Kisah Boko Rasul 22:14 - Porjanjian Boharu Torjomahan Baso Dilakng Soari-ari

¹⁴ Ongko Ananias bopandir ko aku, ‘Allah angki-bayatn kito udah momilih kolai pakai' mongotohu'i kohonda'-Nyo, pakai' moniant Yesus inyo hala hidup bondar di hadapan Allah, pakai' jam mondinga' saro-Nyo doi' nyao Sio siku'.

Kisah Boko Rasul 22:14 ပူးပေါင်းရင်းမြစ်များ

Galatia 1:12

Obai aku co monorima' borito nantai doi' monsio. Co nyiant urakng inyo moajari aku mongona'i borito nantai. Yesus Kristus siku', inyo monyatoan Kabar Boi' nantai ko aku.

1 Korintus 15:8

Ponsuahannyo toahir, Yesus moniant'an diri Sio ko aku. Aku monjadi rasul di watu inyo songkayo doi' boko rasul bukainyo. Samo sama'an bobia' kocit inyo lahir di watu inyo kinyo topat.

1 Korintus 9:1

Allah udah mombebasan aku. Malahan aku udah moniant Yesus, Tuhatn kito. Aku bondar-bondar rasul inyo diutus Tuhatn. Malahan, kaitn pan ia'an hasil pokoroja'an inyo ku labuhan bagi Tuhatn.

Kisah Boko Rasul 26:16

Ni'in bodiritn cam. Aku moniant'an diri ko kolai pakai' moutus kolai monjadi polayatn-Ku. Kolai gola' momboritoan mongona'i la'apo inyo udah kolai tiat ni'in. Kolai pan gola' momboritoan mongona'i la'apo inyo paca'an Aku tiat'an ko kolai nononyo.

Kisah Boko Rasul 9:15

Apo Tuhatn bopandir ko io, “Botula'cam, obai Aku udah momilih io. Io paca'an monjadi hulutn-Ku. Io paca'an momboritoan mongona'i Aku ko boko urakng inyo kinyo Yahudi. Io pan paca'an momboritoan ko boko rajo sia'. Io paca'an momboritoan ko boko urakng Yahudi jam.

1 Yohanes 2:1

Boko poana'anku! Aku monulis somuo ni'in ko kaitn oca' kaitn jangan bulah dosa. Apo, aman ado di antaro kito inyo bulah dosa, kito ado siku' urakng inyo monulukng kito di hadapan Allah. Urakng nantai ia'an Yesus Kristus inyo adil.

Roma 1:1

Surat ni'in doi' aku, Paulus, urakng inyo molayati Kristus Yesus. Aku ditingkau pakai' monjadi rasul, huatan dihususan pakai' momboritoan Kabar Boi' doi' Allah.

Kisah Boko Rasul 9:17

Jadi, Ananias botula' ko rumah Yudas nantai. Sopondatakngnyo di rumah Yudas, io mansu' ongko monomu'i Saulus. Io molota'an jarinyo ko Saulus kapikng bopandir, “Saulus, Somadikanku, Tuhatn Yesus moutus aku ko kolai. Sio niannam inyo kolai tiat dalapm pojalatan kolai ko si'itn. Sio moutus aku oca' kolai ulih moniant agi' huatan oca' kolai diponuhi Roh Allah.”

Kisah Boko Rasul 7:52

Angki-bayatn kaitn monyisa somuo nabi Allah. Joman komai, sia' mombunuh boko nabi inyo mongabaran mongona'i kodatakan Rajo Inyo Dijanjian Allah, ia'an Hulutn Allah inyo hala hidup bondar di hadapan Allah. Sokarakng Rajo nantai udah datakng apo kaitn monyorahan Sio ko musuh-Nyo oca' Sio dibunuh!

1 Korintus 11:23

Apo aman kaitn bokumpul, rayaancam Porjamuan Tuhatn agatn caro inyo udah ku sampaian ko kaitn. Tuhatn siku' udah moajaran nantai ko aku. Ia'an: Sobolupm Yesus disorahan ko boko musuh-Nyo, timpu malapm inyo samo nantai Sio bokumpul agatn boko murid-Nyo. Yesus monguti' roti

Kisah Boko Rasul 24:14

Apo aku moaku'i ni'in: Aku mongikuti boko ajaran Tuhatn Yesus. Sia' mongatoan ajaran nantai salah. Apo aku sobobondarnyo molayati Allah inyo disombah ulih angki-bayatn koi. Aku pocayo somuo hal inyo totulis dalapm boko Hukupm Torat huatan buku boko nabi.

Kisah Boko Rasul 22:18

Dalapm poniant'an nantai Tuhatn bopandir ko aku, ‘Boko urakng Yahudi di si'itn kinyo paca'an pocayo pomandiran kolai mongona'i Aku. Jadi, kolai gola' hagar botula' doi' Yerusalem ni'in.’

Kisah Boko Rasul 13:17

Pado joman komai, Allah banso Israel udah momilih angki-bayatn kito pakai' monjadi umant-Nyo. Sia' nantai urakng pondatakng somanah sia' bodiapm di Mesir. Apo, Allah bulah sia' monjadi banso inyo bosar jumlahnyo. Ongko, agatn kuaso-Nyo inyo bosar, Sio mombaba' sia' koluar doi' hulutn-pacal di Mesir nantai.

Kisah Boko Rasul 5:30

Kaitn udah monula' Yesus huatan mohukupm mati Sio di kayu salib sama'an urakng jahat. Apo Allah inyo disombah angki-bayatn kito udah bulah Sio hidup agi' doi' komatian.

Yohanes 15:16

Bukainyo kaitn inyo momilih Aku, apo Akunam inyo momilih kaitn. Aku moutus kaitn oca' kaitn botula' ongko bobuah lobat, ia'an buah inyo tahatn somanah-manahnyo. Aman kaitn molabuhan nantai lalu, Bopai paca'an moonji'i kaitn lapo inyo kaitn minto doi' Sio dalapm damo-Ku.

Titus 1:1

Ko Titus: inyo bondar-bondar sama'an ana'ku dalapm Yesus obai kito sosamo pocayo ko Yesus. Salapm doi' aku, Paulus. Allah moutus aku monjadi polayatn-Nyo. Yesus Kristus moutus aku monjadi rasul-Nyo. Aku udah diutus pakai' monulukng boko urakng inyo dipilih Allah oca' mongkitn pocayo ko Yesus. Aku pan diutus pakai' mongajar ajaran inyo bondar oca' boko urakng inyo dipilih Allah nantai hidup sosuai agatn kohonda'-Nyo. Pondasi ajaran nantai ia'an pongharapan paca'an hidup somanah-manahnyo, inyo udah Sio janjian sobolupm dunia dipulah. Allah Ponyolamant kito, co mungkitn tumbukan. Pas watu inyo ditontuan-Nyo, Allah udah moonji'i pomandiran-Nyo molalu'i Kabar Boi' inyo udah dipocayoan ko aku pakai' kuboritoan. Aku bodoa oca' Allah Bopai kito ongko Kristus Yesus, Ponyolamant kito monunju'an kasih karunia-Nyo huatan moonji'i sonang-asau ko kolai.

2 Timotius 1:1

Ko Timotius: inyo sobondarannyo kuanggap sama'an ana'ku siku'. Salapm doi' aku, Paulus. Allah monyiuh aku monjadi rasul Yesus Kristus, Rajo Inyo Dijanjian Allah. Allah pan monyiuh aku momboritoan mongona'i janji Sio, huatan Sio bojanji aman sotiap urakng pocayo ko Kristus Yesus, io paca'an mondapat'an hidup inyo somanah-manahnyo di sorugo. Aku bodoa oca' Allah Bopai huatan Kristus Yesus, Tuhatn kito inyo bokuaso monunju'an koboi'an-Nyo ko kolai, monunju'an jam kasih sayang-Nyo ko kolai, moonji'i jam sonang-asau ko kolai.

Galatia 1:15

Apo, Allah ado hajat husus pakai' aku. Sio momilih aku watu aku ija' dalapm porut indaiku. Sio momilih aku pakai' monjadi rasul Yesus, Ana'-Nyo. Sio molabuhan nantai bukai obai aku bujur bondar, apo obai Sio kotakng boi' ko aku. Jadi, Allah sonang

2 Korintus 5:21

Kristus kinyo bodosa, apo Allah bulah Sio monanggukng hukupan dosa kito. Allah molabuhan nantai oca' di dalapm Kristus, kito ulih monjadi bondar di hadapan Allah.

1 Korintus 15:3

Aku udah monorima' Kabar Boi' ongko aku monyampaian nantai ko kaitn. Inyo kotakan pontikng doi' Kabar nantai ia'an boko kojadian ni'in: Kristus udah mati obai boko dosa kito. Hal nantai sama'an inyo ditulis dalapm Buku Suci.

1 Petrus 2:22

Apo, Sio siku' co kalo bulah dosa. Sio co kalo mongatoan la'apo pan pakai' mongontumbuki monsio.

Kisah Boko Rasul 22:15

Hal nantai tojadi ko kolai oca' kolai monjadi sasi-Nyo. Kolai gola' momboritoan ko somuo urakng mongona'i somuo inyo udah kolai tiat ongko dinga'.