Kisah Boko Rasul 20:16 - Porjanjian Boharu Torjomahan Baso Dilakng Soari-ari

¹⁶ Doi' pulau Samos ko kota Miletus, koi kinyo singgah di kota Efesus. Paulus udah momutusan nantai. Io co honda' tolalu manah di propinsi Asia obai io honda' hagar tuntukng ko Yerusalem. Aman ulih, io honda' ado di su'utn pado ari rayo Pentakosta.

Kisah Boko Rasul 20:16 ပူးပေါင်းရင်းမြစ်များ

1 Korintus 16:8

Apo, sobolupm aku botula' ko Makedonia, aku paca'an tinggal di si'itn di kota Efesus, sampai ari rayo Pentakosta.

Kisah Boko Rasul 2:1

Watu Ari Pentakosta, somuo urakng inyo pocayo agatn Yesus bokumpul. Sia' bokumpul di sobuah rumah.

Kisah Boko Rasul 19:21

Lopas nantai, obai bimbikan Roh Allah Paulus bulah hajat pakai' botula' ko Yerusalem. Dalapm pojalatan ko su'utn, io honda' molalu'i propinsi Makedonia huatan Akhaya oca' io ulih mondataki boko urakng pocayo di su'utn. Io pan honda' ko kota Roma. Katonyo, “Lopas jadi aku botula' ko Yerusalem, aku gola' mondataki Roma.”

Kisah Boko Rasul 24:17

Somanah boboropo tohutn, aku cuku di Yerusalem. Apo duo bolas ari inyo udah ongko aku datakng agi' ko Yerusalem mombaba' sumbakan dana pakai' monulukng boko somadikan sobansoku. Aku pan honda' momposombahan boboropo kurbatn posombahan.

Kisah Boko Rasul 21:4

Jadi, koi monjongu' boko urakng inyo pocayo agatn Yesus di santai. Koi monotap bosamo agatn sia' somanah tujuh ari. Roh Allah momadahan ko sia' obai Paulus paca'an ajab sonsaro di Yerusalem. Jadi, sia' monosihat'i Paulus oca' co botula' ko su'utn.

Kisah Boko Rasul 20:22

Ni'inan, aku gola' ko Yerusalem obai Roh Allah udah monyiuh aku. Aku gola' monaati-Nyo biar pan aku co tohu la'apo inyo paca'an tojadi ko aku di su'utn.

Kisah Boko Rasul 20:13

Jadi rombokan koi botula' doi' Troas ko kota Asos. Paulus udah moatur hajatnyo. Io sonsiku'an molalu'i jalatn darat, apo koi inyo bukai bolayar. Jadi, koi lobih doholu datakng di Asos ongko monanti Paulus di su'utn.

Kisah Boko Rasul 20:6

Koi singgah di kota Filipi. Lopas jadi ari rayo Roti Co Boragi, koi bolayar ko Troas. Lopas jadi lima' ari pojalatan, koi duo datakng. Di santai koi botomu agatn sia' inyo mondoholu'i koi. Koi somuo tinggal di su'utn somanah tujuh ari.

Kisah Boko Rasul 18:19

Pas sia' datakng di kota Efesus, Paulus mansu' ko rumah sombayakng. Io agatn boko urakng Yahudi di santai bopandir mongona'i Yesus. Sia' mominto io pakai' monotap lobih manah di su'utn. Apo io monula'. Katonyo, “Aman Allah moijitan, aku paca'an datakng agi' ko si'itn.” Jadi, io botula' noi' kapal, apo Priskila ongko Akwila totap tinggal di kota Efesus nantai.

Kisah Boko Rasul 12:13

Timpu nantai, Petrus mongetok lawakng rumah nantai. Polayatn rumah nantai datakng pakai' mongotohu'i sopo inyo ado di muka' lawakng. Damo botina' nantai Rode.

Kisah Boko Rasul 16:6

Lopas nantai, Paulus, Silas ongko Timotius botula' ko doerah Frigia huatan doerah Galatia. Sobondarnyo sia' honda' momboritoan Kabar Boi' ko doerah Asia. Apo Roh Allah morarakng sia'.

Kisah Boko Rasul 19:1

Timpu Apolos ija' ado di kota Korintus di propinsi Akhaya, Paulus udah mondataki boboropo doerah bukai di propinsi Galatia huatan Frigia. Io bojalatn torus sampai di Efesus di propinsi Asia. Di santai io botomu agatn boboropo urakng inyo pocayo.

Kisah Boko Rasul 20:4

Ado boko urakng inyo monyoroto'i io dalapm pojalatan nantai, ia'an: Timotius, Sopater (ana' Pirus doi' kota Berea), Aristarkhus ongko Sekundus (koduo urakng nantai doi' kota Tesalonika), Gayus (doi' kota Derbe), huatan Tikhikus ongko Trofimus (koduonyo doi' propinsi Asia).

Kisah Boko Rasul 20:18

Jadi, sia' datakng. Ongko, Paulus bopandir ko sia', “Kaitn tohu caro aku hidup somanah aku tinggal di antaro kaitn. Doi' ari potamo aku datakng di Asia sampai watu ni'in, kaitn udah tohu somuonyo.