Kisah Boko Rasul 2:23 - Porjanjian Boharu Torjomahan Baso Dilakng Soari-ari

²³ Biar pan kaitn mongotohu'i nantai, kaitn monyorahan Sio ko boko urakng inyo kinyo mongonal Allah. Kohonda' kaitn oca' Sio dihukupm mati di kayu salib. Apo somuonyo nantai tojadi sosuai agatn kohonda' Allah. Hajat Allah nantai udah ditotapan-Nyo doi' joman komaimo.

Kisah Boko Rasul 2:23 ပူးပေါင်းရင်းမြစ်များ

Matius 20:19

Lalu sia' paca'an monyorahan Sio ko boko urakng inyo bukainyo urakng Yahudi oca' Sio dipoulu'an, disipat, dipantu' lalu dibunuh di kayu salib. Apo watu ari kotigo, Allah paca'an bulah Sio bobali' hidup agi'.”

Matius 26:24

Udah totulis dalapm Buku Suci mongona'i Ana' Monsio inyo paca'an dijual ko boko urakng inyo molawatn Sio. Sosuai agatn tulisan nantai, hal nantai paca'an tojadi ko Sio. Apo Allah paca'an mohukupm urakng inyo molabuhan nantai. Lobih boi' pakai' urakng nantai aman io kinyo kalo dilahiran samo sokali!”

Matius 27:35

Sia' momakuan Sio di kayu salib huatan moninjakan kayu salib nantai. Lopas nantai, boko projurit monguti' pakai'an Yesus. Sia' mombuakng undi pakai' monontuan sopo inyo paca'an mondapat'an pakai'an-Nyo.

Markus 15:24

Lopasnyo, sia' momaku Sio di kayu salib. Boko projurit monguti' pakai'an Yesus lalu moundinyo pakai' mombagi-bagian pakai'an-Nyo.

Lukas 22:22

Ana' Monsio memang tajahan mati sosuai agatn caro inyo udah ditontuan Allah. Apo Allah tajahan mohukupm urakng inyo monyorahan-Nyo!”

Lukas 22:37

Obai la'apo inyo udah ditulis dalapm Buku Suci mongonaꞌi Aku gola' tojadi: ‘Io paca'an dianggap samo agatn ponjahat.’ Hal nantai tongahannyo labuham ni'in!”

Lukas 23:33

Timpu datakng ko tompat inyo disobut “Tongkorak”, boko projurit Romawi momakuan Yesus di kayu salib bonsamo agatn koduo ponjahat nantai jam – siku' urakng di sopia' kanan huatan siku' urakng agi' di sopia' kiba' Yesus.

Lukas 24:20

Apo boko imam kopala' huatan boko pomimpitn inyo bukai doi' banso kito udah monyorahan Sio ko gubernur pomorintah Romawi oca' dihukupm mati. Sia' momakuan Sio di kayu salib. Sio udah mati.

Yohanes 19:18

Di santai Sio dipaku di kayu salib. Timpu nantai pan ado duo urakng bukai dipaku di kayu salib, siku' di sopia' kanan ongko siku' di sopia' kiba' Yesus.

Yohanes 19:24

Boko projurit nantai bopandir ko siku'-monyiku', “Jangan kito birat-birat jubah ni'in. Mara kito boundi pakai' monontuan sopo inyo mondapat'annyo.” Nantai tojadi oca' lapo inyo ditulis di Buku Suci digonapi. Bunyi tulisannyo ni'in: “Sia' mombagi-bagi pakai'an-Ku. Sia' boundi pakai' jubah-Ku.” Hal nantai inyo dilabuhan boko projurit.

Kisah Boko Rasul 13:27

Joman komai, boko nabi udah monulis mongona'i Rajo Inyo Dijanjian Allah. Watu ni'in, sotiap Ari Sabat, boko buku nabi nantai dibacoan di boko rumah sombayakng. Apo boko urakng Yerusalem kinyo mongoroti pomandiran boko nabi nantai. Sia' kinyo mongotohu'i Yesus nantai Rajo Inyo Dijanjian Allah. Boko pomimpitn agama sia' pan kinyo tohu. Sia' molawatn Yesus. Sia' samo sokali conyiant alasan pakai' mohukupm Yesus. Apo sia' totap monyosahan Gubernur Pilatus oca' Yesus dihukupm mati. Somuo porbuatan sia' nantai bulah pomandiran boko nabi doi' joman komai monjadi bondar-bondar tojadi.

Kisah Boko Rasul 15:18

Tangga'i joman komai, Aku udah momadahan somuonyo ni'in.”

Kisah Boko Rasul 2:36

Ongko Petrus monyimpulan, Obai somuo buti nantai, ongko somuo urakng Israel gola' tohu ni'in agatn pasti: Allah monotap'an Yesus monjadi Tuhatn inyo bokuaso. Allah jam monotap'an Yesus monjadi Kristus, ia'an golar pakai' Rajo Inyo Udah Dijanjian Allah doi' joman komai. Apo kaitn bulah Sio dihukupm mati di kayu salib.”

Kisah Boko Rasul 3:18

Apo agatn caro nantai, Allah monopat'i pomandiran-Nyo inyo udah disampaian ko boko nabi watu joman komai. Boko nabi nantai udah monulis obai Rajo Inyo Dijanjian Allah nantai gola' ajab sonsaro sampai mati.

Kisah Boko Rasul 4:28

Apo Duatn Maho Kuaso inyo moatur somuonyo doi' joman komai. Somuonyo nantai udah tojadi obai sosuai agatn kohonda' Duatn.

Kisah Boko Rasul 5:28

“Koi udah morarakng kaitn agatn koras oca' kinyo dilabuhan agi' mongajar ajaran Urakng Nazaret nantai. Apo kaitn kinyo monuruti porintah nantai. Obai nantai, somuo urakng di Yerusalem udah mondinga' ajaran kaitn. Kaitn pan honda' monyalahan koi obai komatian Urakng Nazaret nantai.”

Kisah Boko Rasul 5:30

Kaitn udah monula' Yesus huatan mohukupm mati Sio di kayu salib sama'an urakng jahat. Apo Allah inyo disombah angki-bayatn kito udah bulah Sio hidup agi' doi' komatian.

Kisah Boko Rasul 7:52

Angki-bayatn kaitn monyisa somuo nabi Allah. Joman komai, sia' mombunuh boko nabi inyo mongabaran mongona'i kodatakan Rajo Inyo Dijanjian Allah, ia'an Hulutn Allah inyo hala hidup bondar di hadapan Allah. Sokarakng Rajo nantai udah datakng apo kaitn monyorahan Sio ko musuh-Nyo oca' Sio dibunuh!

Roma 2:12

Obai somuo urakng inyo bodosa co bohukupm Torat paca'an bonaso agatn kinyo bohukupm Torat; agatn somuo urakng inyo bodosa di babah hukupm Torat paca'an di hakipi ulih hukupm Torat

Roma 4:17

Sama'an inyo totulis dalapm Buku Suci: “Aku udah monjadian kolai bopai pakai' banya' banso.” Allah bopandir nantai ko Abrahapm, huatan Abrahapm pocayo ko Sio. Ia'an, Allah inyo bokuaso mombulah urakng mati bobali' hidup agi' huatan agatn pomandiran-Nyo aja', Allah mombulah la'apo inyo kinyo ado monjadi ado.

1 Tesalonika 2:15

Ia'an, boko urakng Yahudi inyo molawatn Tuhatn Yesus sampai Sio dihukupm mati. Sia' jam inyo mombunuh boko nabi timpu joman komai huatan sia' jam mondorako'i koi. Sia' udah mombulah Allah kinyo sonang. Sia' jam momusuhi somuo urakng,

1 Petrus 1:2

Allah, Bopai kito, momilih kaitn sosuai agatn roncana-Nyo. Roh Allah mombulah kaitn monjadi borosih doi' dosa oca' kaitn monaati Yesus Kristus. Allah molabuhan nantai jam oca' kaitn ulih monorima' hasil doi' darah Yesus Kristus inyo dicurahan ko kaitn watu Sio mati di kayu salib. Aku bodoa oca' Allah monunju'an koboi'an ongko moonji'i sonang-asau ko kaitn agatn bolimpah.

1 Petrus 1:20

Allah udah momilih Sio sobolupm dunia dipulah. Apo, hoyu' ari toahir ni'in, Kristus udah datakng monyatoan diri-Nyo. Sio molabuhan nantai pakai' kaitn.

1 Petrus 2:8

“Nantai am ‘Batu bulah sia' topanjur.’ Batu inyo bulah sia' tokorahap.” Sia' topanjur ko batu nantai obai sia' kinyo monaati Pomandiran Allah. Nantaiam inyo udah ditontuan Allah pakai' sia'.

Yudas 1:4

Obai, ado boko urakng totontu inyo molawatn Allah. Nyatonyo, sia' udah mansu' dalapm kolompok kaitn inyo co urakng bukai sadar obai sia' kinyo bondar-bondar pocayo ko Yesus. Sia' mongatoan Allah kito kinyo paca'an mohukupm urakng obai Sio boi' hati. Sia' gunoan pomikiran inyo salah nantai oca' sia' ulih mongosihan boko kohonda' bukakng-tubuh sia' inyo jahat. Sia' jam monula' obai Yesus Kristus ia'an satu-satunyo Tuhatn inyo bokuaso dipucu' kito. Doi' komai, udah ditulis obai sia' paca'an dihukupm.

Wahyu 13:8

Io paca'an disombah ulih somuo urakng inyo bodiapm di bumi, ia'an somuo urakng inyo doi' mulo dunia dipulah damonyo co totulis dalapm Buku Kohidupan. Buku nantai umputn Ana' Domba inyo udah disombolih.