Ibrani 9:26 - Porjanjian Boharu Torjomahan Baso Dilakng Soari-ari

²⁶ Soandainyo sama'an nian, boroti Sio gola' opat ajab sonsaro doi' mulo dunia ni'in dipulah. Apo inyo nyata, watu ni'in diari-ari toahir ni'in, Sio datakng sokali mo pakai' mohapus dosa agatn caro momposombahan diri-Nyo.

Ibrani 9:26 ပူးပေါင်းရင်းမြစ်များ

Matius 13:39

Musuh inyo moabur bonih solalakng nantai monggambaran Rajo Sitatn. Watu bohanyi nantai monggambaran ahir joman. Ongko boko urakng bohanyi nantai monggambaran boko molekat.

Matius 13:40

Boko urakng inyo bohanyi nantai paca'an mongumpulan boko solalakng lalu moncuculnyo ko dalapm api. Sama'an nantai jam paca'an tojadi watu ahir joman.

Matius 25:34

Lalu, sobagai Rajo, Sio paca'an bopandir ko boko urakng di sopia' kanannyo, ‘Maracam, kaitn inyo diborokati ulih Bopai-Ku! Mansu'cam ko dalapm Koraja'an inyo disodiaan pakai' kaitn tangga'i dunia dipulah.

Yohanes 1:29

Kohobu'annyo, Yohanes moniant Yesus datakng ko io. Yohanes bopandir, “Tiat! Numbo, Ana' Domba inyo diutus Allah oca' mohapus dosa dunia.

Yohanes 17:24

Oi Bopai, mongona'i somuo murid inyo udah Duatn onju' ko aku, kohonda' Ku oca' sia' bosamo agatn Aku, di mono kodiapan-Ku nononyo. Agatn ubo nantai, sia' ulih moniant obai Duatn mombulah Ku monjadi mulia, obai Duatn mongasihi Aku sobolupm dunia ni'in dipulah.

1 Korintus 10:11

Boko kojadian nantai monjadi contoh pakai' kito. Boko kojadian nantai ditulis pakai' moingant'an kito inyo hidup di ari-ari toahir.

Galatia 4:1

Aku monogasan hal ni'in: Siku' urakng ana' paca'an monguaso'i somuo hal inyo diwarisan bopainyo dionju' ko io. Apo aman ana' nantai ija' bobia', paca'an ado boko polayatn inyo ditugasan pakai' monjago ana'nyo. Ado jam boko polayatn pakai' mourus kodampuan umputn ana'nyo nantai. Ana' inyo muda' nantai gola' monaati boko polayatn nantai. Obai nantaiam, ana' nantai samo sama'an siku' urakng hulutn. Niannam koadaan ana' nantai sampai watu inyo ditontuan bopainyo.

Efesus 1:10

Ninam hajat Allah nantai: watu inyo udah ditontuan-Nyo, Sio paca'an mombulah somuo hal di sorugo ongko di bumi monjadi sodoirmo huatan Kristus bokuaso di pucu' somuonyo.

Efesus 5:2

Kaitn gola' mongasihi urakng bukai samo sama'an Kristus udah mongasihi kaitn ia'an Sio monyorahan diri-Nyo monjadi kurbatn posombahan pakai' monanggukng hukupan dosa kito. Sio monjadi posombahan harupm inyo monyonangan Allah.

Titus 2:14

Yesus monyorahan diri sampai mati. Agatn caro nantai, Sio mombebasan kito doi' boko kojahatan. Sio jam bulah kito borosih doi' boko dosa kito oca' kito monjadi boko urakng umputn Sio siku', ia'an boko urakng inyo bondar-bondar totap hala bulah koboi'an.

Ibrani 1:2

Apo, watu ari-ari toahir ni'in Allah bopandir ko kito molalu'i Ana'-Nyo. Allah udah monotap'an Ana'-Nyo inyo bohak momuku'i somuo hal. Molalu'i Sio, Allah mombulah sogolintaran alapm.

Ibrani 10:10

Obai, memang Yesus Kristus udah molabuhan kohonda' Allah. Ia'an, Sio momposombahan bukakng-tubuh-Nyo siku' sokali mo pakai' somanah-manahnyo. Sio molabuhan nantai oca' kito di borosihi doi' dosa kito.

Ibrani 10:12

Apo Kristus momposombahan sobuti' kurbatn mo pakai' somanah-manahnyo, ia'an diri-Nyo siku', pakai' mohapusan dosa. Lopas nantai, Sio dudu' di tompat inyo tohormat di sopia' kanan Allah.

Ibrani 10:26

Obai, aman kito songajo bulah dosa lopas kito monorima' ajaran inyo bondar, jadi conyiant kurbatn posombahan agi' inyo ulih mohapus dosa nantai.

Ibrani 10:4

Obai, darah sapi sabukan agatn darah kambikng sabukan co mungkitn mohapus dosa.

Ibrani 4:3

Kito inyo pocayo ulih mansu' ko tompat torahat nantai. Apo, sia' inyo kinyo pocayo culih mansu'. Sama'an inyo dipandiran Allah, “Aku godi, lalu bosumpah: Sia' tajahan cokalo mansu' ko dalapm tompat torahat-Ku.” Allah bopandir sama'an nantai, biar pan Sio udah jadiam mombulah la'apo pan doi' mulo dunia ni'in dipulah.

Ibrani 7:27

Yesus kinyo sama'an boko imam agukng inyo bukai nantai. Sia' gola' momposombahan kurbatn bonatakng sotiap ari oca' dosa sia' siku' diamputi. Lopas nantai, hoyu' sia' momposombahan kurbatn oca' dosa boko urakng bukai diamputi. Apo timpu Yesus momposombahan diri-Nyo siku', Sio momposombahan kurbatn sokali pakai' somanah-manahnyo oca' dosa boko urakng ulih diamputi.

Ibrani 9:12

Kristus udah mansu' ko dalapm Ruakan Maho Suci di dalapm potungguan nantai sokali pakai' somanah-manahnyo. Sio kinyo mombaba' darah kambikng sabukan damo darah ana' sapi, apo Sio mansu' agatn mombaba' darah-Nyo siku'. Agatn sama'an nantai, Sio udah mombebasan kito doi' hukupan dosa kito pakai' somanah-manahnyo.

Ibrani 9:14

boroti darah Kristus lobih boi' agi'. Molalu'i Roh Allah inyo hala ada'an, Kristus udah momposombahan diri-Nyo siku' ko Allah. Sio nam kurbatn posombahan inyo sompurna. Darah-Nyo mombulah hati kito monjadi borosih doi' boko porbuatan inyo kinyo bondar oca' kito ulih monyombah Allah inyo hidup.

1 Petrus 1:20

Allah udah momilih Sio sobolupm dunia dipulah. Apo, hoyu' ari toahir ni'in, Kristus udah datakng monyatoan diri-Nyo. Sio molabuhan nantai pakai' kaitn.

1 Petrus 2:24

Kristus siku' pan udah monanggukng hukupan dosa kito watu Sio mati di kayu salib. Sio molabuhan nantai oca' kito jangan bulah dosa agi', oca' kito dapat hidup agatn caro inyo bondar di hadapan Allah. Obai boko luko Kristus, kaitn monjadi nyamanam.

1 Petrus 3:18

Obai, Kristus udah mati sokali pakai' somuo dosa kito. Sio kinyo bodosa, apo Sio mati pakai' boko urakng inyo bodosa oca' Sio mombimbikng kito ko Allah. Sio inyo udah dibunuh dalapm koadaan-Nyo sobagai monsio, apo Roh Allah mombulah Sio hidup agi'.

1 Petrus 4:7

Boko somadikan ahir dunia ni'in udah dampikam. Obai nantai, kaitn gola' kondalian diri kaitn, ongko hala siap oca' kaitn ulih bodoa.

1 Yohanes 3:5

Kaitn tohu obai Kristus datakng pakai' moamputi dosa monsio. Sio samo sokali co bodosa.

1 Yohanes 3:8

Apo urakng inyo totap bulah dosa, rotinyo io ia'an ana' Rajo Sitatn. Nantai udah jolas obai Rajo Sitatn hala bulah dosa doi' sobolupm dunia dipulah. Nantaiam alasan Ana' Allah udah datakng ko dunia, ia'an oca' Sio monongga'an pokoroja'an Rajo Sitatn.

Wahyu 13:8

Io paca'an disombah ulih somuo urakng inyo bodiapm di bumi, ia'an somuo urakng inyo doi' mulo dunia dipulah damonyo co totulis dalapm Buku Kohidupan. Buku nantai umputn Ana' Domba inyo udah disombolih.

Wahyu 17:8

Bonatakng nantai inyo udah kolai tiat, io komainyo ado, apo watu ni'in conyiantam. Apo nononyo io paca'an ado agi' doi' Jurakng Maut. Boko urakng inyo bodiapm di bumi, ia'an somuo urakng inyo ado doi' mulo dunia dipulah damonyo kinyo totulis dalapm Buku Kohidupan, sia' paca'an hiratn moniant obai bonatakng nantai kalo ado, lalu hilakng, ongko koluar agi'. Apo lopas nantai, io paca'an dibonasoan somanah-manahnyo.