Kisah Boko Rasul 19:21 - Porjanjian Boharu Torjomahan Baso Dilakng Soari-ari

²¹ Lopas nantai, obai bimbikan Roh Allah Paulus bulah hajat pakai' botula' ko Yerusalem. Dalapm pojalatan ko su'utn, io honda' molalu'i propinsi Makedonia huatan Akhaya oca' io ulih mondataki boko urakng pocayo di su'utn. Io pan honda' ko kota Roma. Katonyo, “Lopas jadi aku botula' ko Yerusalem, aku gola' mondataki Roma.”

Kisah Boko Rasul 19:21 ပူးပေါင်းရင်းမြစ်များ

Kisah Boko Rasul 16:12

Doi' su'utn, koi ko kota Filipi. Kota Filipi nantai tomansu' kota inyo pontikng di doerah Makedonia. Kota nantai jajahan urakng Roma. Koi tinggal di su'utn boboropo ari.

Kisah Boko Rasul 18:12

Pado watu Paulus ija' di kota Korintus, pomorintah Romawi moangkat Galio monjadi gubernur propinsi Akhaya nantai. Watu nantai, boko urakng Yahudi bosamo-samo molawatn Paulus. Sia' mombaba' io ko pohadapan Galio pakai' diadili.

Kisah Boko Rasul 19:22

Jadi, Paulus mongiripm duo urakng kawal korojonyo, ia'an Timotius ongko Erastus. Sia' mondoholu'i io ko propinsi Makedonia. Apo io monotap cukup manah agi' di kota Efesus di propinsi Asia.

Kisah Boko Rasul 19:29

Banya' urakng bukai monjadi tolibat. Soluruh kota nantai monjadi kacau. Urakng banya' borindakng-ramai bonggidi'an momansu'i lapakan umum inyo bosar. Duo kawal Paulus ditangkap ongko dibaba' ko su'utn jam. Damo sia' Gayus ongko Aristarkhus. Sia' duo doi' Makedonia apo tuyut Paulus dalapm polayatannyo.

Kisah Boko Rasul 20:16

Doi' pulau Samos ko kota Miletus, koi kinyo singgah di kota Efesus. Paulus udah momutusan nantai. Io co honda' tolalu manah di propinsi Asia obai io honda' hagar tuntukng ko Yerusalem. Aman ulih, io honda' ado di su'utn pado ari rayo Pentakosta.

Kisah Boko Rasul 20:22

Ni'inan, aku gola' ko Yerusalem obai Roh Allah udah monyiuh aku. Aku gola' monaati-Nyo biar pan aku co tohu la'apo inyo paca'an tojadi ko aku di su'utn.

Kisah Boko Rasul 21:17

Timpu koi sampai di Yerusalem, boko urakng inyo pocayo agatn Yesus mohalu koi agatn sonang hati.

Kisah Boko Rasul 21:4

Jadi, koi monjongu' boko urakng inyo pocayo agatn Yesus di santai. Koi monotap bosamo agatn sia' somanah tujuh ari. Roh Allah momadahan ko sia' obai Paulus paca'an ajab sonsaro di Yerusalem. Jadi, sia' monosihat'i Paulus oca' co botula' ko su'utn.

Kisah Boko Rasul 23:11

Pas malapm nantai Tuhatn Yesus bodiritn di sopia' Paulus ongko bopandir ko io, “Jangan gola'. Kolai udah borani momboritoan mongona'i Aku di Yerusalem. Nononyo kolai gola' borani jam momboritoan mongona'i Aku di Roma.”

Kisah Boko Rasul 27:1

Jadi, gubernur Festus momutusan obai Paulus gola' bolayar ko kota Roma di propinsi Italia. Festus monyorahan Paulus huatan boboropo urakng bukai inyo ditahatn ko siku' urakng powira. Damonyo Yulius. Io anggota doi' pasukan husus Kaisar negara Roma.

Kisah Boko Rasul 27:24

Katonyo, ‘Paulus, jangan gola'. Kolai gola' ija' mohadap Kaisar negara Roma. Allah paca'an monunju'an koboi'an hati-Nyo ko kolai. Allah bojanji obai somuo urakng inyo bosamo-samo agatn kolai di kapal ni'in paca'an solamant.’

Kisah Boko Rasul 28:16

Doi' duo laman nantai koi tuntukng di kota Roma. Di santai, boko pomimpitn pomorintah Romawi moonji'i ijitn oca' Paulus ulih bodiapm di rumah topisah siku'nyo. Apo gola' ado projurit inyo monjago io.

Roma 1:11

Obai aku honda' bondar botomu agatn kaitn pakai' bobagi komampuan husus doi' Roh Allah oca' kaitn dikuatan.

Roma 1:13

Boko somadikan, aku honda' oca' kaitn tohu obai aku udah opat bohajat pakai' mondataki kaitn, apo sampai watu ni'in hala ado halakan. Aku honda' datakng oca' nononyo polayatanku di antaro kaitn ulih bohasil samo sama'an inyo tojadi di antaro boko urakng inyo bukai Yahudi di boko tompat inyo bukai jam.

Roma 1:15

Nantaiam sobabnyo aku honda' momboritoan Kabar Boi' ko kaitn inyo bodiapm di Roma.

1 Korintus 16:5

Aku ija' honda' datakng ko kaitn apo aku ado hajat paca'an molalu'i doerah Makedonia doholu.

1 Korintus 4:19

Apo aman Tuhatn mongohonda'i, aku paca'an copat datakng ko kaitn. Watu nantai, aku co paca'an borotian pomandiran boko urakng inyo buhau nantai. Aku honda' moniant aman sia' bondar-bondar ado kuaso Allah dalapm hidup sia'.

2 Korintus 10:16

Agatn ubo nantai, koi ulih momboritoan Kabar Boi' di boko doerah bukai jam, ia'an nantai boko doerah inyo bolupm dilayati urakng bukai. Koi co gola' momuji diri agatn hasil polayatan inyo dilabuhan urakng bukai di doerah inyo Allah tontuan pakai' sia'.

Galatia 2:1

Lopas jadi ompat bolas tohutn, aku botula' agi' ko Yerusalem agatn bimbikan Allah. Aku ko siatn bosamo Barnabas. Titus pan tuyut bosamo aku. Di Yerusalem, ado boko pomimpitn urakng inyo pocayo. Boko pomimpitn nantai dianggap tohormat. Aku moadoan potomuan husus bayo agatn sia' mo. Dalapm potomuan nantai, aku monjolasan ko boko pomimpitn nantai isi Kabar Boi' inyo aku boritoan ko boko banso bukai Yahudi. Aku monjolasan polayatanku nantai obai aku kuatir mungkitn polayatan aku watu komai ulih monjadi co boroti jam.

1 Tesalonika 1:7

Obai nantai, caro hidup kaitn ulih ditiru somuo urakng pocayo di propinsi Makedonia huatan Akhaya.