Kisah Boko Rasul 26:10 - Porjanjian Boharu Torjomahan Baso Dilakng Soari-ari

¹⁰ Jadi pado watu aku bodiapm di Yerusalem, aku molawatn boko urakng inyo pocayo agatn Yesus. Aku dapat hak doi' boko imam kopala' pakai' momansu'an banya' doi' sia' ko dalapm ponjara. Aku kotakan sotuju bondar aman sia' dihukupm mati.

Kisah Boko Rasul 26:10 ပူးပေါင်းရင်းမြစ်များ

Kisah Boko Rasul 7:58

Sia' mondudus io koluar kota, ongko mula'i monikapi io agatn batu pakai' mombunuh io. Boko urakng inyo bosasi molawatn Stefanus nantai molopasan jubah sia'. Sia' moninggalan boko jubah nantai di kaki siku' urakng pomuda' oca' io monjago'inyo. Pomuda' nantai bodamo Saulus.

Kisah Boko Rasul 9:21

Somuo urakng inyo mondinga' io monjadi kotakan hiratn. Kato sia', “Tontainyo io nianam inyo hala mondorako'i boko urakng inyo pocayo agatn Yesus di Yerusalem! Ubonyo io datakng ko si'itn honda' monangkap boko urakng inyo pocayo agatn Yesus jam huatan honda' mombaba' sia' ko Yerusalem oca' ulih diadili boko imam kopala'.”

Kisah Boko Rasul 9:26

Jadi, Saulus bobali' ko Yerusalem. Watu io datakng di Yerusalem, io moncubo ngopal agatn boko urakng inyo pocayo Yesus di su'utn. Apo sia' somuo ija' gola' agatn io. Sia' kinyo pocayo obai io udah bondar-bondar monjadi pocayo Yesus.

Kisah Boko Rasul 9:32

Timpu nantai, Petrus bojalatn kolilikng doerah nantai. Suatu watu, io botula' usi'an ko boko urakng inyo pocayo Yesus di kota Lida.

Kisah Boko Rasul 9:41

Petrus mouluran longannyo, monulukng Tabita bodiritn. Lopas nian, Petrus moningkau somuo botina' balu huatan boko urakng bukai inyo pocayo Yesus. Io moniant'an ko sia' obai Tabita udah bobali' hidup doi' komatian.

1 Korintus 15:9

Obai, di antaro somuo rasul, aku inyo palikng nyiant pasalnyo. Aku kinyo cucu' disobut rasul, obai komainyo aku mondorako'i boko urakng inyo pocayo ko Yesus.

Galatia 1:13

Apo, sobolupm aku pocayo ko Yesus, aku hidup sosuai agatn agama Yahudi. Kaitn udah mongotohu'i caro hidupku sokomai dalapm agama Yahudi nantai. Aku kotakan mondorako'i boko urakng inyo pocayo ko Yesus. Aku bousaha pakai' mombonasoan sia'.

Efesus 1:1

Surat ni'in doi' aku, Paulus. Aku di tingkau pakai' monjadi rasul Kristus Yesus obai nantai kohonda' Allah. Surat ni'in ko somuo umant husus umputn Allah di kota Efesus, ia'an boko urakng inyo pocayo ko Kristus Yesus.

Wahyu 17:6

Aku moniant botina' nantai komabu'an obai minum darah boko urakng kudus, ia'an boko urakng inyo dibunuh obai sia' momboritoan mongona'i Yesus. Pas aku moniant botina' nantai, aku kotakan hiratn.