Kisah Boko Rasul 22:5 - Porjanjian Boharu Torjomahan Baso Dilakng Soari-ari

⁵ Imam Agukng huatan somuo kolompok pomimpitn agama inyo kotakan bokuaso ulih momadahan obai hal nantai bondar. Obai aku mondapat'an boko surat doi' sia' inyo ditujuan ko boko pomimpitn boko rumah sombayakng agama Yahudi di kota Damsyik. Di kota nantai ado jam boko urakng inyo jumpat boko ajaran Tuhatn Yesus. Boko surat nantai moonji'i hak oca' aku ulih monangkap sia'. Hajatku honda' mombaba' sia' bobali' ko kota Yerusalem ni'in, oca' sia' dihukupm.

Kisah Boko Rasul 22:5 ပူးပေါင်းရင်းမြစ်များ

Lukas 22:66

Pas sunsukng, ado potomuan kolompok pomimpitn agama Yahudi inyo kotakng pontikng. Boko imam kopala' huatan boko guru agama Yahudi ado di santai. Lalu Yesus dibaba' ko hadapan sia'.

Kisah Boko Rasul 1:15

Lopas nantai boboropo ari, ado kiro-kiro soratus duo puluh urakng inyo pocayo ko Yesus bokumpul watu nantai. Petrus bodiritn di antaro sia' somuo. Katonyo,

Kisah Boko Rasul 13:26

Boko somadikan koturutan Abrahapm, huatan boko urakng bukainyo urakng Yahudi udah pocayo agatn Allah: Yesus mombuka' jalatn oca' urakng ulih disolamant'an doi' hukupan dosa. Borito nantai udah disampaian ko kito somuo!

Kisah Boko Rasul 2:29

Petrus torus bopandir, Watu ni'in boko somadikan, aku pontikng bopandir torus torakng ko kaitn. Daud, rajo angki-bayatn kito nantai pasti io co monulis pomandiran nantai mongona'i dirinyo siku'. Io udah mati huatan dipasaram. Pasarannyo sampai ni'in ija' ado.

Kisah Boko Rasul 22:1

Kato Paulus, “Boko somadikan huatan boko pombopaian, dinga'anku bo. Aku honda' bopandir ko kaitn pakai' mombela diri siku'.”

Kisah Boko Rasul 23:1

Paulus moncorona'i lansukng ko boko pomimpitn Yahudi nantai. Katonyo, “Boko somadikan, sampai ari ni'in aku totap hidup agatn hati nurani inyo borosih di hadapan Allah.”

Kisah Boko Rasul 23:6

Paulus udah mongotohu'i di antaro boko pomimpitn inyo hadir, ado inyo doi' kolompok Saduki huatan ado jam inyo doi' kolompok Farisi. Io udah mongotohu'i urakng Saduki kinyo pocayo aman urakng mati paca'an hidup agi'. Sia' jam kinyo pocayo ado boko molekat damo boko roh. Apo urakng Farisi pocayo somuo hal nantai. Obai nantaiam, io mondorah, “Boko somadikan, aku ni'in urakng Farisi. Bopaiku pan urakng Farisi. Aku pocayo obai urakng mati paca'an hidup agi'. Nanam alasan aku diadili ari ni'in!” Pomandiran Paulus bunyi nantai pakai' bulah boko urakng Farisi huatan boko urakng Saduki di santai botikakng. Potomuan sia' nantai monjadi tobagi-bagi.

Kisah Boko Rasul 26:10

Jadi pado watu aku bodiapm di Yerusalem, aku molawatn boko urakng inyo pocayo agatn Yesus. Aku dapat hak doi' boko imam kopala' pakai' momansu'an banya' doi' sia' ko dalapm ponjara. Aku kotakan sotuju bondar aman sia' dihukupm mati.

Kisah Boko Rasul 26:11

Aku pan opat mondorako'i sia' inyo kotomuanku dalapm boko rumah sombayakng. Aku bousaha momoso sia' pakai' co pocayo agi' agatn Yesus. Aku kotakan godi agatn sia' sampai aku monyasah sia'. Aku monyasah sia' ko boko kota bukai jam oca' aku dapat mondorako'i sia'.

Kisah Boko Rasul 26:12

Nanam alasan aku botula' ko Damsyik. Aku mondapat'an hak doi' boko imam kopala' pakai' mondorako'i boko urakng inyo pocayo agatn Yesus.

Kisah Boko Rasul 28:17

Lopas jadi tigo ari, Paulus mohundakng boko pomimpitn urakng Yahudi di Roma pakai' monomu'i io. Lopas jadi sia' bokumpul, io bopandir ko sia', “Boko somadikan, aku co bulah salah molawatn banso kito. Aku pan co molanggar adat baso angki-bayatn kito. Apo, di kota Yerusalem boko urakng Yahudi monangkap aku. Ongko sia' monyorahan aku ko boko urakng Romawi.

Kisah Boko Rasul 28:21

Sia' bopandir, “Koi bolupm monorima' surat doi' propinsi Yudea mongona'i kolai. Bolupm ado boko somadikan urakng Yahudi doi' su'utn inyo datakng mombaba' borito mongona'i kolai. Bolupm ado inyo mongisahan obai kolai udah bulah kojahatan.

Kisah Boko Rasul 3:17

Boko somadikan! Kaitn huatan boko pomimpitn kaitn molabuhan kojahatan nantai ko Yesus. Apo aku sadar kaitn co tohu sopo Sio sobondarnyo.

Kisah Boko Rasul 4:5

Kohobu'annyo, boko pomimpitn Yahudi inyo kotakan pontikng bokumpul di Yerusalem. Sia' moadoan potomuan pokaro. Ado boko pomimpitn agama, boko tokoh masrakat, bosamo boko guru Poraturan Agama Yahudi.

Kisah Boko Rasul 5:21

Jadi sunsukng pukau, boko rasul mansu' ko tongahlamanan Rumah Allah ongko mula'i mongajar urakng banya', sama'an inyo disiuh molekat tontai. Pontongahan nantai Imam Agukng agatn pokawalannyo mongumpulan boko pomimpitn banso Yahudi inyo kotakan pontikng. Sia' honda' moadoan pokaro. Lopas bokumpul, sia' monyiuh oca' boko rasul nantai dibaba' doi' ponjara.

Kisah Boko Rasul 9:14

Ni'inan io datakng ko si'itn. Io ado surat kuaso doi' boko imam kopala' pakai' monangkap somuo urakng inyo moningkau damo Duatn.”

Galatia 1:13

Apo, sobolupm aku pocayo ko Yesus, aku hidup sosuai agatn agama Yahudi. Kaitn udah mongotohu'i caro hidupku sokomai dalapm agama Yahudi nantai. Aku kotakan mondorako'i boko urakng inyo pocayo ko Yesus. Aku bousaha pakai' mombonasoan sia'.

Filipi 3:6

Aman urakng bukai honda' momuji diri obai sia' boagama agatn giat, aku bondar-bondar giat ia'an pan komai aku mondorako'i boko urakng inyo pocayo ko Yesus. Aman urakng bukai honda' momuji diri obai sia' hidup agatn caro inyo bondar-bondar monaati Hukupm Torat, aku cuku cacat dalapm monaati Hukupm Torat.

1 Timotius 4:14

Ingantcam pado watu boko ponotua' molota'an jarinyo ko kopala' kolai. Pado watu nantai, ado inyo monyampaian posatn doi' Allah. Allah moonji'i komampuan husus ko kolai. Jangan botongga' monggunoan komampuan husus nantai.