Kisah Boko Rasul 16:15 - Porjanjian Boharu Torjomahan Baso Dilakng Soari-ari

¹⁵ Io huatan somuo urakng inyo bodiapm di rumahnyo dibaptis. Ongko, Lidia mohundakng koi ko rumahnyo. Katonyo, “Aman kaitn moanggap obai aku bondar-bondar pocayo ko Tuhatn Yesus, huncapm bujakng ko rumah aku.” Obai io monyosahan, jadi koi monorima' tawarannyo nantai.

Kisah Boko Rasul 16:15 ပူးပေါင်းရင်းမြစ်များ

Kisah Boko Rasul 11:14

Io paca'an monyampaian borito ko kolai huatan somuo urakng inyo ado dalapm rumah kolai. Io paca'an momboritoan mongona'i caro kaitn ulih disolamant'an doi' hukupan dosa.’

Ibrani 13:2

Jangan hohatian moonji'i koluntukan ko urakng bukai. Obai, boboropo urakng udah molabuhan nantai, ongko sobondarnyo sia' moonji'i koluntukan ko boko molekat biar pan sia' kinyo tohu nantai.

Lukas 24:29

Apo sia' mombaba' Sio pakai' tinggal bosamo sia'. Kato sia', “Ari udah honda' malapam. Matoari hampikng tonggolapm. Bomalapm agatn koi di si'itn jam.” Jadi Sio mansu' ongko noluntukng samoan sia'.

3 Yohanes 1:8

Jadi, kito gola' monulukng sia'. Agatn ubo nantaiam, kito ulih monjadi boko urakng inyo bokorojo samo agatn sia' pakai' monyebaran ajaran inyo bondar.

3 Yohanes 1:5

Somadikanku inyo tokasih, kolai sotia ko Tuhatn agatn somuo potulukan inyo kolai onju' ko boko somadikan kito. Kolai monulukng sia' biar pan kolai co mongonal sia'.

1 Petrus 5:12

Aku monulis surat singkat ni'in di tulukng Silas. Io nam somadikan, somadikan soiman inyo sotia. Aku monulis surat ni'in pakai' momadahi huatan moonji'i somangant ko kaitn. Aku pan honda' oca' kaitn yakitn obai isi suratku ni'in bondar-bondar mongona'i koboi'an Allah. Kaitn gola' totap hidup dalapm koboi'an-Nyo nantai.

Filemon 1:17

Jadi, aman kolai moanggap aku somadikan soiman kolai, torima' cam Onesimus agi' samo sama'an kolai monorima' aku jam.

Filipi 1:7

Memang pantas aku bopikir ubo nian mongona'i somuo kaitn obai aku kotakan mongasihi kaitn. Obai, kaitn hala monulukng ku dalapm polayatan ku, ia'an nantai polayatan inyo Tuhatn onju' ko aku obai Sio honda' monunju'an kasih karunia-Nyo ko aku. Timpu aku ado di dalapm ponjara, timpu ku mombela Kabar Boi' tohadap urakng inyo molawatnnyo, timpu ku mombutian Kabar Boi' nantai bondar, kaitn hala monulukng ku dalapm polayatan nantai.

Efesus 1:1

Surat ni'in doi' aku, Paulus. Aku di tingkau pakai' monjadi rasul Kristus Yesus obai nantai kohonda' Allah. Surat ni'in ko somuo umant husus umputn Allah di kota Efesus, ia'an boko urakng inyo pocayo ko Kristus Yesus.

Galatia 6:10

Obai nantai, huncapm kito bulah koboi'an sotiap kali ado kosompatan. Huncapm kito bulah koboi'an ko somuo urakng, hususnyo ko sosamo urakng inyo pocayo agatn Yesus.

2 Korintus 12:11

Aku torus momuji diri samo sama'an urakng budu. Apo kaitn momoso ku molabuhan nantai. Obai gola' kaitn am inyo momuji botulukan ku. Biar pan aku ni'in urakng inyo conyiant ado rotinyo, aku co kalah agatn boko urakng totontu nantai inyo kaitn anggap sobagai boko rasul inyo luar biaso.

2 Korintus 5:14

Apo alasan pakai' somuo porbuatan koi ia'an obai Kristus mongasihi koi. Obai koi tohu agatn ni'in: Aman siku' urakng udah mati pakai' somuo urakng, jadi somuo urakng nantai udah mati jam.

Roma 16:23

Salapm ko kaitn doi' Gayus, inyo monorima'ku bodiapm di rumahnyo. Io pan monorima' somuo jomaat di rumahnyo. Salapm ko kaitn doi' Erastus, bendahara kota. Salapm jam doi' Kwartus, urakng inyo pocayo samo sama'an kito. [

2 Yohanes 1:10

Jadi, aman ado urakng inyo datakng momboritoan ajaran inyo bukai doi' ajaran Kristus, jangan kaitn korumahan. Malahan, jangan disalapi.

Kisah Boko Rasul 18:8

Banya' urakng di Korintus mondinga' ajaran Paulus ongko monjadi pocayo agatn Yesus, tomansu' Krispus, kopala' rumah sombayakng nantai huatan somuo urakng inyo tinggal dalapm rumahnyo. Somuo urakng pocayo nantai dibaptis jam.

Kisah Boko Rasul 8:38

Ongko pojabat nantai monyiuh hulutnnyo pakai' monongga'an koretanyo. Filipus ongko pojabat nantai turutn ko ara'i, ongko Filipus mombaptis io.

Kisah Boko Rasul 8:12

Apo Filipus momboritoan Kabar Boi' mongona'i Koraja'an Allah. Io momboritoan mongona'i kuaso Yesus sobagai Rajo Inyo Dijanjian Allah. Watu Filipus momboritoan somuo nantai, banya' urakng pocayo agatn borito nantai, boi' lolaki damo botina'. Ongko, Filipus mombaptis sia'.

Lukas 14:23

Lalu, habakng nantai monyiuh hulutnnyo, ‘Botula'cam ko boko jalatn bosar ongko ko boko sako jalatn di luar kota. Hundakngcam boko urakng doi' su'utn ko pogai ongko makatn jam. Kongkanti'icam sia' pakai' datakng, oca' rumahku bisi.

Matius 3:6

Sia' moaku'i boko dosa sia' huatan Yohanes mombaptis sia' di Sungai Yordan.

Kisah Boko Rasul 16:31

Kato sia', “Pocayocam ko Tuhatn Yesus, ongko kolai paca'an disolamant'an. Ubo nian jam soharusnyo dilabuhan ulih somuo urakng inyo tinggal di dalapm rumah kolai.”