Kisah Boko Rasul 22:3 - Porjanjian Boharu Torjomahan Baso Dilakng Soari-ari

³ “Aku urakng Yahudi samo sama'an kaitn jam. Aku dilahiran di kota Tarsus di propinsi Kilikia. Apo aku dibosaran di kota Yerusalem ni'in. Tangga'i kocit, aku bolajar boko porintah huatan poraturan Allah inyo ditulis Musa dalapm Hukupm Torat. Guru Bosar Gamaliel inyo mongajar huatan mondidik aku agatn toliti. Ongko, aku sobobondarnyo taat molayati Allah, samo sama'an somuo kaitn ari ni'in jam.

Kisah Boko Rasul 22:3 ပူးပေါင်းရင်းမြစ်များ

Lukas 10:39

Marta ado somadikan botina'nyo bodamo Maria. Maria hala dudu' dampikng Yesus mondingaꞌan boko ajaran-Nyo.

Lukas 2:46

Koponsuahannyo, lopas tigo ari monggoyapi, sia' monomuan Yesus di tongahlamanan Rumah Allah. Yesus tongahan dudu' agatn boko guru agama Yahudi mondingaꞌan pongajaran sia', huatan botakutn ko sia'.

Lukas 8:35

Datakam boko urakng pakai' bontiatannyo. Watu sia' datakng di santai, bontomu agatn urakng inyo udah dibebasan doi' boko roh jahat. Io dudu' totai kaki Yesus, udah bobanggi-bopakaian huatan udah warasam. Sia' jadi sadar Yesus kotakng bokuaso. Sia' pan topogola'.

Kisah Boko Rasul 11:25

Lopas nantai, Barnabas honda' bogoyap potulukan dalapm pogota'annyo doi' Saulus. Jadi, Barnabas botula' ko kota Tarsus pakai' bousaha monggoyapi Saulus di su'utn. Lopas jadi monomuan Saulus, io mombaba' Saulus bobali' ko Antiokhia.

Kisah Boko Rasul 15:41

Paulus ongko Silas botula' mondataki boko kota di propinsi Siria huatan Kilikia. Di su'utn, sia' duo monulukng boko somadikan oca' pocayo agatn Yesus lobih kuat.

Kisah Boko Rasul 21:20

Mondinga' hal nantai, somuo ponotua' momuji Allah. Ongko sia' bopandir ko Paulus, “Somadikan, kolai siku' ulih moniant udah ado ribuan urakng Yahudi inyo pocayo agatn Yesus. Sia' somuo rajitn monaati boko porintah Allah inyo ditulis Musa dalapm Buku Hukupm Torat.

Kisah Boko Rasul 21:39

Paulus bopandir, “Aku ni'in bukainyo pomborontak nantai. Aku ni'in urakng Yahudi. Aku boasal doi' Tarsus, kota inyo pontikng di propinsi Kilikia. Aku ni'in warga doi' kota nantai. Jadi, ulih cado aku bopandir ko urakng banya' ni'in?”

Kisah Boko Rasul 23:34

Jadi, gubernur mombaco surat nantai. Ongko, io botakutn ko Paulus, “Kolai boasal doi' propinsi mono?” Paulus monimbas, “Aku doi' propinsi Kilikia.”

Kisah Boko Rasul 23:6

Paulus udah mongotohu'i di antaro boko pomimpitn inyo hadir, ado inyo doi' kolompok Saduki huatan ado jam inyo doi' kolompok Farisi. Io udah mongotohu'i urakng Saduki kinyo pocayo aman urakng mati paca'an hidup agi'. Sia' jam kinyo pocayo ado boko molekat damo boko roh. Apo urakng Farisi pocayo somuo hal nantai. Obai nantaiam, io mondorah, “Boko somadikan, aku ni'in urakng Farisi. Bopaiku pan urakng Farisi. Aku pocayo obai urakng mati paca'an hidup agi'. Nanam alasan aku diadili ari ni'in!” Pomandiran Paulus bunyi nantai pakai' bulah boko urakng Farisi huatan boko urakng Saduki di santai botikakng. Potomuan sia' nantai monjadi tobagi-bagi.

Kisah Boko Rasul 26:5

Sia' udah manah konal agatn aku. Jadi, aman sia' honda', sia' ulih mongisahan mongona'i caro hidupku komai. Aku tomansu' kolompok urakng Farisi, ia'an kolompok urakng inyo palikng taat molabuhan somuo poraturan agama kito.

Kisah Boko Rasul 26:9

Komai aku pan bopikir obai aku gola' molawatn agatn koras somuo urakng inyo pocayo agatn Yesus doi' Nazaret.

Kisah Boko Rasul 5:34

Apo ado siku' urakng doi' antaro kolompok pomimpitn nantai. Damonyo Gamaliel. Io nantai guru Poraturan agama Yahudi doi' kolompok urakng Farisi. Somuo urakng mohormati Io. Io bodiritn ongko monyiuh oca' boko rasul nantai dibaba' ko luar pakai' somontaro. Lopas nantai, io bopandir ko boko pomimpitn di su'utn.

Kisah Boko Rasul 6:9

Apo ado kolompok urakng Yahudi inyo molawatn io. Sia' doi' kolompok urakng inyo dibebasan. Anggota kolompok nantai ia'an pondudu' Yerusalem inyo datakng doi' kota Kirene, kota Aleksandria, propinsi Kilikia, ongko propinsi Asia. Sia' botikakng agatn Stefanus,

Kisah Boko Rasul 9:1

Somontaro boko rasul momboritoan Kabar Boi', Saulus kotakan godi bondar. Io moancapm boko murid Tuhatn Yesus. Katonyo io paca'an mombunuh sia'. Jadi, io botula' ko Imam Agukng.

Kisah Boko Rasul 9:11

Tuhatn bopandir ko io, “Bososiapcam! Botula' ko rumah Yudas di Jalatn Lurus. Pandiran ko urakng di rumah nantai obai kolai monggoyapi Saulus doi' kota Tarsus. Saulus ni'inan tongahan bodoa.

Kisah Boko Rasul 9:30

Apo hajat sia' nantai dikotohu'i boko urakng inyo pocayo Yesus. Jadi, sia' moonju'an Saulus ko polabuhan di kota Kaisarea. Doi' santai sia' monula'an io ko kota Tarsus, tompat asalnyo.

Roma 11:1

Aku botakutn: Kata'an Allah udah monula' umant-Nyo urakng Israel bai? Samo sokali cado! Obai aku urakng Israel huatan Allah kinyo monula' ku. Aku doi' koturutan Abrahapm, doi' suku Benyamin.

2 Korintus 11:22

Kata'an sia' momuji diri mongatoan obai sia' nam urakng asli Ibrani? Aku pan urakng asli Ibrani jam! Kata'an sia' doi' banso Israel ai? Aku pan doi' banso Israel jam! Kata'an sia' koturutan Abrahapm ai? Aku pan koturutan Abrahapm jam!

Galatia 1:14

Aku kotakng rajitn bolajar somuo poraturan agama Yahudi. Aku bolajar nantai lobih doi' somuo urakng Yahudi bukai inyo soumur agatn aku. Aku jam kotakan monaati somuo poraturan doi' angki-bayatn kito nantai.

Galatia 1:21

Lopas aku ado di Yerusalem, aku co mondataki boko kota bukai di propinsi Yudea nantai. Aku botula' ko boboropo kota di propinsi Siria huatan Kilikia.