Kisah Boko Rasul 20:2 - Porjanjian Boharu Torjomahan Baso Dilakng Soari-ari

² Io mondataki boko urakng pocayo di boko doerah di propinsi nantai. Io moonji'i banya' nosihat oca' sia' pocayo ko Yesus agatn lobih yakitn. Lopas nian, io botula' ko propinsi Akhaya, inyo jam disobut tanah Yunani.

Kisah Boko Rasul 20:2 ပူးပေါင်းရင်းမြစ်များ

Lukas 3:18

Sama'an niannam Yohanes monosihat'i boko urakng agatn bomacapm caro, pas io momboritoan Kabar Boi'.

Kisah Boko Rasul 14:22

Di boko kota nantai, Paulus ongko Barnabas monguat'an hati boko urakng pocayo. Sia' duo moanjuran boko urakng nantai oca' totap pocayo agatn yakitn ko Yesus. Sia' bopandir, “Kito gola' moalapi kotakan banya' ajab sonsaro, oca' kito ulih hidup sonang dalapm Koraja'an Allah.”

Kisah Boko Rasul 15:41

Paulus ongko Silas botula' mondataki boko kota di propinsi Siria huatan Kilikia. Di su'utn, sia' duo monulukng boko somadikan oca' pocayo agatn Yesus lobih kuat.

Kisah Boko Rasul 16:12

Doi' su'utn, koi ko kota Filipi. Kota Filipi nantai tomansu' kota inyo pontikng di doerah Makedonia. Kota nantai jajahan urakng Roma. Koi tinggal di su'utn boboropo ari.

Kisah Boko Rasul 17:1

Doi' kota Filipi, Paulus ongko Silas bojalatn molalu'i kota Amfipolis huatan kota Apolonia. Ongko, sia' tuntukam ko Tesalonika, ibu kota propinsi Makedonia. Di kota nantai ado rumah sombayakng urakng Yahudi.

Kisah Boko Rasul 17:10

Pado malapm nantai, boko somadikan di santai hagar monyiuh Paulus ongko Silas botula' ko kota Berea. Di su'utn, sia' duo botula' ko rumah sombayakng urakng Yahudi.

Kisah Boko Rasul 2:40

Petrus bisi banya' pomandiran inyo bukai agi' pakai' monguat'an hati sia' huatan moingant'an sia'. Katonyo, “Allah tajahan monjatu'an hukupan ko boko urakng joman ni'in inyo jahat. Culih hala sonjumpat'an sia' oca' kaitn disolamant'an doi' hukupan nantai.”

Kisah Boko Rasul 20:1

Lopas boko urakng di kota Efesus langunt am, Paulus mongumpulan boko urakng pocayo. Io monulukng oca' sia' pocayo ko Yesus agatn lobih yakitn, ongko bopadah pulakng. Lopas nantai, io botula' ko propinsi Makedonia.

Kisah Boko Rasul 20:11

Lopas nian koi somuo bobali' noi' ko pucu'. Paulus momimpitn koi dalapm Poraya'an Porjamuan Kudus nantai. Lopas jadi makatn, Paulus torus mongajar sampai dinihari. Lopas jadi nantai, io botula' bosamo-samo agatn koi kawal sopojalatannyo.

Kisah Boko Rasul 20:3

Io monotap di su'utn somanah tigo bulatn. Lopas nantai, io bososiap pakai' bolayar ko propinsi Siria. Apo io mondinga' ado boko urakng Yahudi tongahan bohajat pakai' mombunuh io dalapm pojalatan nantai. Obai nantai, io momutusan pakai' bobali' ko Yerusalem molalu'i Makedonia.

1 Korintus 4:19

Apo aman Tuhatn mongohonda'i, aku paca'an copat datakng ko kaitn. Watu nantai, aku co paca'an borotian pomandiran boko urakng inyo buhau nantai. Aku honda' moniant aman sia' bondar-bondar ado kuaso Allah dalapm hidup sia'.

Kolose 1:28

Kristus nantaiam inyo koi boritoan watu koi momakai somuo kopintar-corodi'an pakai' monosihat'i huatan mongajar sotiap urakng. Tujuannyo oca' koi ulih mombaba' sotiap urakng ko Allah dalapm koadaan suci obai bosatu agatn Kristus.

1 Tesalonika 2:11

Kaitn tohu koi hidup di antaro kaitn samo sama'an Bopai mondidik poana'annyo agatn kasih.

1 Tesalonika 2:3

Obai koi momboritoan Kabar Boi' inyo bondar. Co nyiant alasan inyo salah dalapm hati koi. Koi co moncubo ngontumbuki.

1 Tesalonika 4:1

Solanjutnyo, boko somadikan, komai watu koi bosamo agatn kaitn, koi udah mongajar kaitn. Koi mongajar kaitn mongona'i caro hidup inyo monyonangan Allah. Memang kaitn udah mula'i hidup agatn caro nantai. Kaitn udah mongotohu'i obai Tuhatn Yesus moonji'i kuaso ko koi pakai' mongajar sama'an nantai. Obai nantai, ni'in koi kinyo bayo mombaba' apo koi monyosahan kaitn: Hidup pakai' monyonangan Allah lobih somombondarannyo.