Kisah Boko Rasul 24:5 - Porjanjian Boharu Torjomahan Baso Dilakng Soari-ari

⁵ Koi udah moniant obai urakng ni'in pongacau. Di soluruh dunia, io bulah korusuhan di antaro somuo urakng Yahudi. Io jam momimpitn kolompok urakng inyo jumpat ajaran Urakng Nazaret nantai.

Kisah Boko Rasul 24:5 ပူးပေါင်းရင်းမြစ်များ

Matius 10:25

Udah cukup aman siku' urakng murid monjadi samo sama'an gurunyo huatan siku' urakng hulutn monjadi samo sama'an habakngnyo. Aku ni'in pomimpitn kaitn huatan sia' udah moningkau Aku sobagai Rajo Sitatn. Jadi, pasti paca'an mompolakuan kaitn agatn lobih jahat agi'!.”

Matius 2:23

Sia' botula' ko laman inyo bodamo Nazaret ongko bodiapm di su'utn. Kojadian nantai tojadi oca' pomandiran Tuhatn Allah monjadi nyata. Timpu joman komai boko nabi monulis obai Rajo Inyo Dijanjian Allah paca'an disobut ‘Urakng Nazaret.’

Markus 1:24

“Ih! Yesus, urakng doi' laman Nazaret, Duatn honda' bulah lapo agatn koi? Aku tohu Duatn Inyo Suci doi' Allah! Kata'an Duatn datakng pakai' mombonasoan koi ni'in bai?”

Lukas 23:19

(Nah, Barabas ditamoan ko dalapm ponjara obai di kota Yerusalem io bulah korusuhan molawatn pomorintah Romawi. Io pan mombunuh urakng jam.)

Lukas 23:2

Di santai sia' monuduh Sio. Kato sia', “Urakng ni'in udah monyosat'an banso koi. Sio morarakng boko urakng pakai' mombayar pajak ko kaisar di Roma. Sio jam bopandir obai Sio nantai rajo, ia'an Rajo Inyo Dijanjian Allah, ia'an siku' rajo inyo koi sobut ‘Kristus’.”

Lukas 23:25

Biar pan Barabas ditamoan ko dalapm ponjara obai bulah korusuhan huatan pombunuhan, Pilatus totap molopasan Barabas, lalu monyiuh boko projuritnyo pakai' mohukupm mati Yesus di kayu salib obai nantai kohonda' boko urakng banyaꞌ.

Lukas 23:5

Apo boko pomimpitn urakng Yahudi hala nyosahan. Kato sia', “Sio mohasut boko urakng pakai' momborontak. Niannam pongajaran-Nyo di soluruh tanah urakng Yahudi. Sio mula'i doi' doerah Galilea, sampai ko kota Yerusalem ni'in!”

Kisah Boko Rasul 15:5

Apo ado boboropo urakng inyo pocayo agatn Yesus inyo komainyo pomimpitn agama Yahudi doi' kolompok Farisi. Sia' bopandir, “Boko urakng pocayo inyo bukainyo urakng Yahudi gola' disunant samo sama'an urakng Yahudi. Kito gola' monyiuh sia' pakai' monaati somuo poraturan inyo ditulis Musa.”

Kisah Boko Rasul 21:28

huatan mondorah, “Oi urakng Yahudi, tulukngbo! Ninam io inyo mongajar somuo urakng di mono-mono pakai' molawatn banso kito. Io mongajar urakng pakai' molawatn porintah huatan poraturan Allah inyo ditulis Musa dalapm buku Hukupm Torat. Io jam mongajar urakng pakai' co morogo'i Rumah Allah ni'in. Malahan timpu ni'in io udah bulah kotor socaro rohani tompat suci ni'in obai io mombaba' urakng bukai Yahudi ko si'itn.”

Kisah Boko Rasul 22:22

Urakng banya' nantai mondinga'an Paulus sampai io bopandir obai Tuhatn moutus io ko boko urakng inyo bukai Yahudi. Apo lopas nantai, sia' mondorah agatn kotakan borakng, “Bunuhcam urakng ni'in! Obai kinyo cucu' io hidup!”

Kisah Boko Rasul 24:14

Apo aku moaku'i ni'in: Aku mongikuti boko ajaran Tuhatn Yesus. Sia' mongatoan ajaran nantai salah. Apo aku sobobondarnyo molayati Allah inyo disombah ulih angki-bayatn koi. Aku pocayo somuo hal inyo totulis dalapm boko Hukupm Torat huatan buku boko nabi.

Kisah Boko Rasul 24:4

Apo, soboi'nyo aku co mombuakng banya' watu duatn. Aku bayo minto agatn hormat oca' duatn bosodia mondinga' huatan monorima' pongaduan koi, inyo honda' aku jolasan socaro singkat.

Kisah Boko Rasul 25:7

Lopas jadi Paulus dibaba' mansu' ko ruakan nantai, somuo urakng Yahudi inyo datakng doi' Yerusalem bodiritn mongoliliki io. Sia' moajuan banya' tuduhan inyo borat tohadap io. Apo sia' kinyo ulih mombutiannyo.

Kisah Boko Rasul 26:5

Sia' udah manah konal agatn aku. Jadi, aman sia' honda', sia' ulih mongisahan mongona'i caro hidupku komai. Aku tomansu' kolompok urakng Farisi, ia'an kolompok urakng inyo palikng taat molabuhan somuo poraturan agama kito.

Kisah Boko Rasul 28:22

Apo koi kalo mondinga' mongona'i kopocaya'an inyo kolai jumpati nantai. Banya' urakng di mono-mono bopandir molawatn kopocaya'an nantai. Jadi, koi honda' mondinga' lansukng doi' kolai mongona'i kopocaya'an kolai nantai.”

Kisah Boko Rasul 5:17

Timpu nantai, ado Imam Agukng agatn boko pongikutnyo. Sia' boasal doi' pomimpitn agama Yahudi doi' kolompok Saduki. Sia' monjadi tungi obai banya' urakng pocayo Kabar Boi' mongona'i Yesus inyo disampaian boko rasul.

Kisah Boko Rasul 6:13

Ongko sia' mombaba' boko sasi inyo mongatoan boko hal inyo kinyo bondar mongona'i io. Kato sia', “Io ni'in hala mohayam Rumah Allah inyo suci ni'in. Io pan hala mohayam Porintah Allah inyo ditulis Musa dalapm Hukupm Torat.

1 Korintus 11:19

Memang gola' ado popisahan di antaro kaitn. Alasannyo oca' nononyo paca'an jolas sopo di antaro kaitn inyo tahatn uji.

1 Korintus 4:13

Timpu boko urakng bopandir monjahai'an koi, koi totap bopandir boi' ko sia'. Sampai ni'in pan, koi monjadi sampah dunia, inyo dibuakan ja'am.

1 Petrus 2:19

Aman kaitn sadar obai kohonda' Allah, kaitn kuat monanggukng pondorita'an inyo kinyo cucu' kaitn tanggukng jadi Allah paca'an momborokati kaitn.