Kisah Boko Rasul 17:30 - Porjanjian Boharu Torjomahan Baso Dilakng Soari-ari

³⁰ Timpu joman komai, ado boko banso inyo kinyo mongotohu'i caro pakai' monyombah Allah. Jadi, Allah kinyo lansukng mohukupm sia' obai boko kosalahannyo. Apo ni'in Sio porintahan somuo urakng di mono-mono gola' moninggalan dosa huatan monyonangan hati Sio.

Kisah Boko Rasul 17:30 ပူးပေါင်းရင်းမြစ်များ

Matius 20:7

Kato sia' ko io, ‘Obai nyiant ado urakng inyo moonji'i pokoroja'an ko koi.’ Katonyo ko sia', ‘Kaitn botula' bokorojo ja'am di kobutn anggurku.’

Matius 3:2

“Koraja'an Sorugo udah dampikam! Jadi, botongga'cam kaitn bulah dosa ongko kaitn monyonangan hati Allah.”

Matius 4:17

Doi' watu nantai, Yesus mula'i momboritoan. Kato Sio, “Koraja'an Sorugo udah dampikam! Jadi, botongga'cam kaitn bulah dosa ongko monyonangan Allah.”

Markus 1:15

Kato-Nyo, “Watu inyo ditontuan Allah udah datakam. Koraja'an Allah udah dampikam. Jadi, tinggalancam boko dosa kaitn ongko pocayocam agatn Kabar Boi' ni'in!”

Markus 6:12

Jadi, koduo bolas murid Yesus botula' momboritoan obai urakng gola' moninggalan dosa sia' ongko monyonangan hati Allah.

Lukas 13:5

Pomikiran kaitn nantai kotakng kinyo bondar. Dinga'anbo aman kaitn co botongga' bulah dosa huatan co hidup monyonangan hati Allah, kaitn tajahan bonaso ubo sia' jam.”

Lukas 15:10

Nah, porotiancam ni'in: samo sama'an nantai jam, Allah huatan boko molekat di sorugo kotakng rindakng aman siku' urakng botongga' bulah dosa lalu hidup monyonangan Allah.”

Lukas 24:47

Lalu agatn kuaso-Nyo tajahan diboritoan kabar obai urakng gola' tongga' bulah dosa lalu monyonangan hati Allah, ongko dosa sia' tajahan diamputi. Borito ni'in gola' disampaian, mula'i doi' kota Yerusalem lalu ko somuo banso bukai di dunia.

Kisah Boko Rasul 11:18

Niannam inyo dikisahan Petrus di Yerusalem ko boko urakng Yahudi inyo pocayo. Jadi, sia' tongga'am monyalahan Petrus. Sobali'nyo, sia' momuji Allah. Kato sia', “Wah! Ruponyo, Allah monorima' urakng bukainyo Yahudi jam. Allah udah moonji'i kosompatan ko sia' pakai' sia' botongga' bulah dosa ongko monuruti Sio. Agatn caro nantai, sia' jam ulih mondapat'an hidup inyo somanah-manahnyo di sorugo.”

Kisah Boko Rasul 14:16

Di joman komai, Allah mombiaran somuo banso monuruti kohonda' hati siku'.

Kisah Boko Rasul 17:23

Aku udah bojojalatn di kota ni'in. Aku moniant banya' tompat monyombah boko duato kaitn. Ado sobuti' mesbah tompat molota'an posombahan jam agatn tulisan ni'in: ‘Pakai' monyombah duato inyo bolupm dikonal.’ Kaitn bolupm mongonal Sio, apo totap monyombah Sio. Aku moajaran mongona'i Sio nantai.

Kisah Boko Rasul 20:21

Aku hala mongajar agatn torus torakng, boi' ko boko urakng Yahudi huatan ko boko urakng Yunani oca' sia' botongga' bulah dosa huatan hidup monyonangan hati Allah. Sia' gola' pocayo ko Yesus, Tuhatn inyo bokuaso pucu' kito.

Kisah Boko Rasul 3:19

Obai nantai am, tongga'ancam kaitn bulah dosa huatan bobali' taat agatn Allah. Labuhancam nantai oca' boko dosa kaitn diamputi.

Roma 1:28

Obai sia' co mooso pontikng mongonal Allah, jadi Allah mombiaran pikiran sia' monjadi rusa'. Jadi, sia' molabuhan boko hal inyo soharusnyo kinyo pantas sia' labuhan.

Roma 2:4

Allah kotakan boi' huatan sabar ko kaitn. Sio kinyo lansukng mohukupm kaitn. Jangan moanggap koboi'an-Nyo nantai kinyo borogo? Kaitn gola' mongoroti obai Allah monunju'an koboi'an-Nyo ko kaitn obai Sio honda' oca' kaitn moninggalan boko dosa kaitn.

Roma 3:23

Obai, somuo urakng udah bodosa ongko udah kohilakan komulia'an Allah.

Roma 3:25

Sio mombayar agatn darah-Nyo siku' timpu Sio mati di kayu salib. Sio monjadi kurbatn oca' dosa urakng ulih diamputi, ia'an aman sia' pocayo ko Sio. Allah monyorahan Yesus sama'an nantai pakai' monunju'an obai Sio adil huatan mohukupm dosa. Komai, Allah sabar agatn monsio. Sio bolupm mohukupm somuo dosa sia'.

2 Korintus 7:10

Obai, aman urakng mooso salu' agatn caro inyo Allah kohonda'i, akibatnyo urakng nian moninggalan dosanyo. Jadi, urakng nian disolamant'an. Jadi, io co monyosal obai porasa'an salu' nantai. Apo, aman salu' nantai boasal doi' dunia, moakibat'an komatian.

1 Petrus 4:3

Komainyo, kaitn udah cukup manah monuruti kohonda' dunia ubo urakng inyo co mongonal Allah, ia'an kaitn molabuhan porbuatan kinyo sonunuh. Kaitn momuasan kohonda' diri kaitn inyo jahat. Kaitn gala' komabu'an, bopesta pora, bopesta minuman koras. Kaitn molawatn porintah Allah agatn monyombah boko lompatukng.