus Kristus. Aku pan somadikan Yakobus. Surat ni'in ko boko urakng inyo ditingkau, ia'an boko urakng inyo dikasihi Allah Bopai, boko urakng inyo Allah jago oca' ulih monjadi umputn Yesus Kristus.

Wahyu 21:27

Apo somuo inyo campah culih dibaba' mansu' ko dalapm kota nantai. Ubo nian jam boko urakng inyo molabuhan kojahatan huatan tumbukan. Inyo ulih mansu' bayo sia' inyo damonyo totulis dalapm buku Ana' Domba nantai, ia'an Buku Kohidupan.